Fausiaina o Navu

Na ta’u atu e le Alii i le Au Paia e faapotopoto i se nofoaga fou. Sa latalata i se vaitafe tele e ta’ua o le Misisipi. E susū le eleele ma faataufusi. Mo nisi tagata, sa foliga mai e le o se nofoaga lelei e fausia ai se aai. Ae sa silafia e le Perofeta o Iosefa Samita, faatasi ai ma le fesoasoani a le Alii, e mafai ona latou faia ia matagofie.

Mataupu Faavae ma Feagaiga 124:25; Au Paia, 1:417

Sa amata ona galulue malosi le Au Paia ina ia avea o se nofoaga lelei e nonofo ai. Sa faaigoaina e le Perofeta o Iosefa le taulaga o Navu, o lona uiga “o se nofoaga matagofie.”

Au Paia, 1:417

Na ta’u atu e le Alii i le Au Paia e fausia se fale i Navu lea e mafai ai e tagata malaga ona o mai ma malolo ai. Sa manao o Ia ia avea Navu ma se nofoaga e lagona ai e tagata uma le taliaina.

Mataupu Faavae ma Feagaiga 124:22–24, 60; Au Paia, 1:426

Na ta’u atu e le Alii i le Perofeta o Iosefa e i ai Ana fuafuaga maoae mo Navu. Sa manao o Ia i Lana Au Paia e faapotopoto iinei ina ia mafai ona latou fausia se malumalu. Sa Ia fai atu ia i latou e galulue malosi i le mea latou te mafaia e fausia ai Lona maota. Sa vave ona amata galulue le Au Paia.

Mataupu Faavae ma Feagaiga 124:25–28, 44, 55; Au Paia, 1:420–21, 425–27

Sa finagalo le Alii i le Au Paia e fausia se malumalu aua sa ia te Ia faamanuiaga maoae e tuuina atu ia i latou. I totonu o le malumalu, o le a latou osia ai feagaiga, po o folafolaga faapitoa, ma le Alii. O le a latou aoao ai foi e uiga i le fuafuaga o le fiafia a le Tama Faalelagi mo Ana fanau uma.

Mataupu Faavae ma Feagaiga 124:29–41; Au Paia, 1:453–55

Sa galulue malosi le Au Paia e fausia le malumalu, e pei lava ona poloaiina e le Alii. Sa umi se taimi, ae sa latou fiafia i le aso e mafai ai ona latou aoao taitoatasi e uiga i folafolaga faapitoa na i ai i le Alii mo i latou i Lona malumalu.

Au Paia, 1:453–55