Maria ma Kalolaine Rollins

O Maria Rollins sa 12 tausaga le matua i le taimi muamua na asiasi atu ai faifeautalai i Katelani, Ohaio. Sa faalogo o ia o latou talanoa e uiga i le Tusi a Mamona. I lena taimi, sa na o le tasi lava le kopi o le tusi i Katelani, ma sa i ai i se taitai o le Ekalesia na igoa ia Isaako Morley.

Sa alu atu Maria i le fale o Uso Morley ma talosaga i ai se’i vaai i le tusi. Sa tuu atu e Uso Morley na te uuina [le tusi]. Sa fesili atu Maria pe mafai ona ia aveina i le fale.

Sa le’i manao Uso Morley e tuu atu ia Maria lana kopi o le tusi. E le’i tele se mea na ia faitauina. Sa augani atu Maria ia Uso Morley e tuu atu na te faanoia.

Sa ioe i ai Uso Morley. Sa ia fai atu e mafai e Maria ona ave le tusi i le fale pe afai e vave ona ia toe aumaia i le aso na sosoo ai. Sa faia e Maria e pei o se oa. Sa ala o ia i le leva o le po e faitau ai.

Ina ua toe faafoi atu e Maria le tusi, sa ofo Uso Morley i le tele o mea na ia faitauina. “Afafine,” na ia fai mai ai, “ave le tusi lea i le fale e [faitau] faauma. E mafai ona ou faatali”

O Maria o le tagata muamua lea i Katelani na faitauina atoa le Tusi a Mamona. E lei leva ona uma ona ia faitauina, ae feiloai o ia i le Perofeta o Iosefa Samita. Ina ua ia iloaina le fiafia tele o Maria i le Tusi a Mamona, sa ia fai atu e mafai ona tuu ma ia le kopi a Uso Morley. O le a ia tuuina atu ia Uso Morley se isi kopi.

Mulimuli ane i lena tausaga, na siitia atu ai Maria ma lona aiga i Initipene, Misuri. Sa fiafia o ia e matamata a o amata ona tuufaatasia e taitai o le Ekalesia se tusi fou e ta’ua o le Tusi o Poloaiga. O le a i ai i lenei tusi le tele o faaaliga na tuuina mai e Iesu Keriso ia Iosefa Samita.

Mataupu Faavae ma Feagaiga 67; 70:1–4; Au Paia, 1:178

Peitai, sa le’i fiafia nisi o tagata i Initipene i le Ekalesia. Sa latou mananao i le Au Paia e o ese. I se tasi aso, na osofaia ai e tagata feita le fale sa lolomiina ai le Tusi o Poloaiga. Sa latou togiina i fafo o le faamalama le masini lomitusi ma faasalalau solo itulau o le Tusi o Poloaiga i le alatele.

Au Paia, 1:177–78

Sa vaavaai mai Maria ma lona uso o Kalolaine mai tua o se pa. Sa fai atu Maria ia Kalolaine e manao e aumai itulau a o le’i faaleagaina. Sa fefe Kalolaine i tagata feita. “O le a latou fasiotia i ta’ua,” na ia fai atu ai. Ae na iloa e Maria ma Kalolaine o na itulau sa i ai i luga le upu a le Atua.

Au Paia, 1:178

Sa faatalitali le auso seia tilotilo ese ia tamaloloa. Ona la’ua tamomoe atu lea i le auala ma ao mai le tele o itulau sa mafai ona la maua. Sa la topetope ese mai, sa iloa atu i la’ua e nisi o tamaloloa ma fe’ei atu ia i la’ua e taofi. Sa u’umau e Maria ma Kalolaine ia itulau ma taufetuli i le saoasaoa sa la mafaia i se faatoaga sana lata ane.

Au Paia, 1:178–79

Sa tuli atu e ni tamaloloa se toalua le auso i totonu o le togasana. Sa matua uumi lava sana, sa le mafai e Maria ma Kalolaine ona iloa le mea sa la o i ai. Sa la faapau’u ifo i le eleele ma nana itulau i lalo o o la’ua tino. Sa la faalogologo filemu a o savavali solo nei tamaloloa e toalua i sana e su’e i la’ua.

Au Paia, 1:179

Sa le’i umi ae fiu nei alii. Sa saogalemu Maria ma Kalolaine. Sa laua sefeina itulau o faaaliga a le Alii mo le Tusi o Poloaiga. I aso nei o na faaaliga o loo i totonu o le Mataupu Faavae ma Feagaiga.

Au Paia, 1:179