Ua Auauna Telii i le Alii

Atiaeina o le Ekalesia i Tubuai

O Telii ma isi o loo matamata i le taunuu mai o faifeautalai o le Au Paia o Aso e Gata Ai.

O se fafine e igoa ia Telii sa nofo i se tamai motu e ta’ua o Tubuai. O nisi taimi e asiasi atu ai faifeautalai mai ekalesia eseese i Tubuai, ae e masani lava ona latou le nonofo umi. I se tasi aso i le 1844, sa fiafia ai Telii ina ua faalogo ua taunuu mai faifeautalai mai Le Ekalesia a Iesu Keriso o le Au Paia o Aso e Gata Ai i Tubuai.

Mataupu Faavae ma Feagaiga 1:1; 133:8

Sa valaaulia e Telii ma Nabota ia faifeautalai e nonofo faatasi ma i la’ua.

Sa agai atu faifeautalai i nisi o motu tetele. Ae sa mananao tagata i Tubuai ia nonofo i la’ua ma a’oa’o atu le talalelei. Fai mai Telii ma lona toalua, o Nabota, e mafai ona nonofo faifeautalai i lo la fale. Sa ioe i ai se tasi o faifeautalai, o Addison Pratt.

Au Paia, 1:573–74

O Telii ma Nabota o loo faia se taumafataga ma se tasi o faifeautalai.

Na faasoa atu e Telii ma Nabota mea uma sa la maua ia Addison. Sa la a’oa’oina o ia e tautala i la latou gagana. Sa a’oa’oina i laua e Addison e uiga ia Iesu Keriso.

O Telii o loo papatisoina a o matamata atu i ai Nabota.

Na ta’u atu e le Agaga Paia ia Telii ma Nabota e moni le talalelei a le Faaola. O i latou tagata muamua i Tubuai na papatisoina.

Au Paia, 1:573–74

O Telii ma isi o loo faasoa atu le talalelei i tagata i Tubuai.

Na avea Telii, Nabota, ma Addison ma ni uo lelei. Sa latou malaga faatasi ma a’oa’o atu le talalelei i Tubuai ma isi motu. Ina ua taumafai tagata e ta’u atu i le Au Paia i Tubuai e le tatau ona latou auai i le Ekalesia, sa a’oa’oina i latou e Telii mai tusitusiga paia e moni le Ekalesia.

Au Paia, 2:27, 45

Telii, Nabota, ma isi Au Paia o loo pepese faatasi.

Sa manao Telii e fesoasoani i le toatele o tagata i Tubuai e a’oa’o le talalelei a Iesu Keriso. Sa ia setiina tusitusiga paia i musika ma valaaulia ni vaega o tagata toatele e pepese faatasi ma ia i afiafi. O le usuina o pese a Telii na fesoasoani i le toatele o tagata e a’oa’o mai tusitusiga paia ma manatua mea sa latou a’oa’oina.

Mataupu Faavae ma Feagaiga 25:12

O Teii ma lona aiga o loo faafeiloa’iina le aiga o Addison.

I tausaga mulimuli ane, na o mai ai nisi faifeautalai i Tubuai, e aofia ai le aiga o Addison. Sa faafeiloaia i latou e Teii i lona fale. Sa la galulue faatasi ma le faletua o Addison, o Louisa, e auauna atu i tamaitai o Tubuai.

Au Paia, 2:133–34

O loo faaauau pea ona faasoa atu e Telii ma lona aiga le talalelei i isi.

Ina ua mavae sina taimi, sa faamalosia faifeautalai e tu’ua Tubuai ma isi motu. Ae sa faaauau pea ona a’oa’o atu ma taitaia e Telii le Au Paia. Ona o le faataitaiga ma le auaunaga a Telii, sa tumau malosi ai le Ekalesia i Tubuai.

Au Paia, 2:150–51