Pale ma Faafetai Palate

O le faatuatua e mulimuli ai i le Agaga

O Pale Palate ma Faafetai Palate o ni faifaatoaga i Ohaio. I se tasi aso, na lagona ai e Pale le Agaga o fai atu ia te ia e tuua lona aiga ina ia aoao tagata e uiga i le Tusi Paia.

Au Paia, 1:92

Ua o ese atu Pale ma Faafetai e aoao atu e uiga i le Tusi Paia.

Na faatau ese atu e Pale ma Faafetai le la faatoaga. Sa la le iloa le mea o le a latou o i ai, ae sa la faatuatua o le a faamanuiaina i laua e le Atua mo le auauna atu ia te Ia.

Au Paia, 1:92

O Pale o loo alu ese mai le vaa i Niu Ioka.

Sa ave e Pale ma Faafetai ni lavalava ma ni tupe ma o atu i luga o se vaa. A o la malaga atu i Niu Ioka, sa ta’u atu e le Agaga ia Pale e alu ese mai le vaa. Sa talosaga atu Pale ia Faafetai e faaauau pea e aunoa ma ia. Sa ia folafola mai e toe foi vave mai ia te ia. Sa ia lagonaina e i ai se mea e finagalo le Atua ia te ia e fai i Niu Ioka.

Au Paia, 1:92

O Pale o loo aoao e uiga i le Tusi a Mamona.

Sa savali Pale i se ala umi. Na iu lava ina o’o o ia i le fale o se faife’au. Na ta’u atu e le faife’au ia Pale se tusi uiga ese na tuuina atu e se tasi ia te ia. Na sau mai papatusi auro ma na tusia i aso ua leva. Sa ta’ua o le Tusi a Mamona. Sa faaliliuina e se alii talavou i Niu Ioka i le mana o le Atua.

Au Paia, 1:92

Sa mauaina e Pale se molimau i le Tusi a Mamona.

Sa matuai fia iloa lava e Pale. Na faaali atu e le faife’au ia Pale le tusi. I le naunau fiafia, na tatala ai e Pale le tusi ma amata ona faitau. Na mavae ni itula, ae sa le mafai ona taofia lana faitau, e oo lava i le ‘ai pe moe. Na ta’u atu e le Agaga o le Alii ia te ia e moni.

Au Paia, 1:92–93

O Pale ma Ailama Samita o loo talanoa e uiga i le Tusi a Mamona.

Sa matuai fiafia lava Pale i le Tusi a Mamona, o lea sa manao ai e sue le tagata na faaliliuina. Sa savali atu o ia i le faatoaga a le aiga o Samita, lea na ia feiloai ai ia Ailama, le uso o Iosefa. Sa la talanoa i le po atoa. Sa ta’u atu e Ailama ia Pale o le Tusi a Mamona e moni. Sa ia tuuina atu ia Pale lana lava kopi o le tusi.

Au Paia, 1:93

O Pale o loo faaauau pea ona faitau le Tusi a Mamona.

A o ia faitau pea, sa iloa e Pale sa asiasi atu Iesu Keriso i tagata i Amerika i aso ua leva. Sa mafai ona iloa e Pale e sili atu le tāua o le Tusi a Mamona nai lo oa uma o le lalolagi. Sa le mafai ona ia faatali e toe foi atu ia Faafetai ma faasoa atu ia te ia mea sa ia aoaoina.

Au Paia, 1:93; 3 Nifae 11:1–12

O Pale o loo faasoa atu le Tusi a Mamona ia Faafetai ma lona aiga.

Sa faamatala e Pale ia Faafetai ma isi tagata o lona aiga e uiga i le Tusi a Mamona. Sa ia ta’u atu ia i latou mea o loo aoao mai ai e uiga ia Iesu Keriso. Sa fiafia Faafetai ona sa mulimuli Pale i le Agaga ma maua ai le galuega na finagalo le Atua ia te ia e fai. E pei o Pale, na aoaoina e Faafetai mo ia lava e moni le Tusi a Mamona.

Au Paia, 1:98–99