Ua Auauna Aposetolo i se Misiona i Peretania Tele

I se faaaliga ia Iosefa Samita, na valaauina ai e le Alii ia Aposetolo i se misiona i le isi itu o le vasa i Peretania Tele. E ui lava sa faigata ia Iosefa le i ai o Aposetolo i se mea mamao, ae sa ia faalagolago i le Alii. Sa faigata foi i Aposetolo ona tuua o latou aiga. Ae na folafola mai e le Alii o le a faamanuia i latou.

Mataupu Faavae ma Feagaiga 118

Sa i ai se aiga talavou o Heber C. Kimball ma lona toalua o Vilate. Sa i ai se la pepe e na o le tasi le masina le matua. O le toatele o tagata o lo latou aiga sa mama’i tigaina.

Au Paia, 1:405

Sa ma’i foi Polika Iaga, ma sa matitiva lona aiga. Ae sa fai atu le toalua o Polika, o Mary Ann, ia te ia, “Alu e faataunuu lau misiona, ma o le a faamanuia oe e le Alii.”

Au Paia, 1:404–5

Sa amata ona alu Polika, ae e oo ane i le taimi na ia taunuu atu ai i le fale o Heber, sa matuai vaivai lava o ia ma sa le mafai ona ia savali. Sa nofo o ia faatasi ma le aiga o Heber mo ni nai aso.

Au Paia, 1:405

Na sau Mary Ann e tausi Polika seia oo ina malolosi i laua ma Heber e malaga. Sa matuai vaivai lava i laua, ae sa la mananao e talai atu le talalelei.

Au Paia, 1:405

Sa faatofa atu Heber ma Polika i a laua avā ma feosofi i tua o se taavale solofanua. Sa la lagona le faanoanoa i le tuua o o la aiga ua matua mama’i ma matitiva. A o alu ese atu le taavale solofanua, sa fai atu Heber ia Polika, “E fai lava si faigata o lenei mea.” Sa manao o ia e fesoasoani i o la aiga ia lagona le lototetele. Sa fai atu Heber i le avetaavale solofanua e taofi.

Au Paia, 1:405–6

Mai totonu o le fale, na faalogoina ai e Vilate se pa’ō. Sa sau o ia i le faitotoa, lea sa tu ai Mary Ann. Sa la vaaia Heber ma Polika o tutu i tua o le taavale solofanua, ao talotalo atu o laua pulou i le ea ma alalaga mai, “Malo! Malo! Malo mo Isaraelu!” Sa tali mai fafine, “Tofa! Ia faamanuia le Atua ia te oulua.”

Au Paia, 1:406

Ina ua mavae se malaga umi i le sami, sa taunuu Heber ma Polika i Peretania Tele. Faatasi ai ma isi Aposetolo, sa latou aoao atu le toatele o tagata e uiga ia Iesu Keriso ma Lana talalelei. E faitau afe tagata na papatiso ma auai i le Ekalesia.

Au Paia, 1:408–11

O le toatele o tagata o e na papatiso i Peretania Tele na siitia atu i Navu e fesoasoani i le fausiaina o le aai ma le malumalu. Sa tausia e le Alii Lana folafolaga e tausia aiga o Heber ma Polika a o laua auauna atu ia te Ia o ni faifeautalai.

Au Paia, 1:437–39