“Ua Aoao Iosefa ma Sini e uiga i le Lagi,” Tala o le Mataupu Faavae ma Feagaiga (2024)
“Ua Aoao Iosefa ma Sini e uiga i le Lagi,” Tala o le Mataupu Faavae ma Feagaiga
Fepuari 1832
Ua Aoao Iosefa ma Sini e uiga i le Lagi
O se faaaliga vaaia e uiga i faamanuiaga a le Atua mo Ana fanau
I se tasi aso, sa faitau ai Iosefa Samita ma Sini Rikitone i le Tusi Paia. Sa la faitau e uiga i le mea e tupu i tagata pe a maliliu. Sa mafaufau Iosefa ma Sini i mea sa la faitauina, ma sa la mananao e fia iloa atili.
Mataupu Faavae ma Feagaiga 76:11–18
Na tuuina mai e le Alii ia i la’ua se faaaliga vaaia ofoofogia. Sa la’ua vaai i le Tama Faalelagi ma Iesu Keriso na siosiomia e agelu. Sa la’ua faalogoina se leo o fai mai o Iesu o le Alo o le Atua. Na fai mai le leo na maliu Iesu mo i tatou ma na toetu mai—Na toe soifua o Ia. Ona sa toetu o Ia, o le a tatou toetutu foi.
Mataupu Faavae ma Feagaiga 76:19–24, 39–43
Na aoao e Iosefa ma Sini e faapea, a tatou toetutu, o le a tatou nonofo i se tasi o nofoaga e tolu i le lagi, e ta’ua o malo. O tagata e le taliaina le talalelei a Iesu Keriso o le a o i le malo telesitila. Na faatusaina e le Alii lenei malo i le malamalama o fetu.
Mataupu Faavae ma Feagaiga 76:81--86
Sa aoao foi Iosefa ma Sini e uiga i se malo e ta’ua o le malo teresitila. O lenei malo e mo tagata o e ola i ni olaga lelei ae le usiusitai atoatoa i le talalelei a Iesu Keriso. E le malolosi i latou i lo latou faatuatua ia te Ia. Na faatusaina e le Alii lenei malo i le malamalama o le masina.
Mataupu Faavae ma Feagaiga 76:71–80
O le malo aupito maualuga o le malo selesitila. O tagata i lenei malo na osia feagaiga, po o folafolaga, ma le Atua ma tausia a latou feagaiga. Sa latou salamo ma mulimuli ia Iesu Keriso. Latou te nonofo faatasi ma le Tama Faalelagi ma Iesu e faavavau ma avea faapei o i La’ua. Na faatusaina e le Alii lenei malo i le malamalama o le la.
Mataupu Faavae ma Feagaiga 76:50–70
Na ta’u atu e le Alii ia Iosefa ma Sini e aua nei faasoa atu mea uma sa la vaaia i la la’ua faaaliga vaaia. Ae sa le finagalo o Ia la te tusia nisi o na mea ma faasoa atu i isi. E toatele tagata o le Ekalesia sa fiafia e ta’u atu i tagata le faaaliga vaaia.
Mataupu Faavae ma Feagaiga 76:113–119; Au Paia, 1:149–50
Sa le fiafia nisi o tagata i le faaaliga vaaia. Sa ese mai mea sa latou talitonu i ai. Ae o le toatele o le Au Paia sa faafetai i le iloaina o lenei faaaliga. Na faaalia ai ia i latou e alofa le Tama Faalelagi i Ana fanau ma faia se auala mo i latou e toe foi atu ai ia te Ia.
Au Paia, 1:149–50