Ailama Page ma Faaaliga

O Ailama Page o se uo a Iosefa Samita ma Oliva Kaotui. O ia foi o se tasi o molimau e toavalu o papatusi auro. Sa i ai se maa a Ailama, ma sa talitonu o ia o loo faaaogaina e le Atua e tuuina atu ai ia te ia savali, po o faaaliga, mo le Ekalesia. Sa talitonu Oliva ma isi Au Paia o faaaliga a Ailama e mai le Atua.

Mataupu Faavae ma Feagaiga 28, ulutala o le vaega; Au Paia, 1:97

O faaaliga a Ailama sa foliga mai o ni tusitusiga paia. Ae sa ese i latou mai a’oa’oga a le Tusi Paia. Sa ese foi i latou mai mea na ta’u atu e le Alii i le Perofeta o Iosefa. Sa le mautinoa Iosefa po o le a le mea e fai.

Au Paia, 1:97

Sa ala Iosefa i le tele o le po ma ole atu i le Atua mo se fesoasoani. Sa popole o ia i le faia o le mea sese ma faatiga i lagona o ana uo.

Au Paia, 1:97

Sa manao Iosefa i tagata e saili faaaliga mo o latou lava olaga. Ae o le a fenumiai pe afai e taumafai tagata uma e maua faaaliga mo le Ekalesia atoa.

Au Paia, 1:97

Mulimuli ane, na tuuina atu e le Alii ia Iosefa se faaaliga e faasoa atu ia Oliva. Na fetalai mai le Alii e na o le perofeta lava e mafai ona maua faaaliga ma poloaiga mo le Ekalesia atoa. Sa ia fetalai mai e tatau ona aoao atu e Oliva lenei mea ia Ailama.

Mataupu Faavae ma Feagaiga 28:2, 6–13

Sa finagalo le Alii ia malamalama Ailama e mafai ona ia maua faaaliga mo lona lava olaga. Ae o faaaliga mo le Ekalesia o le a oo mai i le perofeta a le Alii. Sa faalogo Ailama ia Oliva ma salamo. Ua malamalama lelei nei le Au Paia i le auala e taialaina ai e le Alii Lana Ekalesia.

Au Paia, 1:98