Elia Able

Na valaauina e le Alii se tagata e igoa ia Elia Able e avea ma se faifeautalai. Sa aoaoina e Elia ia Eunice ma Charles Franklin e uiga i le talalelei a Iesu Keriso. Sa ia ta’u atu ia i la’ua e uiga i le Tusi a Mamona ma le Perofeta o Iosefa Samita. Sa talitonu Eunice ma Charles i mea sa ia aoao atu ma sa mananao e auai i le Ekalesia. Na papatisoina i la’ua e Elia.

Au Paia, 1:316

Na alu Elia e faasoa atu le talalelei i se isi nuu. I se tasi po, i ni nai masina mulimuli ane, sa ia faia ai se miti e uiga i lana uo o Eunice. I le miti, sa le’i toe mautinoa e Eunice pe moni le Tusi a Mamona pe o Iosefa Samita o se perofeta. Ina ua ala a’e Elia, sa toe foi loa lava o ia e asi Eunice.

Mataupu Faavae ma Feagaiga 75:27; Au Paia, 1:315--16

Na faate’ia Eunice i le vaaia o Elia i lona faitotoa! Sa sa’o le miti a Elia: Sa le’i toe talitonu Eunice i le Tusi a Mamona po o Iosefa Samita.

Au Paia, 1:317

Na fai atu Elia iā Eunice e sau e faalogologo i lana tala’iga i se a’oga. A o faalogo o ia i upu a Elia, sa ia toe lagonaina le Agaga Paia. Sa ia iloaina e moni le talalelei!

Au Paia, 1:317

Na folafola atu e Elia ia Eunice o le a toe foi mai o ia i le lua vaiaso e toe tala’i. Ae sa le’i mananao nisi tagata o le nuu e toe foi mai o ia. Ina ua alu ese Elia, sa amata ona latou ta’u atu i tagata na fasioti e Elia ni tagata. Sa latou ofoina atu se taui mo soo se tasi na te mauaina o ia.

Au Paia, 1:318

Na iloa e Eunice o loo pepelo tagata e uiga ia Elia. Na te lei fasiotia se tasi. O ia o se tagata lelei ma o se auauna a le Atua. Sa ia iloaina o a latou pepelo o le a le taofia ai Elia mai le sau i lo latou nuu e talai atu. Sa ta’u atu e Eunice i tagata o le a toe foi mai Elia. “O le a puipuia o ia e le Atua,” o lana tala lea.

Au Paia, 1:318

Na toe foi atu Elia. Na sau o ia i le a’oga lava lea sa ia tala’i muamua ai. Sa tumu i tagata sa mananao e pue faapagotaina o ia. Sa tu Elia i luma o le motu o tagata. Sa ia fai atu afai latou te mananao e pue faapagotaina o ia, e tatau ona latou faia nei loa, a o lei amataina lana aoaoga. Afai e leai, e tatau ona latou tuu o ia e aoao atu.

Au Paia, 1:318

Sa leai se tasi na minoi. Sa faatalitali Elia, ae sa nonofo filemu le motu o tagata. Sa usuina e Elia se viiga, fai se tatalo, ma aoao atu le talalelei a Iesu Keriso. Sa faatasi le mana o le Atua ma ia. Ina ua mae’a lana aoaoga, sa talanoa atu o ia i ana uo o Eunice ma Charles ma faaauau ai lana misiona i le filemu.

Au Paia, 1:319