Alu luhn Jisus Kraist El Akwucki

Puk luhn Mormon ingena priniyucki, ac kuh ke pristut luhn God sulpac oasr fin facluh. Leum el fahk nuh sel Joseph Smith muh pacl in akwucki Alu luhn Jisus Kraist.

Mwet Luhlahlfongi, 1:84

Ke Eprll 6, 1830, sahp muhtwacn ac mukul 40 tuhkuh nuh ke lohm sin Whitmer ah in akiyac Alu uh. Leum el tuh pahnglol Joseph ac Oliver in kol Alu Lal uh. Joseph ac Oliver siyuck mwet ah in sralwack paholos in liyeyuck lah eltahl ahkkeyaclos in mwet kol lalos.

Olweacng ac Wuhlweacng 20:1–3; Mwet Luhlahlfongi, 1:84

Tohkoh, Joseph ac Oliver ahkinsewowoyelah kuhfa luhn Leum. Eltahl sang nuh sin mwet ah in kahsrweltahl esamuhl Jisus Kraist. Na Joseph ac Oliver fihliac paholos nuh fin sifen mwet ma pacptaislac ah. Eltahl ahkkeyacloslac mempihr luhn Alu uh ac sang nuh selos mwe sang luhn Nguhn Muhtahl.

Olweacng ac Wuhlweacng 20:75–79; Mwet Luhlahlfongi, 1:85

Leum el sang pweng se nuh sel Joseph nuh ke Alu sasuc sac. El fahk nuh seltahl in suhmuhslah ma sikyak lun Alu uh. El fahk lah Joseph Smith el mwet pahluh se. El olwelah nuh sin mempihr luhn Alu uh muh eltahl fin ukwe masap El sang nuh sel Joseph Smith uh, El fah ahkinsewowoyaclos. Ac fah wacngihn kuh luhn tefihl faclos.

Olweacng ac Wuhlweacng 21:1–6; Mwet Luhlahlfongi, 1:85

Mwet ah arulacna engan ke oasr luhn Alu luhn Jisus Kraist! Tukihn toeni ac, mwet puhs pac pacptaislac, weacng pahpah ac ninac kiacl Joseph ah. Ke pahpah tuhmwacl ah tuhkuh liki kof ah, Joseph el lihksreni asruhilah nuh sel. “Nga pain moul lac in liye pahpah tuhmuhk uh pacptaislac nuh ke Alu pwacye luhn Jisus Kraist!“ el fahk.

Mwet Luhlahlfongi, 1:86

Tok kuhtuh ke fong sac, Joseph el som nuh inimac ah in muhkwena. Insiacl sesseslah ke engan. Ac fahsr in yac 10 tukihn pacl se met el liyacl Pahpah Inkuhsrao ac Jisus Kraist ac. Puhslacna ma sikyak tukihn pacl sac. Joseph el arulacna kaksakihn lah el kuh in kahsruh fohlohkuhnwack, kuh sulpac use, Alu luhn Jisus Kraist

Mwet Luhlahlfongi, 1:86