A re Sioning a Mesa Tiberberek el Babier ra Mormon

Joseph, Emma, me a Oliver a melemolm el oleiuid a ikal tiberberek el kolt ra blirir a reua Smith el ngara Pennsylvania. Ngdi rechad er tial beluu ngarngii a mle sorir el merrob er tir. Oliver a mla rengii a sechelil el ngklel a David Whitmer e mle kiei er a New York. Oliver a ulengit er a David alsekum meng sebechir elmo kiei lobengterir a telungalk er a Whitmer mel rekir tial loleiuid.

Santo, 1:68

David me a telungalk er ngii a kongei. Te outkeu er a Joseph, Emma, me a Oliver el mera blirir. Chelechang eng sebecherir el oureror er tial loleiuid el ngara budech. Te mle betok el chad el kileie er a blirir a reua Whitmer. Ng mle belkul a kmo ng mle betok a ureor el ketmekiil, tokuni a delal a David er a, Mary.

Santo, 1:68–70

A tara klebesei, me loureor a Mary, ea anghel Moroni a mlo duum er ngii. Ng dilu el kmo ng medengei el dechelel a ureor a meruul er ngii meng mesaul a bedengel. Ng mle soal elmo melisiich er a klaumerang er ngii. Ng milkengii a tutuu e otobed a ikal tiberberek el kolt. Ng milisii a llel e ocholt er a Mary a ikel lechukl. Ng mle yaksok er a Mary el kmo ngmo mukngeltengat.

Santo, 1:70–71

Bebil ra rechad a dimlak loumerang el kmo a ikal tiberberek el kolt a merang. Joseph a ultirakl er a llechul a Rubak el diak lolecholt a ikal tiberberek el kolt el mora ngidil chad. A Rubak a dilul kmo Ngii a mo kongei ra lmuut el tedei el sioning el mes a ikal tiberberek el kolt. David Whitmer, Martin Harris, me a Oliver Cowdery oker er a Joseph el kmong sebechir el sioning. A Rubak a millekoi el sebecherir.

Doctrine me a Covenants 5:11–12; 17; Santo, 1:73

Joseph, Martin, Oliver, me a David a mlo er a oreomel. Te mlo tubareuach e ouderta er tir el olengit er a Dios mel sebechir el mes a ikal tiberberek el kolt, ngdi dimlak a dilubech.

Santo, 1:73

Martin Harris a milchesuar el kmo ngii ea uchul ma nglunguchir a dimlak el morenges. Martin a mlo er a cheroid, e tirkel bebil a millemolm el meluluuch.

Santo, 1:73

E ngii a merma duum a anghel el ngara medidiich el llomes. Ng ngulchotii e ra Oliver me a David a ikal tiberberek el kolt me a ikel llechukl el blotk er ngii. Te rirengesii a ngeral a Dios el kmul kmo a Joseph a mla oieuid a ikal tiberberek el kolt lokiu a klisichel a Dios e a ikel loiedel a melemalt. A Dios a dirrek el melekoi el tir a kirir el mesubed ra re bek el chad er a ikel blal ues me a renges.

“The Testimony of Three Witnesses”; Santo, 1:73–74

Joseph a mlo osiik er a Martin. Ng direke meluluuch. Joseph a meluluuch el obengkel. E ngii a dumeang a anghel e ocholt a ikal tiberberek el kolt el mora Martin, eldi uai sera le bora Oliver me a David.

Santo, 1:74

Eng, mocha Joseph el mosiik er a rechad er a blil, le te mlo oldingel er a Mary Whitmer. Ng milekoi er tir el kmo ng kmal dmeu a renguk el ngarngii a re bebil er a rechad el mla mes a ikal tiberberek el kolt. Chelechang e tirkal sioning a mo sebecherir louchais e a rechad el kmo a Joseph a milekoi a klemerang el tekoi. Martin a millekoi ra re bek el chad el kmal dmeu a rengul el Dios a milecherei meng tara sioning.

Santo, 1:74–75

Telal klebesei ruriul, ea Rubak a diluu er a Joseph me locholt a ikal tiberberek el kolt el mora lmuut el teai er a rechad—a demal, terung er a rodam er ngii, teuang er a rodam er a David, me a ongismechel a David. Te mlo reked a ikal tiberberek el kolt e ulemiis a llel. Te mle medengei el likal tiberberek el kolt a merang.

“The Testimony of Eight Witnesses”; Santo, 1:75

A Babier er a Mormon el mloieuid a mlamo merek. A Joseph a ngilai a ikal tiberberek el kolt el lmuut al msang a anghel Moroni. E chelechang mlamo taem el meluches a llecheklel tial babier ma re bek el chad bol chieuii e losuub el mengai elmo medengelii a Jesus Kristo.

Santo, 1:75–76

Ng kmal mle klou el udoud a milechoit er a omelchesel a Babier er a Mormon. A Martin Harris a ulterur a tedobech er a sersel elmo harau er ngii. Ng miruul er tiang le ngii el medengei el Babier er a Mormon a klemerang. A bek el llecheklel tial babier a lechukl er ngii sel klaumerang er a Martin me a rebebil er a re sioning me a bek el chad bo longuiu. Tirkal sioning a dimlak a tal lolubet a bedengir er a ikal klaumerang er tir.

Doctrine me a Covenants 19:26–27, 34–35; Santo, 1:76–78