O Le Tolauapiga a Isaraelu

Sa manaomia e le Au Paia o e sa nonofo i Initipene, Misuri, le fesoasoani. Sa latou galulue malosi e fausia Siona e pei ona poloaiina ai e le Atua. Ae o isi tagata i le aai sa le mananao ia i latou iina. Sa latou faia le Au Paia ia tu’ua o latou fale.

Au Paia, 1:195

Sa nofo Iosefa Samita i Katelani. Sa ia faalogo e uiga i le mea na tupu i le Au Paia i Misuri, ma sa faanoanoa o ia. Sa ia tatalo ina ia iloa le mea e fai. Na ta’u atu e le Alii ia Iosefa e su’e ni tagata e o faatasi ma ia i Misuri. Sa latou faamoemoe o le a fesoasoani le malo i le Au Paia e toe aumai o latou fale.

Mataupu Faavae ma Feagaiga 103:1–2, 11–20, 30–34; Au Paia, 1:195–96

E tusa ma le 100 tagata na ofo atu e auai faatasi ma ia. Sa ta’ua e le Perofeta lenei vaega o le Tolauapiga a Isaraelu. Sa latou fiafia e o atu e fesoasoani i le Au Paia i Misuri.

Au Paia, 1:197–99

O Polika Iaga ma lana uo o Heber Kimball sa avea ma ni tagata o le vaega. Sa sau mamao lava se alii talavou e igoa ia Uilifoti Uitilafi mai Niu Ioka e fesoasoani.

Au Paia, 1:197–98

E to’atele tagata na auai i le tolauapiga. Sa latou savavali mo se masina atoa ma sopoia se vaitafe lautele agai atu i Misuri. Sa latou vaivai ma lagona le tigā. O le savaliga umi na mafua ai foi ona lagona e nisi tagata le lē fiafia. Sa i ai pea se auala umi e alu ai e oo atu ai i le aai o Initipene.

Au Paia, 1:200–201

A o faaauau pea ona latou savavali, sa valaau atu se fafine ia i latou. Fai mai a ia, o nisi o alii na o mai e fasioti i latou.

Au Paia, 1:203

Sa mapu le Tolauapiga a Isaraelu mo le po i se mauga i luga a’e o se vaitafe. A o latou tolauapi, e to’alima alii na ti’eti’e atu ia i latou i solofanua. Sa latou tau atu e 300 isi alii o loo agai atu e osofa’ia le tolauapiga. Sa popole le toatele o tagata o le Tolauapiga a Isaraelu. Sa ta’u atu e Iosefa ia i latou ia faatuatua o le a fesoasoani le Atua ia i latou.

Au Paia, 1:203

E le’i umi ae ufitia le lagi i ao faauli. Na amata ona to’ulu timuga mamafa. Sa faasolo ina loloto le vaitafe. Na ta i lalo e le matagi la’au. Na emo mai le uila i le lagi. Sa maua e Iosefa ma isi se tama’i falesa lea sa mafai ona latou saogalemu ai. Sa latou usuina viiga i le po atoa. “O loo i ai le Atua i lenei afa!’ O le tala lea a Iosefa.

Au Paia, 1:203–4

O le afa na taofia ai tagata na mananao e osofa’ia i latou. Sa saogalemu le tolauapiga. Ae fai mai le malo o le a latou le fesoasoani i le Au Paia. Sa ta’u atu e le Alii ia Iosefa e mafai ona o atu le Tolauapiga a Isaraelu i le fale. E tatau i le Au Paia ona fausia Siona e ala i le tausia o poloaiga a le Atua. Sa Ia folafola mai o le a Ia “tau taua a Siona.”

Mataupu Faavae ma Feagaiga 105:1–19; Au Paia, 1:204–5

Sa le fiafia nisi o tagata o le tolauapiga ina ua latou faalogo i lenei mea. Sa latou faanoanoa ona sa le mafai ona latou tau mo Siona. O nisi tagata na manatu ua le manuia taumafaiga a le Tolauapiga a Isaraelu. Ae o isi, e pei o Polika Iaga, Ipa, ma Uilifoti, sa faafetai mo le avanoa e faatasi ai ma le Perofeta o Iosefa ma a’oa’o mai ia te Ia.

Au Paia, 1:205–6

Mulimuli ane, na ta’u atu e le Alii ia Iosefa Samita e valaau Aposetolo e Toasefululua e fesoasoani e taitaia Lana Ekalesia. O Aposetolo o le a avea ma molimau faapitoa o le suafa o Iesu Keriso i le lalolagi atoa. O le to’avalu o Aposetolo e Toasefululua na savavali i le Tolauapiga a Isaraelu. O le auauna atu faatasi ma Iosefa na fesoasoani e saunia ai i latou mo lenei valaauga tāua.

Mataupu Faavae ma Feagaiga 18:26–27,; 107:23; Au Paia, 1:214–17