Fausiaina o le Malumalu o Katelani

Sa ta’u atu e le Alii ia Iosefa Samita ua oo i le taimi mo le Au Paia e fausia ai se fale faapitoa i Katelani. O le fale lenei o le a avea ma se malumalu, o se nofoaga o le a asiasi atu ai le Alii i Lona nuu ma faia ni folafolaga ma i latou. O le a Ia tuuina atu ia i latou se meaalofa faapitoa i Lona malumalu. Sa ia ta’ua le meaalofa o se faaeega paia o le mana.

Mataupu Faavae ma Feagaiga 88:119; 95:8; Au Paia, 1:205

Sa lei amata vave ona fausia e le Au Paia le malumalu. I ni nai masina mulimuli ane, na faamanatu atu ai e le Alii ia i latou e taua tele le malumalu. Sa tamoe atu Ailama Samita i le fale o ona matua e ao mai meafaigaluega. Ina ua fesili atu lona tina ia te ia po o fea e alu i ai, sa ia fai atu e manao e avea o ia ma tagata muamua e galue i le maota o le Alii.

Mataupu Faavae ma Feagaiga 95:1–8

Sa amata ona fausia e le Au Paia i Katelani le malumalu. Sa taugata tele ma sa tele ni galuega na alu ai. Sa tuuina atu e tagata o le Ekalesia e pei o Sini Rikitone le tele o tupe e fausia ai le malumalu. Sa latou fiafia e mulimuli i poloaiga a le Alii ma maua Ana faamanuiaga i Lona fale.

Au Paia, 1:209–211

A o galulue le Au Paia i le malumalu, sa amata ona leai ni a latou tupe. Sa popole Sini ma isi taitai o le Ekalesia. Sa tatalo Sini i le Atua mo se fesoasoani.

Au Paia, 1:210–11

Sa sefeina e se tagata o le Ekalesia e igoa ia Caroline Tippets ma lona aiga ni tupe se tele. Sa faataga e Caroline le Ekalesia e nono a latou tupe e fesoasoani ai e fausia le malumalu.

Au Paia, 1:211–13

E toatele le Au Paia i Katelani sa galulue malosi e fausia le malumalu. O nisi sa aveina taavale solofanua sa tumu i maa i le malumalu. O isi na faia lavalava ma meaai mo le aufaigaluega. O tamaiti sa aoina fasi tioata ta’ei e nuti ma tuu i luga o puipui o le malumalu ina ia feilafi ma susulu i le susulu o le la.

Au Paia, 1:210, 219, 221

Sa lei leva ae mae’a le malumalu! Sa fiafia le Au Paia e o atu i le maota o le Alii e maua faamanuiaga na Ia folafola atu ia i latou.

Au Paia, 1:221