Faaipoipoga e Faavavau ma Aiga

Ina ua faaipoipo Ema ma Iosefa, sa la talitonu o le a muta le la faaipoipoga pe a la feoti. Na faapena faaipoipoga uma. Ona ta’u atu lea e le Alii ia Iosefa o faaipoipoga ma aiga e mafai ona tumau e faavavau.

Au Paia, 1:413

Na aoao mai e le Alii ia Iosefa e uiga i le faaipoipoga e faavavau. E ala i le mana o le perisitua, e mafai ai e se alii ma se tamaitai ona osia se feagaiga ma le Alii. Afai la te tausia la laua feagaiga, ua folafola mai e le Alii o le a tumau e faavavau le la faaipoipoga. Ua ta‘ua lenei mea o le faamauina. E lei umi, ae faamauina Iosefa ma Ema mo le faavavau.

Mataupu Faavae ma Feagaiga 132:7, 19–24; Au Paia, 1:413, 432–33, 481–82, 492, 502–3

Sa aoaoina foi e Iosefa e faapea, pe a faamauina se alii ma se tamaitai, o le a faamauina le la fanau ia i laua. Ona o le mana o Iesu Keriso, na mafai ai e lo latou aiga ona tumau e faavavau. Ina ua ta’u atu e Iosefa i le Au Paia e uiga i lenei faamanuiaga, sa matuai fiafia lava i latou! Sa le mafai ona latou faatali e faamauina faatasi.

Mataupu Faavae ma Feagaiga 131:2; 132:6–7; Au Paia, 1:492–93, 580

Na aoao mai mulimuli ane le Alii e tatau ona faia faamauga i totonu o le malumalu. Sa galulue malosi le Au Paia e faamaea le malumalu i Navu ina ia mafai ona faamauina faatasi i latou. Ina ua saunia le malumalu, sa faamauina le tele o aiga. Sa oo lava ina faamauina i latou i tagata o le aiga o e ua maliliu. Sa latou faafetai mo lenei faamanuiaga!

Au Paia, 1:579–80