Camp luhn Israel

Mwet Luhlahlfongi ma muhta na Independence, Missouri, enenuh kahsruh. Eltahl orekma upac in muhsahelah Saion oacna ke God el tuh siyuck. Tuhsruhktuh kuhtuh mwet in acn sac tiac luhngse elos in muhta we. Eltahl oruh Mwet Luhlahlfongi ac som liki lohm selos ah.

Mwet Luhlahlfongi, 1:195

Joseph Smith el muhta Kirtland. El lohngwack ke ma sikyak nuh sin Mwet Luhlahlfongi fin acn Missouri, ac el suhpwacr. El pruhe in etuh lah meac elac oruh. Leum el fahk nuh sel Joseph elan sokwack mwet in weluhl som nuh Missouri. Eltahl finsraki muh kafuhrmacn ac kahsruh Mwet Luhlahlfongi ac fohlohkuhnwacng lohm seltahl ah.

Olweacng ac Wuhlweacng 103:1–2, 11–20, 30–34; Mwet Luhlahlfongi, 1:195–96

Apkuhran in mwet 100 sulaclah in weluhl. Mwet Pahluh el pahngon u se inge Camp luhn Israel. Eltahl kuhsrahsrahlac in som kahsruh Mwet Luhlahlfongi fin acn Missouri ac.

Mwet Luhlahlfongi, 1:197–99

Brigham Young ac kawuck lal Heber Kimball oasr ke u se inge. Sie mwet fuhsr pahngpahng Wilford Woodruf tuhkuh yen lwoeslac me liki acn New York in kahsruh.

Mwet Luhlahlfongi, 1:197–98

Mwet puhs weacng camp sac. Eltahl mahs ke mahlwem na fohn se ac tuhpallah infacl sralacp soko nuh Missouri. Eltahl ullac ac ngal. Mahs lwoeles sac oruh kuhtuh mwet ah puhla kihructructwack. Srackna lwoes acn elos ac fahsr kac nuhke siti independence.

Mwet Luhlahlfongi, 1:200–201

Ke elos sikaleni in mahs, sie muhtwacn pahngloltahl. El fak lah oasr kuhtuh mukul tuhkuh in onweltahluh.

Mwet Luhlahlfongi, 1:203

Camp luhn Israel tui fin soko ohl lucng liki infacl soko ke fong sac. Ke eltahl srihke in akiac camp lalos ah, mukul limekohsr yucyak nuh yohrohltahl fin ohsr nahtuhlos ah. Eltahl tuhngahk muh mukul 300 pac pa ac tuhkuh in ahkkolukye camp lalos ah. Puhs mempucr ke Camp luhn Israel fosrngah. Joseph el fahk nuh seltahl muh in oasr luhlahlfongi lah God elac fah kahsrweltahl.

Mwet Luhlahlfongi, 1:203

Tiac paht kuhsrao nuklac ke puhkuhnyeng tuhn apact. Af mahtol muhtwacwacack in puhtat. Infacl ah lwoali. Eng ah oklah sahk ah nuh ten. Sahrom sahrlah sahslah inkuhsrao Joseph ac mwet sahyac ah sokwack kihtin lohm alu ma elos kuh in sef we. Eltahl yuck on fong fohn se. “God el oasr ke pahkah se inge!” Joseph el fahk.

Mwet Luhlahlfongi, 1:203–4

Pahkah sac tulokihnyac mwet ma ke ahkkolukyelos ah. Camp sac sef. Tuhsruhktuh kafuhrmacn fahk muh eltahl ac tiac kahsruh Mwet Luhlahlfongi ac. Leum el fahk nuh sel Joseph muh Camp luhn Israel kuh in som nuh lohm selos ah. Mwet Luhlahlfongi ac enenuh in muhsahi Saion ke elos liacacng masap luhn God. El olwelah muh el fah “lain mweun luhn Saion.”

Olweacng ac Wuhlweacng 105:1–19; Mwet Luhlahlfongi, 1:204–5

Kuhtuh sin mempucr luhn camp se inge tuh foloyak ke elos lohng ma se inge. Eltahl suhpwacrlac lah eltahl tiacna mweun luhn Saion. Kuhtuh mwet ah motko muh Camp luhn Israel el tuh muhnahslah. Tuhsruhk mwet sahyac, oacna Brigham Young, Heber, ac Wilford, tuh kaksakihn pacl wo in weluhl Prophet Joseph Smith ac lutlut Sel.

Mwet Luhlahlfongi, 1:205–6

Tok kuhtuh, Leum el fahk nuh sel Joseph Smith in pahngon Mwet Sap Singucul Luo in kahsruh kol Alu Lal. Mwet Sap inge ac fah mwet lohoh fokoko ke inen Jisus Kraist fin facluh nohfohn. Oalkosr sin Mwet Sap Singucul Luo ah tuh wi mahs se luhn Camp luhn Israel ah. Kuhlwacnsap weluhl Joseph kahsruh ahkwoeloslac nuhke pahng yohk srihpac se inge.

Olweacng ac Wuhlweacng 18:26–27; 107:23; Mwet Luhlahlfongi, 1:214–17