Faapotopotoina i Ohaio

I Ohaio, sa toatele ma toatele tagata na auai i le Ekalesia. Na ta’u atu e le Alii ia Iosefa Samita e tatau ona faapotopoto le Au Paia o loo nonofo i isi nofoaga i Ohaio. O se malaga o le a umi. Ae na folafola mai e le Alii a uma ona latou faapotopoto, o le a Ia aoao atu i le Au Paia Lana tulafono ma faamanuia i latou i le mana e fai ai Lana galuega.

Mataupu Faavae ma Feagaiga 37; 38:32; Au Paia, 1:109–110

O le tina o Iosefa, o Lusi, ma se vaega pe tusa ma le 80 tagata o le Ekalesia na tuua o latou fale i Niu Ioka ae siitia atu i Ohaio. Sa latou o i luga o se vaa o le a ave ai i latou i se vaega o le ala. Ina ua mavae ni nai aso o latou malaga, sa tatau ona tu le vaa. O le aisa mafiafia i totonu o le vai sa polokaina ai lo latou ala.

Au Paia, 1:121–22

Sa tatau ona faatalitali le Au Paia seia malepe le aisa. Sa latou vaivai, fiaaai, susū, ma maalilili.

Au Paia, 1:122

Sa faigata ona faatalitali. Sa amata ona fefinaua’i nisi o le Au Paia i le tasi ma le isi.

Au Paia, 1:122

Sa le fiafia Lusi e faalogo i finauga a le Au Paia. Sa ia iloaina e tatau ona ia fai atu se tala. “O fea lou faatuatua?” sa ia fesili ai. Sa ta’u atu e Lusi i le Au Paia afai latou te tatalo i le Atua, o le a Ia talepe le aisa ina ia mafai ona faaauau ai la latou malaga.

Au Paia, 1:122–23

Na faafuasei ona latou faalogoina se pao e pei o le faititili a o ta‘e le aisa. Na matala se ala i le aisa, sa lava le lautele e ui atu ai le latou vaa.

Au Paia, 1:123

Sa ofo ma faafetai le Au Paia. Sa latou faapotopoto e tatalo ma faafetai i le Tama Faalelagi. Sa malaga saogalemu atu la latou vaa agai i Ohaio.

Au Paia, 1:123

Ina ua taunuu le Au Paia i Ohaio, sa talia i latou e tagata o le Ekalesia iina ma fesoasoani ia i latou e saili ni nofoaga e nonofo ai. Sa tausia e le Alii Lana folafolaga e aoao i latou i Lana tulafono ma tuuina atu ia i latou le mana e fai ai Lana galuega.

Mataupu Faavae ma Feagaiga 42; Au Paia, 1:126