Susa Young Gates ma Iosefa F. Samita

O Susa Young Gates o le afafine o Polika Iaga. Sa fanau o ia i Iuta ma tuputupu ae ai iina. Sa fiafia o ia e tusitusi, ma sa fiafia foi o ia e auauna atu i le Ekalesia a le Alii.

Au Paia, 3:9–10, 64

Ina ua matua Susa, sa ma’i tigaina o ia. Sa talosaga o ia mo se faamanuiaga faaleperisitua. I le faamanuiaga, na ta’u atu ai e le Alii ia Susa e finagalo o Ia ia te ia e faia galuega o le malumalu.

Au Paia, 3:193–94

Ina ua uma le faamanuiaga, sa faasolo malosi Susa. Sa ia faaaluina lona taimi e a’oa’o ai e uiga i lona talafaasolopito o aiga. Ina ua ia maua tagata o le aiga o e ua maliliu e lei papatisoina, sa alu o ia i le malumalu e papatiso mo i latou. Sa fiafia o ia e ta’u atu i tagata e uiga i le galuega o talafaasolopito o aiga. O le mea e faanoanoa ai, e to’atele tagata e le’i fiafia i ai.

Au Paia, 3:194–95, 206

I se tasi aso, sa asiasi atu ai Susa i lana uo o Iosefa F. Samita, le Peresitene o le Ekalesia. Sa ma’i Peresitene Samita mo le tele o vaiaso. Na iloa e Susa sa matua faanoanoa foi o ia ona ua maliu lona atalii. Sa faanoanoa foi o ia i isi mea o loo tutupu i le lalolagi, e pei o taua ma faama’i.

Au Paia, 3:197–99, 205–6

Ae ina ua nonofo i lalo Susa ma Peresitene Samita, sa fiafia o ia e talanoa atu ia te ia. Sa ia ta’u atu ia Susa ua tuuina atu e le Atua ia te ia se faaaliga faapitoa. O mea uma lava e faatatau i le lalolagi o agaga, lea e o i ai tagata pe a maliliu i latou. O lana faaaliga sa tusia i luga o se pepa. Sa tuuina atu e Peresitene Samita ia Susa ma fai atu ia te ia e faitau.

Au Paia, 3:206–7

Na faitau e Susa le pepa. Fai mai na asiasi atu Iesu Keriso i le lalolagi o agaga. Sa Ia auina atu Atamu, Eva, ma isi alii ma tamaitai faamaoni e a’oa’o agaga o e sa lei taliaina le talalelei a o latou ola. Sa latou fesoasoani i nei agaga e saunia ina ia mafai ona papatisoina tagata mo i latou i le malumalu.

Mataupu Faavae ma Feagaiga 138:11–19, 29–48; Au Paia, 3:206–7

Sa ofo Susa a o ia faitau i le faaaliga a Peresitene Samita. Sa ataata atu Peresitene Samita ia te ia. “Susa,” sa ia faiatu ai, “o loo e faia se galuega tele.” Sa ia ta’u atu ia te ia e alofa ia te ia ona o lona faatuatua i le Alii.

Au Paia, 3:206

Sa tusia e Susa e uiga i le faaaliga i lana api talaaga. “Oi, o se faamafanafanaga ia te a’u!” o lana tala lea. Sa le mafai ona ia faatali e ta’u atu i ana uo ma isi tagata o le Ekalesia e uiga i ai. Sa ia iloaina o le faaaliga a Peresitene Samita o le a fesoasoani i le Au Paia ia fiafia e faia galuega faalemalumalu mo tagata i le lalolagi o agaga.

Au Paia, 3:207