Muhsahi Tempuhl Kirtland

Leum El fahk nuh sel Joseph Smith lah pacl fal nuh sin Mwet Luhlahlfongi in muhsaheack sie lohm yohk srihpac ah fin acn Kirtland. Lohm se inge e tempuhl se, acn se ma Leum Elac muhtwacta nuh yurin mwet Lal ac oraclah olwelah yohrohlos. Elac sang nuh selos mwe sang yohk srihpac se lin tempuhl Lal. El pahngon mwe sang se inge kuh luhn mwe sang muhtahl.

Doctrine and Covenants 88:119; 95:8; Mwet Luhlahlfongi, 1:205

Mwet Luhlahlfongi elos tiac ingyak na muhsahi tempuhl sac. Mahlwem ekahsr tok, Leum El ahkacsmakihnyaclos lah tempuhl uh arulacna yohk srihpac. Hyrum Smith el kahsruhsr ne lohm sin ninac pahpah tuhmwacl in oracni kuhfa. Ke ninac kiacl ah siyuck lah elac som ne oyac, el fahk muh el luhngse in el pa emet orekma ke lohm sin Leum.

Doctrine and Covenants 95:1–8

Mwet Luhlahlfongi fin acn Kirtland muhtwacwacack muhsahi tempuhl. Yohk mani totolac kac ac yohk orekma eneneyuck nuh kac. Mempucr ke Alu uh kain lal Sidney Rigdon el sang luhpah luhlahp ke mani in muhsahi tempuhl. Elos rahrahlac in uke masap luhn Leum ac eis mwe insewowo Lal in lohm Sel.

Mwet Luhlahlfongi, 1:209–211

Ke Mwet Luhlahlfongi orekma ke tempuhl, fahfahlac in wacngihnlac mani. Sidney ac kuhtuh mwet kol sahyac ke Alu uh elyahyak. Sidney el pruhe siyuck kahsruh sin God.

Mwet Luhlahlfongi, 1:210–11

Mempucr se ke Alu uh inel pa Caroline Tippets ac sucu lal sefiya mani na puhs. Carline el lwelah Alu uh in orekmakihn mani lalos kahsruh muhsahi tempuhl.

Mwet Luhlahlfongi, 1:211–13

Puhs Mwet Luhlahlfongi fin acn Kirtland orekma upac in muhsahi tempuhl. Kuhtuh pahtok wackohn nacnaclah ke yot nuh tempuhl. Kuhtuh oraclah nuknuk ac mongo nacn mwet orekma ah. Tuhlihk srihsrihk elos twelac kuhlahs muhsahlah in ip srihsrihkiyucki ac fihliyucki ke pihsinkacn tempuhl in muh kahlwem ac sahromrom ke faht ah.

Mwet Luhlahlfongi, 1:210, 219, 221

Tiac paht sahflah tempuhl! Mwet Luhlahlfongi elos rahrahlac in utyak nuh in lohm sin Leum ac eis mwe insewowo Leum El olwelah nuh selos.

Mwet Luhlahlfongi, 1:221