Ua Tuuina Atu e Iosefa ma Ailama o La Ola mo le Talalelei

Na popole Iosefa Samita. O le a le mea o le a tupu i le Ekalesia pe afai e maliu o ia? Sa manao o ia ia mautinoa o le a faaauau pea le galuega a le Alii. O lea sa ia faapotopoto ai Aposetolo ma tuu atu ia i latou ki o le perisitua na tuuina atu e Iesu Keriso ia te ia. O lona uiga e mafai e Aposetolo ona taitaia le Ekalesia a le Alii ma faia Lana galuega. Na fesoasoani lenei mea ia Iosefa e maua ai se lagona lelei.

Au Paia, 1:519–20

Ae sa to’atele tagata na feita iā Iosefa. Sa mananao foi nisi e fasioti o ia. Latou te le’i fiafia i mea na ia a’oa’oina. Sa latou tusia e uiga ia te ia i se nusipepa ina ia feita ai le toatele o tagata ia Iosefa ma le Ekalesia. O nisi o i latou sa mananao e osofaia Navu.

Au Paia, 1:526–28, 530–32, 533–34

Sa faaleaga e Iosefa ma isi taitai i Navu le masini lomitusi ina ia taofia ai le salalau atu o le inoino. O lenei mea na atili ai ona feita tagata. Sa ta’u atu e le kovana ia Iosefa e alu i le aai o Karefasi ina ia mafai e se faamasino ona filifili pe na ia solia le tulafono. Sa iloa e Iosefa afai e alu o ia i Karefasi, o le a fasiotia o ia e tagata.

Mataupu Faavae ma Feagaiga 135:4; Au Paia, 1:533–37, 539–41

Ae sa manao foi Iosefa ia saogalemu le Au Paia. Afai e alu o ia i Karefasi, atonu o le a tuu saoloto ai e tagata le Au Paia i Navu. Sa tonu ia Iosefa e alu. Sa ia faamanuia ia Ema ma lana fanau, sogi faatofa atu ia i latou, ma malaga atu i Karefasi.

Au Paia, 1:542–44

Sa la o faatasi ma Ailama le uso o Iosefa. Sa faapena foi Ioane Teila, Uiliata Risati, ma isi uo. A o latou o ese, sa taofi e Iosefa lana solofanua ma toe tilotilo atu i Navu. “O le nofoaga sili lenei ona matagofie ma tagata sili ona lelei i lalo o le lagi,” o lana tala lea.

Au Paia, 1:543–45

Ina ua latou taunuu i Karefasi, sa tuuina i latou i le falepuipui. A o i ai i latou i le falepuipui, sa faitau atu e Ailama ia i latou le Tusi a Mamona. Sa ta’u atu e Iosefa i leoleo e moni le Tusi a Mamona.

Au Paia, 1:546

Ina ia faamafanafana i ana uo, sa usuina ai e Ioane Teila se viiga e uiga ia Iesu. Sa matagofie, ma sa fai atu Ailama ia te ia e toe usu.

Au Paia, 1:549

Mulimuli ane i lena aso, na faanatinati atu ai tagata feita ma fana i totonu o le falepuipui. Sa latou tulei atu i le faitotoa ma amata ona tafana atu i totonu o le potu sa i ai Iosefa ma ana uo. Sa matua manu’a lava Ioane Teila. Sa fasiotia Ailama ma Iosefa.

Mataupu Faavae ma Feagaiga 135:1–2; Au Paia, 1:550–52

Sa matuai faanoanoa lava le Au Paia ina ua latou iloa ua maliliu Iosefa ma Ailama. Ae sa latou iloa o le fasiotia o le Perofeta o le a le taofia ai le Ekalesia. O le Ekalesia a le Faaola, ma o le a faaauau pea ona Ia taitaia. O le a faaauau pea ona tuputupu a’e le Ekalesia ma faamanuiaina ai fanau a le Atua i le lalolagi atoa.

Au Paia, 1:553–59