Falepuipui o Liperate

O le toatele o tagata sa nonofo i Misuri sa lē fiafia i le Au Paia. Na auina atu e le kovana ni fitafita e faatonu i latou e o ese. Sa tuliesea e fitafita le Au Paia mai o latou fale, gaoi mea mai o latou fale, ma faamanualia ai le toatele o i latou.

Au Paia, 1:355–56, 362, 364

Sa puefaapagotaina e fitafita ia le Perofeta o Iosefa Samita ma isi taitai o le Ekalesia.

Au Paia, 1:357–58

Sa fesili atu Iosefa pe mafai ona maua sina taimi paganoa mo ia ma lona aiga. Na fai mai fitafita e leai. Ona latou aveese atu lea o Iosefa ma isi pagota.

Au Paia, 1:366

I se tasi po, sa faalogologo ai Iosefa ma isi pagota a o talie a latou leoleo e uiga i mea leaga sa latou faia i le Au Paia. Sa le mafai e Iosefa ona toe faalogo i ai. Sa ia tu i luga ma ee atu, “Fifilemu!” Sa ia tautala ma le mana o le Atua. Sa fefefe leoleo. Na fai mai i latou ua latou salamo ma le toe tautatala ai.

Au Paia, 1:367–68

Mulimuli ane, na tuu ai Iosefa ma ana uō i se falepuipui i se taulaga e ta’ua o Liperate. Sa matuā malulu, laitiiti, ma pogisa le falepuipui. Sa na o ni nai vaomago palapalā e momoe ai. Sa na o sina meaai itiiti lava foi sa i ai, ma sa latou mama’i ai.

Au Paia, 1:369–70, 374, 384–85

Sa mafaufau tele Iosefa e uiga i le Au Paia. Sa ia alofa ia i latou. Sa popole o ia ia i latou. Ae sa le mafai ona ia faia se mea e fesoasoani ai ia i latou.

Au Paia, 1:385–86

Sa tatalo soo Iosefa. Sa ia fesili atu i le Atua po o fea o i ai o Ia ma pe aisea na Ia le fesoasoani ai i le Au Paia. Pe na faagaloina ea e le Atua o ia ma le Ekalesia?

Mataupu Faavae ma Feagaiga 121:1–6

Sa tali mai le Atua i le tatalo a Iosefa. Sa fai mai. “Loʼu atalii e, ia filemu lou agaga.” Na taʼu atu e le Atua ia Iosefa o ona luitau o le a le tumau e faavavau, ma o le a mo lona lelei. Sa faamanatu atu e le Atua ia Iosefa sa oo Iesu Keriso i mea e sili atu ona faigata. Sa Ia folafola atu o le a faatasi o Ia ma Iosefa “e faavavau faavavau lava.”

Mataupu Faavae ma Feagaiga 121:7; 122:5–9