O Le Aualofa

O tamaitai o Navu ua auauna atu i le Alii

O Margaret Cook ma Sarah Kimball o loo talanoa e uiga i le malumalu fou o loo fausia i Navu.

Sa nofo Margaret Cook i Navu. Sa faigaluega o ia mo Sarah Kimball, na fesoasoani ia te ia i le su’isu’i. A o galue o ia, sa la fiafia e talanoa e uiga i le malumalu fou o loo fausia i Navu. Sa la fiafia mo le malumalu.

Au Paia, 1:447

Na matauina e Margaret o loo ofuina e tagata faigaluega o le malumalu ni ofu tuai.

I se tasi aso, sa matauina ai e Margaret o le toatele o alii na fausiaina le malumalu sa i ai ni laei ua tuai ma masaesae. Sa ia mafaufau pe mafai ona la galulue faatasi ma Sarah e su’i ni ofutino fou mo alii. Sa fiafia Sarah i le manatu. Sa la talanoa ma Margaret i isi tamaitai e uiga i le faavaeina o se vaega e fesoasoani i le aufaigaluega.

Au Paia, 1:447–48

Sa feiloai Iosefa Samita ma Margaret, Sarah, ma isi e faatuina le Aualofa a le Ekalesia.

Na saunoa mai le Perofeta o Iosefa sa fiafia le Alii i lo latou manatu, ma sa i ai se mea e sili atu ona lelei mo i latou. Sa valaaulia e Iosefa ia tamaitai e feiloai ma ia i le aso 17 o Mati, 1842. O le faaaogaina o le pule o le perisitua, sa ia faatulagaina ai tamaitai o le Ekalesia. Sa latou filifili e faaigoa la latou vaega o le Aualofa a Tamaitai o Navu.

Au Paia, 1:448, 450–51

Sa talanoa Margaret ma ni tamaitai se toalua.

Sa talosagaina e Iosefa le Aualofa e fesoasoani i tagata ia saunia mo faamanuiaga o le malumalu ma le ola e faavavau. E tatau ona avea i latou ma faataitaiga o le mulimuli ia Iesu.

Au Paia, 1:451

O tagata o le Aualofa o loo aumaia meaai i se aiga e manaomia le fesoasoani.

Na saunoa foi Iosefa e tatau i le Aualofa ona saili tagata matitiva ma fesoasoani ia i latou. E oo lava i tamaitai matitiva sa mananao e fesoasoani i tagata e le tagolima.

Au Paia, 1:449

Na faatulagaina le Aualofa. Sa valaauina Ema Samita e avea ma peresitene. Sa ia valaauina ni fesoasoani se toalua, o Sarah Cleveland ma Ann Whitney. Sa ia valaauina foi i se failautusi, o Eliza R. Snow.

Au Paia, 1:450

O loo aoaoina e Ema ia tamaitai i le Aualofa.

Sa fesoasoani le Alii ia Ema e faataunuu lona valaauga. Sa aoao atu e Ema ia tamaitai e mafai ona latou faia ni mea tetele i le galuega a le Alii. Sa manao o ia ia i latou taitoatasi e saili ni auala e faia ai mea lelei. O le mea e sili ona taua, sa ia ta’u atu ia i latou, o le alofa lea i isi tagata e pei ona faia e Iesu. E toatele tamaitai i Navu na auai i le Aualofa.

Mataupu Faavae ma Feagaiga 25:3, 7; Au Paia, 1:451

O se ata o loo faaalia ai le auala na fesoasoani ai tamaitai i le Ekalesia i tagata i le lalolagi atoa.

Sa latou fesoasoani i tagata e saunia mo faamanuiaga o le malumalu ma fesoasoani i le tele o aiga o e sa manaomia le fesoasoani i Navu. Talu mai lena taimi, ua auai tamaitai i le lalolagi atoa i le Aualofa. O loo faaauau pea ona latou auauna atu i tagata ma fesoasoani ia i latou ia maua faamanuiaga o le malumalu.

Au Paia, 1:451