Fale Gaosi Laupapa a Hawn

Sa 11 tausaga o Uiliata Samita. Sa nonofo lona aiga i le Fale Gaosi Laupapa a Hawn, Misuri, faatasi ai ma isi tagata o le Au Paia. Sa latou mananao e faapotopoto vave faatasi ma le Au Paia i Sisifo Mamao.

Mataupu Faavae ma Feagaiga 115:7–8, Au Paia, 1:347–48

I se tasi aso, sa i ai Uiliata ma lona tama ma ona uso, o Sarataio ma Alema. Na faafuasei ona latou faalogoina le pa’ō o fana ma le fe’ei. Sa o mai tagata e osofaia le Au Paia.

Au Paia, 1:348–49

Sa taufetuli tagata uma e su’e vaega saogalemu. E toatele alii ma tamaiti sa lalafi i le fale fai uamea. Sa o atu foi le tama ma uso o Uiliata i totonu, ae sa vavaeeseina mai Uiliata mai ia i latou. Sa lafi o ia i tua o se faaputuga laau. Sa ia lagonaina le pa pa o fana o siomia ai o ia.

Au Paia, 1:349, 353

Sa tamoe atu Uiliata mai lea nofoaga i lea nofoaga e lafi ai. Mulimuli ane, na uma le pa pa o fana. Na tuua e le au osofa’i le Fale Gaosi Laupapa a Hawn.

Au Paia, 1:353

Na sau Uiliata i le fale fai uamea e sue lona aiga. Na fasiotia lona tama ma Sarataio. Ae o loo ola pea le uso laitiiti o Uiliata o Alema.

Au Paia, 1:353

Sa fanaina Alema i lona suilapalapa. Sa tugā lona manu’a. Sa sii e Uiliata ia Alema ma ave o ia i le faleie o lo latou aiga.

Au Paia, 1:353–54

O le tina o Uiliata, o Amanda, sa le iloa pe faapefea ona fesoasoani i le suilapalapa o Alema. Ae sa ia iloa na silafia e le Atua. Sa tatalo o ia, ma sa ia faalogoina se leo o ta’u atu ia te ia le mea tonu e fai.

Au Paia, 1:354

Sa fufulu e Amanda le manu’a o Alema i le lefulefu. Ona ia oloina lea o se a’a o le laau ma tuu i luga o lona manu’a. Sa ia fusi lona suilapalapa i le ie. “Taoto laia faapena, ma aua le minoi,” na ia faiatu ai, “ma o le a faia e le Alii mo oe se isi suilapalapa.”

Au Paia, 1:354–55

Mulimuli ane, na saunoa mai le kovana o Misuri e tatau ona tu’ua e le Au Paia le setete a leai o le a fasiotia i latou. Ae sa lei lelei lava le suilapalapa o Alema. Sa tatalo Amanda ma ole atu i le Alii mo se fesoasoani. Sa ta’u atu e se leo ia te ia o le a le tu’ua lava e Iesu lona aiga. Na lagona e Amanda e leai se mea e mafai ona afaina ai o ia.

Mataupu Faavae ma Feagaiga 88:83; Au Paia, 1:372, 378–79

E lei leva ona uma ona ia tatalo, ae faalogoina e Amanda le alalaga o lana fanau. Sa tamo’e o ia e sue i latou, ma ina ua ia faia, sa tamo’e solo Alema. “Ua ou manuia, Tina, ua ou manuia!” na ia faiatu ai. Ua faamaloloina lona suilapalapa! O se vavega mai le Alii. Na tu’ua e Amanda ma lana fanau Misuri e saili se nofoaga saogalemu faatasi ma isi vaega o le Au Paia.

Au Paia, 1:379