Tusi Paia

O le Tusi Paia o le afioga lea a le Atua. O se molimau mo le Atua ma Iesu Keriso. Ua fautuaina tagata O Le Ekalesia a Iesu Keriso o le Au Paia o Aso e Gata Ai ina ia suesue i ai ma mulimuli i ona aoaoga. O loo faaaoga e le Ekalesia le tele o faaliliuga o le Tusi Paia i gagana eseese. I le FaaPeretania, o le Lomiga a King James o loo faaaogaina e fai ma Tusi Paia aloaia a le Ekalesia.

Peitai, o le Tusi Paia e le o le faaaliga mulimuli lea a le Atua i tagata soifua, pe ua atoatoa foi le tuufaatasiga lenei o tusitusiga paia. O loo tautala le Tusi Paia lava ia e uiga i isi tusi o faatonuga o tusitusiga paia, e aofia ai tusi a Natano le perofeta ma Ie’u ma Enoka, le valoaga a Akia, o faaaliga vaaia a Oteta le tagata vaai, faapea foi ma tusi o loo misi a Paulo. O isi tusi o tusitusiga paia a le Au Paia o Aso e Gata Ai—o le Tusi a Mamona, le Mataupu Faavae ma Feagaiga, ma le Penina Tautele—ua faamanino mai ai le talalelei e pei ona aoaoina i le Tusi Paia ma faamautu ai le moni o le molimau faaleTusi Paia ia Iesu Keriso.

E faaaloalo le Au Paia o Aso e Gata Ai i le Tusi Paia. Latou te suesue i ai ma talitonu i ai o le afioga ia a le Atua. Ae peitai, latou te le talitonu o le Tusi Paia, e pei ona maua ai i aso nei, ua aunoa ma ni mea sese.

Sa saunoa mai Iosefa Samita, “Ou te talitonu i le Tusi Paia i le faitauina mai i tusitusiga a uluai tusiupu.”

E ese le faaaloalo ma le fiafia o le Au Paia o Aso e Gata Ai i le Tusi Paia. Latou te suesue i ai ma taumafai e ola ai i ona aoaoga. Latou te teufatuina lana molimau i le soifuaga ma le misiona a le Alii o Iesu Keriso. Na suesueina e le Perofeta o Iosefa Samita le Tusi Paia i lona soifuaga atoa, ma sa ia aoaoina atu ona mataupu. Sa molimau mai o ia, o se tagata “O lē mafai ona ia matauina le mana o le Alii e Pule Aoao, ua tusia i luga o le lagi, e mafai foi ona vaai i le tusilima a le Atua lava ia i le voluma paia: ma o lē faitauina soo o le a sili ona fiafia i ai, ma o le ua faamasani ai, o le a iloa le aao [o le Alii] i soo se mea lava na te vaai ai i ai ”

A o tuufaatasia, faatulagaina, faaliliuina, ma tusitusia le Tusi Paia, e tele mea sese na oo i totonu o le anotusi. O le i ai o na mea sese e iloagofie pe a mafaufau se tagata i le tele ma e masani o faaliliuga feteenaia o le Tusi Paia ua i ai i aso nei. O tagata aooga magafagafa o le Tusi Paia e masani ona le malamalama i le iloa lelei o feteenaiga ma mea ua aveesea. E toatele foi tagata ua fiailoa e uiga i le ta’ua e perofeta o le tusi paia o tusi po o fuaitau faaletusi paia e le o i ai i le taimi nei i le Tusi Paia.

E faaopoopo atu i le Tusi Paia, e faaaloalogia e le Au Paia o Aso e Gata Ai le suesueina o le Tusi a Mamona, Mataupu Faavae ma Feagaiga, ma le Penina Tau Tele, ma saunoaga a perofeta ma aposetolo o aso nei. O nei punavai uma o upumoni e faavavau e galulue faatasi e faavae, faamanino, ma molimau i le fuafuaga a lo tatou Tama Faalelagi ma ia aumai tagata ia Iesu Keriso.

E talitonu le Au Paia o Aso e Gata Ai i se seti o tusitusiga paia faaopoopo, o lona uiga o loo i ai isi tusi o tusitusiga paia e ese mai i le Tusi Paia (e pei o le Tusi a Mamona) ma o loo faaauau ona faaali mai e le Atua Lana afioga e ala mai i perofeta soifua. E masani ona finauina e faapea, ina ia avea ma se Kerisiano o lona uiga ia malie i le mataupu faavae o le sola scriptura, po o le tutoatasi o le Tusi Paia. Ae o le faapea mai o le Tusi Paia o le afioga mulimuli lea a le Atua—ae maise lava, o le afioga tusia mulimuli a le Atua—o le tele lea o le tautino mo le Tusi Paia nai lo lona tautino mo ia lava. E leai ma se vaipanoa o tautino mai ai le Tusi Paia e faapea, o faaaliga uma mai le Atua o le a aoina i se voluma e tasi ina ia tapunia e faavavau ma o le a leai ni isi faaaliga faaletusitusiga paia e mafai ona toe mauaina.