O Se Aso o le Faamalologa

A o pagota Iosefa Samita ma isi taitai o le Ekalesia i Misuri, sa ave i latou e nisi leoleo i se isi falepuipui. Sa agalelei leoleo i pagota. I se tasi po, sa ta’u atu ai e le taitai o leoleo ia Iosefa o le a moe o ia, ma afai e sosola ese Iosefa ma ana uo, o le a ia le taofia i latou.

Au Paia, 1:392–93

Sa sosola ese Iosefa ma isi taitai o le Ekalesia. Na latou maua o latou aiga o loo nonofo i se nuu na ta’ua o Quincy.

Au Paia, 1:395–96

Sa agalelei tagata i Quincy i le Au Paia. Sa latou tuuina atu i le Au Paia meaai ma lavalava ma se nofoaga e nonofo ai.

Au Paia, 1:377

Sa faafetai le Au Paia mo le agalelei o tagata i Quincy. Ae na iloa e Iosefa o le a latou manaomia lo latou lava nofoaga e nonofo ai. Sa faatau mai e taitai o le Ekalesia ni fanua sa leai se isi na manao i ai, ma sa amata ona siitia atu iina le Au Paia.

Au Paia, 1:399–400

Sa latalata le fanua i se vaitafe tele. Sa susu ma palapala ma tumu i namu. O namu na matuai mamai ai le toatele o le Au Paia i se faama’i na ta’ua o le malaria. Sa feoti nisi o i latou.

Au Paia, 1:402

Ina ua vaai Iosefa ua mamai le toatele o tagata, sa ia faapotopotoina nisi o taitai o le Ekalesia ma fai atu latou te o ma ia. I le taeao atoa, sa latou o ai mai lea aiga i lea aiga, e asiasi i tagata mama’i ma faamanuia i latou. Sa latou faaaogaina le mana o Iesu Keriso e faamalolo ai i latou mai o latou ma’i.

Au Paia, 1:402

O se tasi o tagata sa latou asia o Elia Fordham. Sa matuai ma’i lava o ia, ma sa manatu lona toalua o le a vave ona oti o ia. Sa fesili Iosefa ia Elia pe i ai sona faatuatua e faamaloloina i ia.

Au Paia, 1:402

Na fai atu Elia, “Ua ou fefe ua tuai tele.” Sa fesili atu Iosefa ia Elia pe talitonu ia Iesu Keriso. “Ou te talitonu i ai, Uso Iosefa,” sa ia tali atu ai.

Au Paia, 1:402

Sa faamanuia o ia e Iosefa i le suafa o Iesu Keriso. Na tu i luga Elia. Na faamālōlōina o ia e Iesu! Ona mulimuli atu lea o Elia ia Iosefa i le isi fale ma fesoasoani ia te ia e faamanuia isi tagata o e na mama’i.

Au Paia, 1:402–3