Mwet Loh Liye Plwet ke Puk luhn Mormon

Joseph, Emma, ac Oliver sikalweni in luhngas kol plwet ah ke lohm sin Smith fin acn Pennsylvania. Tuhsruhktuh mwet in taun sac kena tulokuhnuhlosi. Oasr kawuck se lal Oliver pahngpahng David Whitmer suc muhta fin acn New York. Oliver el siyuck sel David lah eltahl kuh in som muhta yurin sucu Whitmer in ahksahfyelah lweng sac.

Mwet Luhlahlfongi, 1:68

David ac sucu lal ah insese nuh kac. Eltahl painguhl Joseph, Emma, ac Oliver nuh in lohm selos ah. Inge eltahl kuh in orekma ke lweng ke mislac. Mwet puhkantwen muhta ke lohm sin Whitmer ah. Kalmac pa puhslac orekma enenuh in orek, yohkna nuh sin ninac kiacl David ac, Mary.

Mwet Luhlahlfongi, 1:68–70

Sie lwen ah, ke Mary el orekma, lipufacn Moroni el muhtwacta yohrohl. El fahk lah el etuh orekma laheslah ma oruh el ullac. El luhngse ahkfokokoye luhlahlfongi lal ah. El ikacslah pack se ac eislah kol plwet ah. El olwacnglah srapuk sac ac sang Mary elan liye sihm ac. El olwelah nuh sel Mary muh elac ahkinsewowoyeyuck.

Mwet Luhlahlfongi, 1:70–71

Kuhtuh mwet ah tiacna luhlahlfongi muh plwet ah pwacye. Joseph el ahkos sap luhn Leum in tiac sang oacna sie mwet in liye. Leum el fahk muh El ac lwelah tolu pac mwet loh in liye plwet ah. David Whitmer, Martin Harris, ac Oliver Cowdery siyuck lah eltahl kuh in mwet loh. Leum el fahk muh eltahl kuh.

Olweacng ac Wuhlweacng 5: 11–12:; 17; Mwet Luhlahlfongi, 1:73

Joseph, Martin, Oliver, ac David som nuh inimac ah. Eltahl sikuckmuhtuhnte ac kais sie eis pacl la siyuck sin God lah eltahl kuh in liye plwet ah, tuhsruhk wacngihn ma sikyak.

Mwet Luhlahlfongi, 1:73

Martin Harris el puhla muh srihpacl pa oruh pruhe laltahl ah tiac top ah. Martin el som, ac mwet sahyac ac sikalweni in pruhe.

Mwet Luhlahlfongi, 1:73

Na lipufacn se sikyak ke sie nguhna kahlwem. El sang Oliver ac David liye kol plwet ah ac sihm kac ah. Eltahl lohng puhswren God fahk lah Joseph el luhngaslah plwet ah ke kuh luhn God ac tuh lweng ah pwacye. God el oacyacpac fahk muh eltahl in sruhmuhn nuh sin mwet nuhkwewa ma eltahl liye ac lohng ah.

“Fahkwack Luhlahlfongi luhn Mwet Loh Tolu“; Mwet Luhlahlfongi, 1:73–74

Joseph el som in sokol Martin. El srwackna pruhe. Joseph el weluhl pruhe. Na lipufacn sac sikyang ac sang plwet ah Martin elan liye, oacna ke el, oruh nuh sel Oliver ac David ac.

Mwet Luhlahlfongi, 1:74

Tohkoh, Joseph el som in suk pahpah ninac kiacl ah, suc muhtwacta nuh yohrohl Mary Whitmer. El fahk nuh seltahl luhpan engan lal lah oasr mwet sahyac liye plwet ah. Ingena mwet loh kuh in fahk lah Joseph el sruhmuhn ma pwacye. Martin el fahk nuh sin mwet nuhkwewa luhpan engan lal lah God lwelah elan sie sin mwet loh.

Mwet Luhlahlfongi, 1:74–75

Lwen suhpuhs tohkoh, Leum el fahk nuh sel Joseph elan sang kol plwet ah nuh sin mwet alkosr pac in liye—pahpah tuhmwacl, luo sin tamuhlwel lal, ahkosr sin tamuhlwel lal David, ac mukul tuhmwacn muhtwacn se wiacl. Eltahl tuh sruokyac plwet ah ac olanglah srapuk ac. Eltahl etuh lah plwet ah pwacye.

“Fahkwack Luhlahlfongi luhn Mwet Loh Oalkosr“; Mwet Luhlahlfongi, 1:75

Lweng ke Puk luhn Mormon ingena sahflah. Joseph el fohlohkuhnwacng kol plwet ah nuh sel lipufacn Moroni. Ingena pa pacl in oraclah kapi ke puk se inge tuh mwet nuhkwewa in kuh in riti ac lutlut yohk ke Jisus Kraist.

Mwet Luhlahlfongi, 1:75–76

Yohklac molo in prin Puk luhn Mormon. Martin Harris el sang kuhtuh ipin acn in imac lal ah in sang moli. El oruh ohinge ke srihpen el etuh lah Puk luhn Mormon pwacye. Kapi nuhkwewa ke puk sac oasr luhlahlfongi pwacye lal Martin Harris ac mwet loh sahyac nuh suwos nuhkwewa in riti. Mwet loh inge tiacna wacngihnlac luhlahlfongi pwacye lalos.

Olweacng ac Wuhlweacng 19:26–27, 34–35; Mwet Luhlahlfongi, 1:76–78