Tuua Navu ma Agai i Sisifo

Ua maliu Iosefa Samita. O le taimi nei ua taitaia e Polika Iaga ma isi Aposetolo le Ekalesia. Na iloa e Polika ua le o toe saogalemu le Au Paia i Navu. Ua tatau ai ona latou o ese. Ae muamua, sa finagalo le Alii ia latou faamae’aina le fausiaina o le malumalu. Sa finagalo o Ia ia i latou e osia feagaiga ma Ia ma faamauina o ni aiga.

Au Paia, 1:571, 579–80

Ina ua mavae ni nai masina, sa saunia le malumalu mo tagata e osia ai feagaiga iina. E faitau afe le Au Paia na o mai i le malumalu. Sa nofo Polika i le malumalu seia oo i le leva o le po e fesoasoani ia i latou e osia feagaiga ma le Alii. Mulimuli ane, sa ta’u atu e Polika i tagata uma e tatau ona latou tuua Navu.

Au Paia, 1:582

Ina ua ala a’e Polika i le taeao na sosoo ai, sa toatele atu le Au Paia sa faatalitali mai i le malumalu. Sa ta’u atu e Polika ia i latou ua le saogalemu le nonofo ai i Navu. Sa latou manaomia le sailia o se nofoaga fou i Sisifo. Sa ia folafola atu e mafai ona latou fausia se malumalu fou pe a latou taunuu iina.

Au Paia, 1:582–83; 2:13–14

Ae e lei o ese le Au Paia. Sa latou mananao e osia feagaiga ma le Alii a o lei amataina la latou malaga i se nofoaga fou.

Au Paia, 1:583

Sa vaai atu Polika i o latou foliga ma suia ai lona mafaufau. Sa ia faaaluina le aso atoa ma le aso na sosoo ai e fesoasoani ai i le Au Paia e osia feagaiga i le malumalu.

Au Paia, 1:583

O lenei ina ua mae’a osia e le Au Paia feagaiga ma le Alii, ua oo i le taimi e tuua ai Navu. Sa iloa e Polika ua saunia e le Alii se nofoaga mo i latou. Sa ia vaai i ai i se faaaliga. Sa amata la latou malaga. Sa malulu le tau, ma sa palapala le eleele. Sa mama’i tagata. Ua uma a latou meaai.

Au Paia, 2:16–18, 20–21

O loo umi naua pea le ala e uia e le Au Paia. Sa mafaufau Polika pe mafai faapefea ona latou faia se malaga umi ma le faigata. Sa tatalo atu o ia mo le fesoasoani a le Atua.

Au Paia, 2:46

Na tuuina mai e le Alii ia Polika se faaaliga. Sa ia aoaoina Polika i le ala e taitai ai le Au Paia. Sa ia fetalai mai e tatau ona latou fesoasoani le tasi i le isi i le tausiga o e matitiva.

Mataupu Faavae ma Feagaiga 136:1–8

Na fetalai mai le Alii e tatau i le Au Paia ona manatua feagaiga na latou osia ma Ia. Afai latou te faia, o le a Ia faamanuiaina i latou ma fesoasoani ia i latou i la latou malaga.

Mataupu Faavae ma Feagaiga 136:4, 11, 42; Au Paia, 2:47

Sa matuā faigata pea lava le malaga. Sa maliliu nisi tagata. Ae ona o a latou feagaiga o le malumalu, na iloa ai e le Au Paia o le a latou toe vaai i tagata o o latou aiga.

I ni nai masina mulimuli ane, na taunuu ai uluai Au Paia i le Vanu o Sate Leki i le 1847. Ina ua vaai atu Polika Iaga i le vanu, sa ia fai mai, “O le nofoaga sa’o lenei.” O le nofoaga lava lea e tasi na ia vaai i ai i se faaaliga. O iinei o le a saogalemu ai le Au Paia. O iinei e mafai ai ona latou tapuai i le Alii ma faia Lana galuega i le filemu.

Au Paia, 2:17, 64–67

I le aluga o tausaga, sa taunuu atu le toatele o le Au Paia. Sa latou fausia le tele o isi malumalu, lea e mafai ai e tagata ona osia feagaiga ma le Alii. Sa latou auina atu faifeautalai i le lalolagi atoa e a’oa’o atu le talalelei a Iesu Keriso. Sa faaauau pea ona tuputupu a’e le Ekalesia a le Faaola, ma faamanuiaina fanau a le Tama Faalelagi i soo se mea.