O Se Faaaliga mo Ema

Sa vave ona suia le olaga o Ema ma Iosefa. Na ta’u atu e le Alii ia Iosefa e tatau ona ia taofia le taulai atu i le faatoaga. Nai lo lena, e tatau ona faaalu e Iosefa lona taimi e aoao atu ai tagata e uiga ia Iesu Keriso ma fesoasoani i le Ekalesia a le Alii ia tuputupu ae.

Mataupu Faavae ma Feagaiga 24:7–9; Au Paia, 1:96

Sa tele fesili a Ema e uiga i lenei suiga. Sa le iloa e ia le mea e tatau ona ia faia a o auauna atu Iosefa i le Alii. Pe o le a ia fesoasoani foi i le Alii ma Lana Ekalesia?

Au Paia, 1:96

Na fetalai atu le Alii ia Ema e ala i se faaaliga na tuuina atu ia Iosefa. Sa ia valaau o ia “Ema Samita, lo’u afafine.” Sa Ia ta’u atu ia Ema ua Ia filifilia o ia ma valaauina o ia e fai Lana galuega. O ia o se tamaitai faapitoa, ma sa i ai ni Ana mea tetele mo ia ina ia faia.

Mataupu Faavae ma Feagaiga 25:1–3

Na fetalai le Alii ia Ema e malaga faatasi ma Iosefa. Na fetalai mai le Alii o le a faamatala e Ema tusitusiga paia ma aoao atu tagata o le Ekalesia. Sa Ia fetalai atu ia Ema e faamuamua o Ia i lona olaga ma tausia ana feagaiga. Sa Ia folafola atu ia Ema o le a ia maua Lona Agaga. Sa finagalo o Ia ‘ia ia aoao, tuputupu ae, ma maua Ana faamanuiaga.

Mataupu Faavae ma Feagaiga 25:2, 6–10, 15

Sa ta’u atu foi e le Alii ia Ema e fiafia o Ia e faalogo i Ana fanau o pepese. Sa Ia fai mai o pese a Lana Au Paia e pei lava o se tatalo ia te Ia. Sa ia fai atu ia Ema e fai se tusi o viiga e mafai ona usuina faatasi e le Au Paia. Sa maua e Ema le tele o pese matagofie e uiga i le Alii ma Lana talalelei ma tuu i totonu o se tusi pese.

Mataupu Faavae ma Feagaiga 25:11–12; Au Paia, 1:221–22

Sa faaauau pea ona suia olaga o Ema ma Iosefa, ae sa iloa e Ema e alofa le Alii ia te ia ma e i ai sona faamoemoega mo ia. Sa ia auauna atu i le Alii ma tagata na siomia ai o ia. Sa ia fesoasoani i le Ekalesia a Iesu ia tuputupu ae.

Mataupu Faavae ma Feagaiga 25:13–15; Au Paia, 1:221–23