Ua Asiasi Mai le Agelu o Moronae ia Iosefa Samita

Ua mavae le tolu tausaga talu le Uluai Faaaliga Vaaia a Iosefa Samita. Sa le fiafia Iosefa i nisi o mea sese na ia faia talu mai lena taimi. Sa ia mafaufau po o ā faalogona o le Atua e faatatau iā te ia.

Iosefa Samita—Talafaasolopito 1:28–29; Au Paia, 1:20

I se tasi po, ina ua momoe tagata uma, sa filifili ai Iosefa e tatalo. Sa tali muamua mai le Atua i ana tatalo, ma sa iloa e Iosefa o le a Ia toe tali mai.

Iosefa Samita—Talafaasolopito 1:29; Au Paia, 1:21–22

A o tatalo Iosefa, sa faatumulia le potu i le malamalama. Na vaai Iosefa i se agelu o tu i le ea i tafatafa o lona moega. Na fai mai le agelu o lona igoa o Moronae. Na auina mai o ia e le Atua. Sa ia fai mai ua faamagaloina e le Atua ia Iosefa ma ua i ai se galuega mo ia e fai. O le a iloa e tagata uma i le lalolagi Iosefa ma le galuega na tuuina atu e le Atua ia te ia.

Iosefa Samita—Talafaasolopito 1:30–33

Na fai mai Moronae sa i ai se tusi na faia i itulau auro po o papatusi. Sa tanumia i se mauga e latalata i le fale o Iosefa. O le tusi sa faatatau i tagata sa nonofo i Amerika i aso ua leva. Sa latou iloa e uiga ia Iesu Keriso ma Lana talalelei. Na fai mai Moronae o le a fesoasoani le Atua ia Iosefa e faaliliu le tusi ina ia mafai ai e tagata ona faitauina.

Iosefa Samita—Talafaasolopito 1:34, 46

Sa asiasi faatolu atu Moronae i lena po ma toe asiasi atu foi i le aso na sosoo ai. Sa ta’u atu e Iosefa i lona tama le mea na ia vaaia. Sa fiafia le tama o Iosefa. “O se faaaliga mai le Atua,” na ia fai atu ai ia Iosefa.

Iosefa Samita—Talafaasolopito 1:35–50; Au Paia, 1:22–25

Sa alu Iosefa i le mauga ma maua ai papatusi auro i lalo ifo o se ma’a mamafa. A o ia aapa ifo mo na mea, sa ia mafaufau pe fia se tupe e ono maua mai ai. Na sau Moronae ma ta’u atu ia Iosefa e lei saunia o ia e ave papatusi. Sa ia fai atu ia Iosefa e toe foi mai i lenei nofoaga i tausaga taitasi seia oo ina saunia o ia.

Iosefa Samita—Talafaasolopito 1:51–54; Au Paia, 1:25–27