Ua Faatulagaina Le Ekalesia a Iesu Keriso

“Ua Faatulagaina le Ekalesia a Iesu Keriso,” Tala o le Mataupu Faavae ma Feagaiga (2024)

“Ua Faatulagaina le Ekalesia a Iesu Keriso,” Tala o le Mataupu Faavae ma Feagaiga

Aperila 1830

2:37

Ua Faatulagaina Le Ekalesia a Iesu Keriso

O se sauniga fiafia a le Ekalesia

Ua faafeiloai e Iosefa Samita tagata i le fale o le ‘au Uitimera mo le uluai sauniga a le Ekalesia.

O le taimi lea ua lolomiina le Tusi a Mamona, ma ua toe i ai le mana o le perisitua a le Atua i le lalolagi. Sa ta’u atu e le Alii ia Iosefa Samita ua oo i le taimi e faatulaga ai le Ekalesia a Iesu Keriso.

Au Paia, 1:84

O tagata o loo si’i o latou lima e lagolago ai Iosefa ma Oliva o ni taitai o le Ekalesia.

I le aso 6 o Aperila, 1830, pe tusa ma le 40 tamaitai ma alii na omai i le fale o le aiga o Uitimera e faatulaga le Ekalesia. Na valaauina e le Alii ia Iosefa ma Oliva e taitai Lana Ekalesia. Sa talosagaina e Iosefa ma Oliva tagata e si’i o latou lima e faaali atu ai lo latou lagolagoina o i laua e fai ma o latou taitai.

Mataupu Faavae ma Feagaiga 20:1–3; Au Paia, 1:84

Sa fiafia tagata fou o le Ekalesia e aai ma feinu i le faamanatuga.

Na soso’o ai ma le faamanuiaina e Iosefa ma Oliva o le faamanatuga. Sa la tuuina atu i tagata e fesoasoani ai ia i latou e manatua Iesu Keriso. Ona tuu lea e Iosefa ma Oliva o la lima i luga o ulu o tagata o e na papatisoina. Sa o la faamauina i latou o ni tagata o le Ekalesia ma tuu atu ia i latou le meaalofa o le Agaga Paia.

Mataupu Faavae ma Feagaiga 20:75–79; Au Paia, 1:85

O lo o aoaoina e Iosefa tagata fou o le Ekalesia.

Na tuuina atu e le Alii ia Iosefa se savali mo le Ekalesia fou. Sa Ia faapea atu ia i laua e tusi i lalo mea na tutupu i le Ekalesia. Sa Ia fetalai mai o Iosefa Samita o Lana perofeta. Sa Ia folafola atu i tagata o le Ekalesia afai latou te mulimuli i poloaiga na Ia tuuina atu ia Iosefa, o le a Ia faamanuiaina i latou. O le a leai se mana o le tiapolo i luga o i latou.

Mataupu Faavae ma Feagaiga 21:1–6; Au Paia, 1:85

O Iosefa Samita ma lona tamā o loo fusi e le tasi le isi.

Sa matuai fiafia lava tagata i le i ai o le Ekalesia a Iesu Keriso! Ina ua mae’a le sauniga, sa toatele atu tagata na papatisoina, e aofia ai le tinā ma le tamā o Iosefa. Ina ua alu a’e lona tamā mai le vai, sa tuu atu e Iosefa ia te ia se opo tele . “Ua ou ola e vaai i lo’u tama ua papatisoina i le ekalesia moni a Iesu Keriso!” na ia saunoa ai.

Au Paia, 1:86

Sa lagona e Iosefa le loto faafetai tele e fesoasoani e toefuatai le Ekalesia.

Mulimuli ane i lena po, na alu ai Iosefa i le togavao ina ia na o ia. Sa tumu lona loto i le olioli. Ua 10 ai tausaga talu ona ia ulua’i vaai i le Tama Faalelagi ma Iesu Keriso. E tele naua mea na tutupu talu mai lena taimi. Sa matuai faafetai lava Iosefa i le mafai ona ia fesoasoani e toefuatai, pe toe aumai, le Ekalesia a Iesu Keriso!

Au Paia, 1:86