O Le Aiga o Siakisone

Ina ua uma ona o atu le vaega muamua o le Au Paia i le Vanu o Sate Leki, sa o atu foi le faitau afe o isi Au Paia. Sa latou malaga i se auala mamao, ma sa fesoasoani le Alii ia i latou. O se tasi o aiga na faia le malaga o le aiga o Siakisone. Sa latou tuua lo latou aiga i Egelani ma sa fiafia e o e fesoasoani i le Au Paia e fausia Siona.

Mataupu Faavae ma Feagaiga 136:1–11; Au Paia, 2:222–23

Na sopoia e le au Siakisone le vasa i se va’a. Ona latou o lea i se nofoaafi o se vaega o le ala e agai atu i le Vanu o Sate Leki. Sa tatau lea ona latou savavali i le vaega o totoe o le ala.

Au Paia, 2:222–23

Sa latou faia se tamai taavaletosolima e ave ai a latou meaai, lavalava, ma isi mea sa latou mananao e aumai. E toatele le Au Paia na taunuu saogalemu atu i le vanu i lenei auala.

Au Paia, 2:223–26

Sa tosoina e Elisapeta ma Arona Siakisone le la taavaletosolima mamafa. Sa savavali le la fanau, o Mareta, Maria, ma Arona le Itiiti. O se galuega faigata. Sa latou faamoemoe e taunuu i le vanu a o lei oo i le taumalulu. Ae ina ua oo mai le tau e to’ulu ai lau o laau, sa umi pea lava le ala e alu ai. Sa amata ona malulu, ma ua leai ni a latou meaai.

Au Paia, 2:223–26, 229, 231–32

I le Aai o Sate Leki, na iloa ai e Polika Iaga e uiga i le Au Paia o e na o mai i le vanu. Sa popole o ia ia i latou. O le aso na sosoo ai i le lotu, sa ia ta’u atu ai i tagata uma, o loo i ai nei Au Paia i faigata. Sa ia fai atu ia i latou e faatumu taavale solofanua i mea o le a manaomia e le Au Paia. “O atu ma aumai na tagata,” o lana tala lea.

Au Paia, 2:229–30

Sa aveese e tamaitai sa i ai i le sauniga o latou totini mafanafana ma tuu i totonu o taavale solofanua. O isi na tuuina atu a latou meaai, palanikeke, seevae, ma lavalava. I le lua aso mulimuli ane, e silia ma le 50 alii ma taavale solofanua e 20 na tuua le vanu e o atu e fesoasoani.

Au Paia, 2:230

A o faaauau pea ona savavali le aiga o Siakisone, sa amata ona toulu le kiona. Sa ma’i tigaina Arona. Sa faigata ia te ia ona savali. Sa manaomia e le Au Paia ona sopoia se vaitafe malulu, ma o lenei mea na atili ai ona vaivai Arona. O le po lenā na maliu ai Arona. O le mea e faanoanoa ai, o lona aiga sa tatau pea ona faaauau le malaga e aunoa ma ia.

Au Paia, 2:232–34

O le taeao na sosoo ai, sa i ai nisi kiona sili atu i luga o le eleele. Sa tulei ma tosoina e le aiga o Siakisone ma isi Au Paia a latou taavaletosolima i le kiona. Sa latou tatalo i aso uma ina ia fesoasoani mai le Atua ia i latou.

Mataupu Faavae ma Feagaiga 136:29; Au Paia, 2:234–35

I se tasi po, sa popole Elisapeta mo lana fanau. Sa fiaaai ma ma’alilili i latou. Pe o le a latou oo atu i le Vanu o Sate Leki? Sa moe o ia ma miti ai ua ia va’ai atu iā Arona. Sa ia fai mai, “Elisapeta, ia e fiafia.” Sa ia ta’u atu ia te ia o le a oo mai le fesoasoani.

Au Paia, 2:235–36

Na sa’o lava Arona. E lei umi ae taunuu mai alii mai Sate Leki ma a latou taavale solofanua. Sa latou tuuina atu i le Au Paia meaai ma lavalava. Sa patipati ma talie le Au Paia ma fusi ia alii. Sa latou usuina se viiga ma faafetai atu i le Tama Faalelagi mo le taliina o a latou tatalo.

Mataupu Faavae ma Feagaiga 136:28; Au Paia, 2:236

Latou taunuu atu i le vanu, ua Aso Sa. Sa ta’u atu e Polika Iaga i tagata o le Ekalesia i le Aai o Sate Leki e faapea, nai lo le o i le lotu, e tatau ona latou o e faafeiloai le Au Paia o e na taunuu mai. Sa latou faafeiloaia le Au Paia ma’alilili ma lelavava, ma valaaulia i latou e nonofo i o latou fale.

Au Paia, 2:239–40