Luka 22; Ioane 18

Ina ia aoao atili e uiga i le taua o le Talisuaga Mulimuli, mafaufau e suesueina faamaumauga nei:

• “Mataio 26:17–30. O le a le so’otaga i le va o le Paseka ma le faamanatuga?”

• “Mataio 26:26–28. O le a le mea e faatusatusa i ai le faatusa o le areto ma le uaina?”

• “Mataio 26:27–29. Na faapefea ona faatusa le toto o le Faaola i se feagaiga fou?”

I taimi o le Feagaiga Fou, sa seleseleina ai ‘au o saito ma tuufaatasia i ni fusisaito, po o ni faaputuga. O fusi saito sa faata’atiia mafolafola i luga o se fola malō ma olopalaina i mea mamafa (solia) se’ia o’o ina tuueseese fatu mai ufiufi pito i fafo, po o pa’u.

Sa le mafai ona ‘ai ia pa’u ma sa manatu i ai o ni vao—o se mea e leai se aoga. I se aso matagi, e togi i luga fatu ma le pa’usaito i le ea i se tui vilivili. O fatu mamafa o le a pauu i le eleele, ma o le a lelea ese le pa’usaito mama. (Tagai foi i le “Mataio 3:12. O le a le uiga o le fasifuaitau “o i lona aao lana asu”?”)

Sa faaaoga e Iesu le faatusa o le tuueseeseina o fatu saito mai le pa’u e lapataia ai Peteru i le manao o Satani e faaumatia o ia. Sa fetalai atu Iesu ia Peteru, “Ua manao tele Satani ia te outou, ia lulu ia te outou pei o le saito.” O le soanauna Eleni ua faaliliuina o le “outou” o le numera tele. I lenei fuaiupu, na aoao mai ai Iesu e manao Satani e faaumatia so’o uma o le Faaola, e le na o Peteru. Na aoao mai Elder Ulisses Soares e faapea, o le faamamaina e pei o le saito o lona uiga “o le aveesea o lo tatou gafatia e uunaia ai le lalolagi mo le lelei.”

I le Faatoaga o Ketesemane, na amata ai e le Faaola Ona puapuaga mo agasala a tagata uma. O le Faatoaga o Ketesemane o se togavao o laau olive. O lenei faatoaga o se nofoaga sa masani ona asiasi i ai le Faaola. Sa i ai i le itu i sisifo o le Mauga o Olive, i fafo atu o pa o Ierusalema.

“O le upu ketesemane o lona uiga o le ‘soliga olive.’” I le taimi o le Faaola, sa faia le suauu olive e ala i le faataavale muamua o se maa tele i luga o olive e olopalaina ai. O olive olopalaina sa ta’ua o le “mash.”

Ona tuu lea o le masi i totonu o ato vaivai, ua faa’o’ō lona lalagaina. Sa faaaogā se soliolive e tu’u ai se faamamafa malosi i luga o olive i totonu o nei ato. A’o faamamafa le soliolive i lunga o olive, sa mumu le suauu i le amataga.

O le faiga na fa’aaogaina e fai ai le suauu olive e mafai ona fesoasoani ia i tatou ia malamalama ai i le taulaga togiola a le Faaola. Na aoao mai Peresitene Russell M. Nelson: “O Keriso i le Faatoaga i Ketesemane sa taomia moni lava i lalo i le mamafa o agasala a le lalolagi. Sa Ia afu tele i alualutoto—o ‘suauu’ o lona soifua—ia na sau mai i pu afu uma lava. [Tagai i le Luka 22:44; Mataupu Faavae ma Feagaiga 19:18.] …

“E pei lava o le tino o le olive, lea sa oomiina mo le suauu na aumaia le malamalama, e faapena foi ona taomia le Faaola. Mai pu afu uma na puna mai ai le toto ola o lo tatou Togiola.”

O Evagelia e tolu o loo tuuina mai ai nisi o faamatalaga auiliili o le auala na puapuagatia ai le Faaola i Ketesemane. Mai mau o le Toefuataiga, ua tatou aoao ai ni mafuaaga taua na mafua ai ona mafatia le Faaola. Na aoao mai le Tupu o Peniamina e faapea, na afutoto Iesu mai puafu uma ona o Lona “tiga tele i amioleaga ma mea inosia a lona nuu.” Na faamalamalama mai e le Faaola na Ia puapuagatia ina ia mafai ona tatou salamo i a tatou agasala. Na faamalamalama mai e Alema na puapuagatia Keriso e le gata ina ia laveaiina i tatou mai le agasala ae faapea foi “e fesoasoani i lona nuu e tusa ma o latou vaivaiga.”

O le ipu na faasino i ai le Faaola ua faatusa i mafatiaga na Ia oo i ai i le taimi o Lana Togiola. Ina ua puapuagatia Iesu Keriso mo a tatou agasala i Ketesemane, sa Ia tatalo i le Tamā Faalelagi, “A e finagalo i ai, ia e aveese lenei ipu ia te au; a e aua le faia lo’u loto, a o lou finagalo.” I le taimi o Lona pue faapagotaina, na fetalai atu ai Iesu ia Peteru, “Ou te le inu ea i le ipu ua au mai ia te a’u e lo’u Tamā?” Ina ua mavae le maliu ma le Toetu o Iesu, sa faasino atu e Iesu o Ona puapuaga ua o se inu lea mai se “ipu oona.” I le saunoa ai e uiga i le tigā na oo i le Faaola i Ketesemane, na saunoa ai Elder Bruce R. McConkie: “Ua tatou iloa na Ia afu tele [tatafe tele] o Ie toto mai pu afu uma a o Ia faamaligiina ‘alu o lena ipu oona na tuuina atu e Lona Tamā ia te Ia.

“Ua tatou iloa sa puapuagatia o Ia, i le tino ma le agaga, e sili atu nai lo mea e mafai ona puapuaga ai le tagata, sei vagana ai e oo i le oti.

“Ua tatou iloa i se isi itu, e le mafai ona tatou malamalama i ai, o Ona puapuaga na faamalieina ai manaoga o le faamasinoga tonu, faasaolotoina ai tagata salamo mai tigā ma faasalaga o le agasala, ma mafai ai ona maua le alofa mutimutivale e i latou o e talitonu i lona suafa paia.

“Ua tatou iloa sa faō o Ia i luga o le eleele ona o tigā ma mafatiaga o se avega e le mafuatia lea na mafua ai ona gatete o Ia ma na toetoe a le mafai ona Ia inuina le ipu oona.”

O Luka ua na o le pau lea o le tusitala o le Evagelia na faamaumauina o mafatiaga o le Faaola na aofia ai “mataua toto tetele ua paū ifo.” Sa faamautinoa mai e le Faaola le moni o lenei mea i tusitusiga paia o aso e gata ai: “O le mafatia lea na oo ia te a’u lava, o le Atua lava lea, o lē ua silisili i tagata uma, le gatete ona o le tiga, ma afu toto ai i pu afu ninii uma.”

Ina ua fai mai taitai Iutaia o loo latou sailia Iesu le Nasareta, sa tali atu Iesu, “O a’u lenei.” “O A’u” o se faalagiga ma se suafa o Iesu. Sa faaaoga e Iesu le faalagiga “O A’u” i le tele o taimi i Lana galuega. Semanu e malamalama tagata Iutaia i lenei faalagiga o se tautinoga o le paia o Keriso.

O Kaiafa o le faitaulaga sili mo le malumalu o Ierusalema i le taimi o le galuega a le Faaola. O ona tiutetauave na aofia ai le vaavaaia o sauniga o le malumalu ma le puleaina o le faleteuoloa o le malumalu. Sa mauoa ma lauiloa o ia. Sa ia manatu o le faamamāina e Iesu o lotoā o le malumalu o se lu’i i lana pule. Ina ua toe faatūina mai e Iesu Lasalo, na ta’ua e Kaiafa e tatau ona fasiotia Iesu.

O Kaiafa o le atalii faaletulafono o se faitaulaga sili sa i ai muamua, o Ana. O punaoa faasolopito o loo faamatalaina ai le aiga o Ana i tulaga o le pule ma faatosinaga. O i laua uma o Satukaio. I le tele o senituri, na leaga ai le tulaga o le ositaulaga sili. Nai lo le avea ma se tofi o le perisitua e faavae i le gafa, na avea ma se tofiga faapolokiki. I le avea ai ma ositaulaga sili, sa pulefaamalumalu ai Kaiafa i le Saniterini lea na faamasinoina ma su’esu’eina Iesu. E na o le Evagelia a Ioane o loo ta’ua ai na tula’i foi Iesu i luma o Ana.

Na vaevaeina le Emepaea o Roma i itumalo sa pulea e se faamasino. O Ponotio Pilato o le ta’ita’i Roma lea na pulea Iutaia mai le 26 TA. e oo i le 36. E lei leva ona i ai i le tofi, ae na ia faatupuina le ita i le tele o tagata Iutaia e ala i le aumaia i Ierusalema o tagavai o lo’o iai ata o le emeperoa o Roma i o latou luga. Na manatu tagata Iutaia o nei faatusa o le emeperoa o le ifo i tupua. Na faatonuina fo’i e Pilato le fasiotia o nisi o tagata Kalilaia.

Sa tautino atu e taitai Iutaia ua tausalaina Iesu i le upuleaga ma sa mananao e fa’aoo le oti ia te Ia. Peitai, sa latou feagai ma le tele o faalavelave: (1) i lalo o le pulega a Roma, sa le’i i ai i tagata Iutaia le pule e fasioti ai se tasi; (2) o tagata Roma, o e na mafai ona fasiotia se tasi, sa le’i iloaina le solitulafono a Iutaia o le upuleaga; ma (3) ona o le uunaiga a Iesu Keriso, sa fefefe ai taitai Iutaia e ono i ai se fetauaiga pe afai latou te tausalaina faalauaitele o Ia i le oti.

Sa manaomia e taitai Iutaia le fesoasoani a Roma e fasioti ai Iesu Keriso. O lea na latou aumaia ai Iesu i le faamasino Roma, o Pilato. Sa latou mananao ia te ia e saili se mea e molia ai le Faaola e faasalaina ai i le oti. Ona foliga mai ai lea i tagata o Roma na nafa ma le fasiotia o Iesu, ae lē o ta’ita’i Iutaia.

A o faailoa atu e le aufaitaulaga sili Iesu o se tagata solitulafono, e le o manino atoatoa mai i Evagelia po o le a le solitulafono na molia ai Iesu. Ae peitai, o loo faamaumauina i tala o Evagelia e faapea, o le fesiligia e Pilato o Iesu sa taulai atu i le pe na Ia manatu o Ia lava o se tupu. E le gata i lea, o se tu masani le tuu o se faailoga i luga a’e o se tagata na faasatauroina e faaali atu ai le “tu’ua’iga” e faasaga ia te ia. O le faailoga na tuu e Pilato i luga a’e o le satauro o le Faaola e faitauina “O Iesu le Nasareta o le Tupu o Tagata Iutaia.” E foliga mai na fasiotia Iesu ona o le moliaga o le fouvale, po o gaoioiga e faasaga i le emeperoa po o le malo. (Tagai i le “Mataio 26:59–68. O le a le mea sa tulagaese e uiga i le moliaga o le upuleaga?”)

• Bruce R. McConkie, “Le Mana Faamama o Ketesemane ,” Liahona, Ape. 2011, 56–59

• Jeffrey R. Holland, “O le Togiola a Iesu Keriso,” Liahona, Mat. 2008, 32–38

• Tad R. Callister, “O le Togiola a Iesu Keriso,” Liahona, Me 2019, 85-87

Mo nisi lauga e uiga i le Togiola a le Faaola, alu i le Gospel Library, Konafesi Aoao, Autu, “Togiola.”