Mwe Sang Sacohklacna

Sie lwen ah, mukul se tuhkuh nuh Kirtland wi mummis fin acn Egypt. Oasr yurin mummis inge kuhtuh puk lihmlihm, kuh rol in pwepuh arulacna mahtuh. Pwepuh inge sihm Egypt pa kac ah. Mukul sac sang nuh sel Mwet Pahluh Joseph Smith. Joseph el arulacna luhngse sihm kac inge.

Mwet Luhlahlfongi, 1:219–20

Kuhtuh kawuck lal Joseph ah kahsrwel molwelah mummis ac puk lihmlihm ac. Ke Joseph el stuhti ke sihm kac inge, Leum el ahkkahlwemye nuh sel ke sihm mahtuh lal Abrahahm, mwet pahluh se ke Pwacpuhl ah. Ke kahsruh el is yurin kawuck lal suc pa Oliver Cowdery, Joseph el suhmuhslah ma Leum El lowtel ke mwe luti lal Abraham.

Mwet Luhlahlfongi, 1:220

Abraham el liye aruhruhma se ke moul lasr uh weluhl Pahpah Inkuhsrao met liki kuht isuslac. El liye lah Jisus Kraist el suleyucklac elan Mwet Lahngo lasr. Abraham el oacyacpa lotwelah ke oreklac luhn facluh. Mwet Luhlahlfongi elos rahrahlac in eis mwe luti lal Abraham inge. Elos engan lah oasr pac ma sahyac ma Leum elac lotwelos kac.

Abraham 2:6–11; 3–5; Mwet Luhlahlfongi, 1:220

Sihm lal Abraham inge oasr ke ip se ke puk in ma suhmuhslah pahngpahng Mwe Sang Sacohklacna. Puk se inge oasr pac sihm lal Moses, siepac mwet pahluh ke Pwacpuhl ah. El luti ke ma pwacye ma wacngihn ke Pwacpuhl ah. Leum El luhngse mwet uh in etuh ke ma pwacye inge, oruh El akacsruhi kac nuh sel Joseph Smith.

Moses 1–8; Abraham 1–5

Luhlahlfongi lal Joseph ac Ip Yohk ke Luhlahlfongi 13 ah oasr pac ke Mwe Sang Sacohklacna. Joseph Smith el suhmuhslah ma inge in fahk nuh sin facluh ma Mwet Luhlahlfongi ke Lwen-sahflah etuh luhlahlfongi uh. Mwe Sang Sacohklacna el puk srihsrihk se, oacna ful se srihklac, tuhsruhk el arulacna sacohk.

Joseph Smith—History; Ip Yohk ke Luhlahlfongi 1