O Le Penina Tau Tele

I se tasi aso, na sau ai se tamāloa i Katelani ma ni mami mai Aikupito. Sa i ai faatasi ma mami ni tusi tā’ai, po o ni taaiga pepa tuai. Sa i ai i tusi tā’ai ia tusitusiga faa-Aikupito. Sa faaali atu e le tamaloa i le Perofeta o Iosefa Samita. Sa matuai fiafia lava Iosefa i tusitusiga.

Au Paia, 1:219–20

Sa fesoasoani nisi o uo ia Iosefa e faatau mai mami ma tusi tā’ai. A o suesueina e Iosefa ia tusitusiga, sa faaali atu e le Alii ia te ia tusitusiga anamua mai ia Aperaamo, o se perofeta i le Tusi Paia. Faatasi ai ma le fesoasoani mai uo e pei o Oliva Kaotui, na tusia ai e Iosefa mea na aoaoina ai o ia e le Alii e uiga i aoaoga a Aperaamo.

Au Paia, 1:220

Sa vaai Aperaamo i se faaaliga vaaia o lo tatou olaga faatasi ma le Tama Faalelagi ae tatou te le’i fananau mai. Sa ia vaaia ua filifilia Iesu e avea ma o tatou Faaola. Na aoao foi Aperaamo e uiga i le foafoaga o le lalolagi. Sa fiafia le Au Paia i le mauaina o nei aoaoga mai ia Aperaamo. Sa latou fiafia ona sa finagalo le Alii e aoao atili i latou.

Aperaamo 2:6–11; 3–5; Au Paia, 1:220

Na avea tusitusiga a Aperaamo ma se vaega o se tusi o tusitusiga paia e ta’ua o le Penina Tau Tele. O loo i ai foi i lenei tusi tusitusiga mai ia Mose, o se isi perofeta i le Tusi Paia. O loo aoao mai ai upumoni o loo misi mai le Tusi Paia. Sa finagalo le Alii ia iloa e tagata nei upumoni, o lea na Ia faasoaina atu ai ia Iosefa Samita.

Mose 1–8; Aperaamo 1–5

O le Penina Tau Tele o loo i ai foi le molimau a Iosefa Samita ma Mataupu Faavae e 13 o le Faatuatua. Na tusia e Iosefa Samita nei mea e ta’u atu ai i le lalolagi mea e talitonu i ai le Au Paia o Aso e Gata Ai. O le Penina Tau Tele o se tusi laitiiti, e pei o se penina e laitiiti, ae e taua tele.

Iosefa Samita—Talafaasolopito; Mataupu Faavae o le Faatuatua 1