Ua Faapotopoto le au Knight ma Isi i Siona

Sa nonofo Polly ma Iosefa Knight ma lo la aiga i Niu Ioka. Sa latou iloa lelei le Perofeta o Iosefa. Ina ua uma ona aoao i le talalelei, sa la filifili e auai i le Ekalesia. Ina ua fai atu le Alii i le Au Paia e siitia atu i Ohaio, sa usitai le au Knight.

Mataupu Faavae ma Feagaiga 37; Au Paia, 1:33, 94, 109–110

Sa fiafia le au Knight ina ua latou taunuu i Ohaio. Sa fai atu Leman Copley, o se tagata o le Ekalesia, e mafai ona nonofo nisi o le Au Paia i lona fanua. Sa lava le avanoa iina e totō ai faatoaga ma fau ai fale. Sa galulue malosi Iosefa Knight ma ona atalii e saunia fanua mo le totōina.

Au Paia, 1:126–27

Ae i se tasi aso, na suia ai le mafaufau o Leman e uiga i lona fanua. Sa le’i manao o ia e toe nonofo ai le Au Paia iina. Sa fai atu o ia i le au Knight ma isi tagata uma e o ese.

Au Paia, 1:127

Sa popole le Au Paia. O lea la ua leai se mea latou te nonofo ai. Sa latou fesili atu i le Perofeta o Iosefa po o le a le mea e tatau ona latou faia.

Mataupu Faavae ma Feagaiga 54; Au Paia, 1:127

Na fetalai mai le Alii e tatau i nei Au Paia ona o atu i Misuri ma fausia Siona. O Siona o le a avea ma se aai e mafai ona faapotopoto ai tagata o le Alii. I Siona, o le a latou fausia ai se malumalu o le a latou osia ai feagaiga, po o folafolaga ma le Atua. O le a Ia faamanuia i latou pe afai latou te tausia nei feagaiga. Sa fiafia lava le au Knight e o.

Mataupu Faavae ma Feagaiga 29:1–8; 42:30–36; 45:59–66; 54:6–9; 57:1–2; Au Paia, 1:128

A o malaga atu le au Knight i Misuri, sa ma’i tigaina lava Polly. Sa popole lona toalua o Iosefa, ma lana fanau tama ina ne’i le umi se taimi e ola ai. Ae na ta’u atu e Polly i lona aiga e manao e i ai i Siona a o lei maliu o ia. Sa sili atu lona manao i ai nai lo se isi lava mea!

Au Paia, 1:128

Ina ua mavae se malaga umi, na taunuu le au Knight i Misuri. Sa matuai faafetai lava Polly i le Alii ona sa ola o ia e vaai i ai. Sa manatu le au Knight sa matagofie tele le laueleele. Sa latou faatuatua e mafai ona latou tausia le poloaiga a le Alii e fausia Siona iina.

Au Paia, 1:132

Sa faia e le Au Paia se tatalo faapitoa ma faaigoa le laueleele o Siona, lea o le a o mai i ai tagata o le Alii. Sa tuu e le Perofeta o Iosefa se maa e faailoga ai le mea o le a i ai le tulimanu o le malumalu. I ni nai aso mulimuli ane, na maliu ai Polly. Na folafola mai e le Alii o le Au Paia o e na o mai i Siona ma maliliu ai o le a malolo i le lagi.

Mataupu Faavae ma Feagaiga 59:1–2; Au Paia, 1:132–33