Ua Osofaia Iosefa ma Sini

Sa fiafia nisi o tagata i mea sa aoao atu e Iosefa Samita e uiga i le Tama Faalelagi, Iesu Keriso, ma le lagi. Ae sa le fiafia isi tagata i mea sa ia aoaoina atu. Sa feita nisi o i latou ma mananao e taofi Iosefa mai le aoao atu.

Mataupu Faavae ma Feagaiga 76; Au Paia, 1:149–50

I se tasi po, sa ala ai lava Iosefa i le leva o le po e fesoasoani ia Ema i le tausiga o se tasi o a la pepe masaga na vaetamaina. Sa ma’i tigaina le pepe.

Au Paia, 1:150

Sa ave e Ema le pepe ae fai atu ia Iosefa e malolo. Sa tatau ona ia tala’i i le taeao. Mulimuli ane, na momoe uma Iosefa ma Ema.

Au Paia, 1:150

Na faafuasei lava ona matala le faitotoa, ma tamomo’e atu se vaega o alii feita i totonu o le potu. Sa ee Ema a o tatoso mai e tamaloloa ia Iosefa i lima, vae, ma lauulu. Sa latou toso o ia i fafo o le fale.

Au Paia, 1:150–51

Sa taumafai Iosefa ia mamulu ese mai i tamaloloa, ae sa latou uumauina o ia. Na vaaia foi e Iosefa na toso mai foi e nei alii lana uo o Sini Rikitone mai lona fale.

Au Paia, 1:151

Sa sasae ese e alii lavalava o Iosefa ma sasaa atu le ta vevela, ma piipii i lona tino ma lona lauulu. Ona latou faasoo lea o lona tino i fulumanu ma sosola ese.

Au Paia, 1:152

Ina ua o ese atu nei alii, sa tautevateva atu Iosefa i le fale. Sa fefe Ema ina ua ia vaai ia Iosefa. Sa faalogo uo sa nonofo latalata ane i le mea na tupu ma faanatinati atu e o atu e fesoasoani. Sa salusalu e Ema le ta mai le pau o Iosefa. Mo le po atoa, sa fesoasoani ai Ema ma ana uo e tausi Iosefa ma Sini.

Mataupu Faavae ma Feagaiga 25:5; Au Paia, 1:153

O le aso na sosoo ai, sa [lagona] pea e Iosefa le tiga tele. Ae sa fai ona lavalava ma aoao atu i se vaega o tagata e uiga ia Iesu Keriso. O nisi o alii na osofaia o ia sa faalogologo ao aoao atu o ia. Mulimuli ane i lena aso, na papatisoina ai e Iosefa ni tagata se toatolu. Sa faaauau pea ona ia faia le galuega a le Alii, e tusa lava pe sa taumafai tagata e taofi o ia.

Mataupu Faavae ma Feagaiga 24:8; Au Paia, 1:153