Tusi Paia

Aoaoina atu o le faatuatua ia Iesu Keriso i le faitau miliona

E faitau afe tausaga le mamao i tua o tala o loo i le Tusi Paia. Ua latou faamatalaina tagata, aganuu, ma tulaga e masani ona matuai ese lava mai o tatou tulaga i aso nei. Peitai, pe a tatou suesueina le Tusi Paia, e tatou te iloa ai o le tele o na mea e masani ai. Ua tatou faitau e uiga i aiga o e oo i le olioli ma feteenaiga, tagata taitoatasi o e pipiimau i lo latou faatuatua i le feagai ai ma le le fiafia, ma malo e oo i taua ma mala faalenatura. O le mea sili lava, tatou te faitau ai e uiga i tagata o loo sailia se sootaga ma le Atua—ma o e mauaina e ala i lo latou faatuatua ma le faamoemoe ia Iesu Keriso.

O Le a Le Tusi Paia?

O le Tusi Paia o le afioga lea a le Atua. O loo i ai tusitusiga a perofeta ma isi tusitala musuia mai le taimi o Atamu ma Eva e oo i aso o Aposetolo a Iesu Keriso ina ua mavae Lona Toetu. O nei tusitusiga e aofia ai poloaiga a le Atua, Ana feagaiga, Ana faaaliga, ma Ana fegalegaleaiga ma Ana fanau. O le Tusi Paia e lua ona vaega: o le Feagaiga Tuai ma le Feagaiga Fou. I le Feagaiga Tuai, o loo molimau mai ai perofeta i le afio mai o le Faaola. O le Feagaiga Fou o se faamaumauga o le soifuaga ma le galuega a Iesu Keriso.

Taiala e faatatau i le suesueina o le talalelei: Tusitusiga Paia, Tusi a Mamona, Perofeta, Faaaliga, Iosefa Samita

Vaega 1

O Le Tusi Paia O le Afioga a le Atua ma o se Molimau ia Iesu Keriso

I le avea ai ma tagata O Le Ekalesia a Iesu Keriso o le Au Paia o Aso e Gata Ai, tatou te faapelepele ma faaaloalo i le Tusi Paia o le afioga a le Atua. I le Tusi Paia, tatou te aoao ai mataupu faavae o le talalelei a Iesu Keriso, lea e aofia ai Ana poloaiga ma aoaoga (tagai i le Mataupu Faavae ma Feagaiga 42:12).

O Iesu Keriso o le ute lea o le Tusi Paia. E tele suafa e lauiloa ai o ia i totonu o ona itulau, e pei o Ieova, le Alii le Atua, Togiola, le Paia e Toatasi o Isaraelu, Emanuelu, ma le Tamai Mamoe a le Atua. O lana misiona faalelalolagi na valoia e perofeta i le Feagaiga Tuai, ma o le Feagaiga Fou ua tuuina mai ai tala o molimau vaaitino o lena misiona (tagai i le Isaia 9:6; Ioane 20:31). Ua molimau mai le Tusi Paia i le alofa o le Atua mo i tatou, na faaalia mai e ala mai ia Iesu Keriso, o le na mafai ai ona tatou maua le faamagaloga o a tatou agasala ma toe foi atu e ola i le afioaga o le Atua. E mafai ona tatou maua le faamāfanafanaga ma le taitaiga i le suesueina o le Tusi Paia a o tatou taumafai malosi e avea ma soo o Keriso.

Mea e mafaufau i ai

Na saunoa le Perofeta o Iosefa Samita e uiga i le Tusi Paia e faapea “o ia o lē e faitau soo i ai o le a sili ona fiafia i ai, ma o ia o lē ua masani i ai, o le a iloa le aao o le [Atua] i soo se mea e mafai ona ia vaai i ai.” Ua faapefea ona faamalosia e le Tusi Paia lou faatuatua ia Iesu Keriso? O le a le mea e te aoaoina e uiga i le Atua a o e faitau i ai? Mafaufau e tusifaamaumau pe na faapefea ona e vaaia Lona aao i olaga o i latou o e na soifua i aso anamua ma le auala ua e vaaia ai Lona aao i lou olaga i le aso.
Pe a e sailia le poto po o le taitaiga, e mafai ona e maua le taitaiga e ala i le afioga a le Atua. E mafai ona e faitauina le Faataoto 3:5–6; Ieremia 29:12–13; Ioane 14:23; Kolose 3:16; ma le Iakopo 1:5 mo faataitaiga o le auala e tuuina mai ai e le Alii ia i tatou le taitaiga e ala i le Tusi Paia. Ona tusi lea i lalo o ni nai fuaiupu o le Tusi Paia ua faamanuiaina ai oe i le faamoemoe ma le taitaiga.

Gaoioiga mo le aoao faatasi ma isi

E mafai ona tatou iloa le Faaola e ala i le suesueina o le Tusi Paia, o molimau ia Iesu Keriso. Mafaufau e faitau faatasi le Esoto 3:6–14; Mataio 3:13–17; ma le Luka 2:25–38 mo faataitaiga o le auala o loo molimau mai ai le Tusi Paia i le Faaola. E mafai foi ona e matamata i se vitio faale-Tusi Paia e uiga i le galuega a le Faaola i le olaga nei. Talanoaina mea ua e aoaoina mai nei tala e uiga i le misiona paia a Keriso. E faapefea ona molimau uma le Feagaiga Tuai ma le Feagaiga Fou o Iesu o lo tatou Faaola ma le Togiola?
O nisi o mea silisili na tutupu ma faaaliga i aso e gata ai ua oo mai a o suesueina e perofeta le Tusi Paia. Faitau ma talanoaina nisi o na taimi i le talafaasolopito o le Ekalesia e pei ona tusifaamaumauina i le Iosefa Samita—Talafaasolopito 1:10–20; Mataupu Faavae ma Feagaiga 76:11–20; ma le Mataupu Faavae ma Feagaiga 138:1–11. Ona mafai lea ona outou usuina faatasi o se vaega ni viiga e uiga i le Toefuataiga, e pei o le “Tatalo Muamua a Iosefa Samita” po o le “O Le Agaga o le Atua.”

Aoao atili

2 Nifae 29:3–13; Mataupu Faavae ma Feagaiga 33:16
Russell M. Nelson, “Molimau Faatusi Paia,” Liahona, Nov. 2007, 43-45
D. Todd Christofferson, “O Le Faamanuiaga o Tusitusiga Paia,” Liahona, Me 2010, 32-35
“Talatuu o Tusitusiga Paia” (vitio), ChurchofJesusChrist.org

Vaega 2

Ua Faasaoina e le Atua le Tusi Paia ina ia Faamanuia ai Ana Fanau

o le aiga o loo suesue i tusitusiga paia

O le mea moni, o loo iā i tatou o le Tusi Paia e suesue ma aoao mai ai i aso nei, o se vavega moni lava. Faafetai i le Alii ma tagata lototetele i le talafaasolopito, ua mafai ona tatou aoao mai lenei faamaumauga ofoofogia, “lea ua liliuina ai loto o tagata mo le tele o seneturi, ua taitaiina ai i latou e tatalo, e filifili ala sao, ma saili ia maua lo latou Faaola.” O lenei tusi paia e fesoasoani tatou te lagona ai le Agaga o le Atua.

Na muai tusia le Tusi Paia i le gagana Eperu, Eleni, ma le Arama. Ae i le aluga o seneturi ma le tele o faafouga o le tusi, na leiloloa ai nisi o upumoni manino ma taua (tagai i le 1 Nifae 13:26–29; Mataupu Faavae o le Faatuatua 1:8). Ona o lenei mea, na faatonuina ai e le Atua le Perofeta o Iosefa Samita e toefuatai mai nisi o na upumoni i le mea ua ta’ua nei o le Faaliliuga a Iosefa Samita o le Tusi Paia. O le faaliliuga musuia a le Perofeta ua faaalia ai le taua tele i le Alii o le malamalama sao o Ana fanau i le Tusi Paia ma ona aoaoga.

Mea e mafaufau i ai

Sa tumau le afioga a le Atua i le tele o tausaga e faamanuia ai Lana fanau, ma o Lana afioga e faavavau. E mafai ona e faitauina le Isaia 40:8; Ioane 1:1; ma le 1 Peteru 1:25 e aoao ai e uiga i le natura e faavavau o Lana afioga. O a ni mea o loo aʻoaʻo mai e nei fuaiupu ia te oe e faatatau i le talalelei a Iesu Keriso? E faapefea ona uunaia oe e faateleina lou tautinoga e suesue le Tusi Paia?
Na lagona e Iosefa Samita o le faia o ni faafouga musuia i le Tusi Paia o se vaega lea o lona valaauga o se perofeta. E ui ina sa ia faamaeaina le tele o lana faaliliuga o le Tusi Paia i le 1833, ae na ia fetuunai lana galuega ina ia lomia seia oo ina maliu o ia i le 1844. Mafaufau e faitau le Faaliliuga a Iosefa Samita mo le Mataio 4:1–11; Mataio 18:11; ma le Mareko 16:3–6. E faapefea e nei faafouga ona suia lou malamalama i fuaitau taitasi? Aisea e taua ai ia te oe le toefuataiina mai o nei upumoni?

Gaoioiga mo le aoao faatasi ma isi

Ona o le Tusi Paia, “e faitau sefulu miliona tagata ua o mai i le faatuatua i le Atua ma Iesu Keriso.” O le ā na aumaia ai le Tusi Paia i le toatele? I le saunoaga a Peresitene M. Russell Ballard “O Le Vavega o le Tusi Paia,” e mafai ona e aoao ai e uiga i osigataulaga a i latou o e na tuuina mai o latou ola e aumai ai ia i tatou lenei tusi paia o tusitusiga paia. Pe e te filifili foi e matamata i se vitiō e faatatau i le Tusi Paia o loo saunia i gagana nei:
- Igilisi: “King James Bible Anniversary”
- FaaSipaniolo: “Lomiga a le Au Paia o Aso e Gata Ai o le Tusi Paia i le faa-Sipaniolo”
- FaaPotukale: “History of the Translation of Biblia Sagrada”

A uma le vitiō, e mafai ona e faasoa atu ou faalogona e faatatau iā i latou na fesoasoani e faaavanoa le Tusi Paia mo i tatou i aso nei. E faapefea ona aafia le auala e te mafaufau ai ma suesue ai le Tusi Paia i a latou tala?

Aoao atili

2 Timoteo 3:15–17; Alema 37:6–10
Robert D. Hales, “Sauniuniga mo le Toefuataiga ma le Afio Mai Faalua: ‘E i Ou Luga Ai Pea Lo’u Lima,’” Liahona, Nov. 2005, 88–90.
Taiala i Tusitusiga Paia, “Faaliliuga a Iosefa Samita (FTT),” Potutusi o le Talalelei
Autu o Talafaasolopito o le Ekalesia, “Faaliliuga a Iosefa Samita o le Tusi Paia,” Potutusi o le Talalelei