Library
Tusi a Mamona

“Tusi a Mamona,” Autu ma Fesili (2023)

alii talavou o loo faitauina le Tusi a Mamona

Taiala mo le Suesueina o le Talalelei

Tusi a Mamona

O Se Tasi Molimau ia Iesu Keriso

Sa tusia e perofeta anamua le Tusi a Mamona mo tagata i o tatou aso. I le avea ai o se soa tusitusiga paia ma le Tusi Paia, o le Tusi a Mamona o loo molimau mai e uiga ia Iesu Keriso. O i latou o e faitau ma suesue ma le faamaoni i le tusi o le a lagonaina le Agaga Paia ma maua tali i le tele o fesili e sili ona taua o le olaga. E ala i le faitauina o le Tusi a Mamona, e mafai ai e tagata ona iloa mo i latou lava o loo soifua le Atua, e alofa o Ia ia i latou, ma ua toefuataiina mai le talalelei a Iesu Keriso i le lalolagi.

Ua valaaulia soo e perofeta o ona po nei tagata o le Ekalesia e suesue e le aunoa le Tusi a Mamona. Mo se faataitaiga, na tautino mai e Peresitene Russell M. Nelson: “Ou te folafola atu a outou suesueina ma le agaga tatalo le Tusi a Mamona i aso uma, o le a outou faia ni faaiuga sili atu ona lelei i—aso uma. Ou te folafola atu a outou mafaufau loloto i mea tou te suesueina, o le a matala mai pupuni o le lagi, ma o le a outou mauaina tali i a outou lava fesili ma le taitaiga mo o outou lava olaga. Ou te folafola atu a e faatofuina oe lava i le Tusi a Mamona, e mafai ona puipuia oe mai mea leaga o le aso.”

O Le A le Tusi a Mamona?

O Le Tusi a Mamona: O Se Tasi Molimau ia Iesu Keriso o se tusi o tusitusiga paia. O loo i ai tusitusiga a perofeta anamua o e na nonofo i le Itulagi i Sisifo. I le avea ai ma le Perofeta o le Toefuataiga, na faaliliuina e Iosefa Samita le Tusi a Mamona e ala i le meaalofa ma le mana o le Atua (tagai i le Mataupu Faavae ma Feagaiga 135:3). Faatasi ma le Tusi Paia, ua molimau le Tusi a Mamona ia Iesu Keriso ma o loo i ai le atoatoaga o le talalelei (tagai i le Esekielu 37:15–17; Mataupu Faavae ma Feagaiga 20:8–9). O le Tusi a Mamona ua avea foi o se faamaoniga o le valaauga faaperofeta o Iosefa Samita ma le Toefuataiga o le talalelei.

Vaaiga aoao o le autu: Tusi a Mamona

Taiala e faatatau i le suesueina o le talalelei: Tusitusiga Paia, Tusi Paia, Iosefa Samita, Toefuataiga o le Talalelei

Vaega 1

Ua Molimau Mai le Tusi a Mamona O Iesu Keriso o le Togiola o le Lalolagi

Tusi a Mamona

Ua manatulia e Tagata o Le Ekalesia a Iesu Keriso o le Au Paia o Aso e Gata Ai o le Tusi Paia o se tusitusiga paia: O le Feagaiga Tuai ma le Feagaiga Fou o ni molimau ia Iesu Keriso ma Lana galuega e aumai ai le faaolataga o fanau a le Atua. O le Tusi a Mamona na tusia e perofeta a le Atua i Amerika ma o loo tu o se isi molimau ia Iesu Keriso. O le Tusi a Mamona o loo aofia ai “le atoatoaga o le talalelei a Iesu Keriso” ma faamautu atu i le lalolagi e moni tala ia Iesu Keriso ma Ana perofeta e pei ona maua i le Tusi Paia (tagai i le Mataupu Faavae ma Feagaiga 20:8–12). Faatasi ai ma le Tusi Paia, o le Tusi a Mamona e fesoasoani i tagata ia maua se malamalamaaga manino atu i le fuafuaga a le Atua ma saunia ai i latou e mulimuli ia Iesu Keriso (tagai i le Esekielu 37:15–17; 2 Nifae 3:12).

O le Tusi a Mamona o se faamanuiaga maoae lea i tagata o le Atua i aso nei. O loo i ai afioga a Iesu Keriso (tagai i le 2 Nifae 33:10). Na faamalamalama mai e Peresitene Russell M. Nelson:

“[O le Tusi a Mamona] o loo i ai tali i fesili e le mafai lava ona teenaina o le olaga. O loo aoao mai ai le aoaoga faavae e uiga ia Keriso. O loo faalauteleina ma faamanino ai le tele o upumoni ‘manino ma pele’ [tagai i le 1 Nifae 13:29–33] ia na leiloloa i le tele o seneturi o taimi ma le anoanoai o faaliliuga o le Tusi Paia.

“Ua tuuina mai e le Tusi a Mamona le atoatoaga ma le malamalama sili ona faatuatuaina o le Togiola a Iesu Keriso e maua i soo se mea. … O le mana atoa o le talalelei a Iesu Keriso o loo i ai i totonu o le Tusi a Mamona. Uma.”

Mea e mafaufau i ai

  • Na aoao mai Iosefa Samita o le Tusi a Mamona o le “maaauau o la tatou tapuaiga” (tagai i le Aoaoga a Peresitene o le Ekalesia: Iosefa Samita (2011),64). I le tusiga o le ata mo le fauga o se fale, o se maaauau o se maa e foliga i se tina i le ogatotonu o se faitotoa faaofuofu, lea e taofiofi ai isi maa ma taofia ai le faaofuofu mai le solo. E pei o se maaauau faatusiata fale, o le Tusi a Mamona e taua tele i lo tatou talitonuga ia Iesu Keriso ma Lana talalelei toefuataiina. E faapefea e lau molimau o le Tusi a Mamona ona faatosina ai lau molimau o isi vaega o le talalelei?

Gaoioiga mo le aoao faatasi ma isi

  • O le savali totonugalemu o le Tusi a Mamona o Iesu o le Keriso. Valaaulia tagata o lau vaega e faitau le itulau autu o le Tusi a Mamona, ma gauai faapitoa atu i le parakalafa lona lua. O faapefea ona faamamafa mai e le itulau autu le taua o le Tusi a Mamona? E mafai foi ona fesoasoani mau nei: 1 Nifae 6:4; Iakopo 1:7; Ominae 1:26; 3 Nifae 11:13–17; Moronae 10:32–33. Aisea e taua ai le fesoasoani atu i isi ia malamalama o le faamoemoega o le Tusi a Mamona o le molimau atu lea o Iesu o le Keriso?

Aoao atili

Vaega 2

O Le Oo Mai o le Tusi a Mamona Sa o se Vavega Lava.

papatusi auro

Na oo mai le Tusi a Mamona e ala i le meaalofa ma le mana o le Atua. Na muai tusia le tusi e perofeta Amerika anamua i papatusi uamea. Mo le tele o seneturi, sa tanumia ai i latou e lata i le fale o Iosefa Samita i le itu i matu o Niu Ioka i le Iunaite Setete, seia oo ina faaali atu e se avefeau faalelagi, o Moronae, ia Iosefa Samita le mea e maua ai. O se meafaigaluega mo le faaliliuina o le faamaumauga, o le Urima ma le Tumena, sa teuina foi faatasi ma papatusi, faatasi ai ma isi mea na gaosia anamua (tagai i le Iosefa Samita—Talafaasolopito 1:30–35).

E ui lava sa na o le 23 tausaga o Iosefa Samita ma sa itiiti lava sona aotauina aloaia, ae sa ia faaliliuina le Tusi a Mamona i le gagana Peretania i le saoasaoa pe tusa ma le valu itulau i le aso. Sa leai sona malamalamaaga i gagana anamua, ma na te lei faaaogaina foi ni faamatalaga. Na ia faamaeaina le faaliliuga atoa o le tusi i le pe tusa ma le 85 aso. Ina ua fesiligia e tagata pe na faapefea ona ia faaliliuina, sa na ona fai mai lava o Iosefa sa faia “e ala i le meaalofa ma le mana o le Atua” (itulau autu o le Tusi a Mamona; tagai foi Russell M. Nelson, “O Se Feagaiga Taua,” Liahona, Iulai 1993).

Na lolomiina le Tusi a Mamona i le gagana Peretania i ni nai aso a o lei faatulagaina le Ekalesia i le 1830 (tagai i le Church History Topics, “Printing and Publishing the Book of Mormon,” Gospel Library). O le asō, ua faaliliuina le Tusi a Mamona i le silia ma le 100 gagana ma o loo faaaogaina i le lalolagi atoa.

Mea e mafaufau i ai

  • Sa poloaiina Iosefa Samita e leoleo ma le faaeteete ia papatusi. I le taimi o le faaliliuga, e toaitiiti lava tagata na vaai moni i papatusi. Ae peitai, sa faatonuina Iosefa Samita e faaali atu papatusi i se vaega itiiti o ana paaga vavalalata. Na lauiloa aloaia nei tagata o “Molimau e Toatolu” ma “Molimau e Toavalu.” E mafai ona e faitauina a latou molimau i le “O Le Molimau a Molimau e Toatolu” ma le “O Le Molimau a Molimau e Toavalu.” Aiseā e tāua ai ona fesoasoani i isi ia iloa e uiga i aafiaga a Molimau e Toatolu ma Molimau e Toavalu? O le a se mea atonu e te faia e faasoa atu ai lau lava molimau i le Tusi a Mamona i isi?

Gaoioiga mo le aoao faatasi ma isi

  • E ui lava e toatele tagata ua mafaufau pe na faapeī le faagasologa o le faaliliuga o le Tusi a Mamona, ae e itiiti lava ni faamatalaga patino na tuuina mai e Iosefa Samita e uiga i ai nai lo le faapea mai sa faaliliuina “e ala i le meaalofa ma le mana o le Atua” (folasaga i le Tusi a Mamona; Mataupu Faavae ma Feagaiga 135:3). Valaaulia tagata o lau vaega e faitau le “Faaliliuga o le Tusi a Mamona” i le Church History Topics (Gospel Library). Fesili atu ia i latou po o a ni malamalamaaga na latou maua mai le faitauga. Aisea e te manatu na faamamafa mai ai e Iosefa Samita “le meaalofa ma le mana o le Atua” ina ua talanoaina le faaliliuga o le Tusi a Mamona?

Aoao atili

Vaega 3

E Mafai Ona E Iloa mo Oe Lava e Moni le Tusi a Mamona

tagata o loo talanoa e uiga i le Tusi a Mamona

O le avea ma soo o Iesu Keriso o se faagasologa o le olaga atoa. O loo i ai i tatou taitoatasi i nofoaga eseese i le ala faaleagaga e toe foi atu ai i le Tama Faalelagi ma Iesu Keriso. Ae po o fea lava o e i ai i lena ala, e mafai ona fesoasoani le Tusi a Mamona ia te oe e te latalata atili atu ai ia i Laua. Ua tumu le afioga a le Atua i le mana faaliliu (tagai i le Alema 5:7; 31:5). E mafai ona fesoasoani le Tusi a Mamona ia te oe e aloese ai mai taufaasese faalelalolagi ma taitai atu ai oe i le ala i le saogalemu faaleagaga (tagai i le 1 Nifae 15:24; Helamana 3:29–30).

Ona o le taua o le Tusi a Mamona, ua faamamafa mai ai e auauna a le Alii e tatau i tagata uma o Le Ekalesia a Iesu Keriso o le Au Paia o Aso e Gata Ai ona saili ia iloa mo i latou lava e moni le Tusi a Mamona. Fai mai le faatomuaga o le Tusi a Mamona : “Matou te valaau atu i tagata uma e i soo se mea, ia faitau i le Tusi a Mamona, ia mafaufau loloto i ai i o latou loto i le sāvali o i ai, ona ole atu lea i le Atua, le Tama Faavavau, i le suafa o Keriso pe ua moni le tusi. O latou e mulimuli i lenei ala ma ole atu i le faatuatua, o le a latou maua se molimau i le moni ma le paia e ala i le mana o le Agaga Paia. (Tagai Moronae 10:3–5.)”

Mea e mafaufau i ai

  • Faitau le saunoaga lenei mai ia Elder Jeffrey R. Holland: “Ou te molimau atu e le mafai e se tasi ona faatuatua atoa i lenei galuega o aso e gata ai—ma maua le fuataga atoa o le filemu ma le mafanafana i o tatou taimi—sei iloga ua ia taliaina le paia o le Tusi a Mamona ma le Alii o Iesu Keriso lea o loo molimau ai lena tusi. Ua faapefea ona faatosinaina e le Tusi a Mamona lau molimau o Le Ekalesia a Iesu Keriso o le Au Paia o Aso e Gata Ai?

Gaoioiga mo le aoao faatasi ai ma isi

  • O le Tusi a Mamona o se meafaigaluega ua saunia faalelagi mo le liua lea e i ai le mana e suia ai mafaufau, loto, ma olaga a o tatou faaogatasi i tatou lava ma Iesu Keriso ma Ana aoaoga. Faitau le saunoaga lenei a Peresitene Ezra Taft Benson faatasi ma tagata o lau vaega:

    “O le Tusi a Mamona o le meafaigaluega lea ua mamanuina e le Atua e ‘tafi [ai] le lalolagi … e pei o se lolo, ae faapotopoto [Ana] au filifilia.’ (Mose 7:62.) E manaomia e lenei vaega paia o tusitusiga paia ona avea atili ma totonugalemu o la tatou talaiga, la tatou aoao atu, ma la tatou galuega faafaifeautalai.

    “Ou te luiina i tatou uma ia mafaufau ma le agaga tatalo i laasaga e mafai ona tatou faia patino e aumai atoatoa ai lenei molimau fou mo Keriso i totonu o o tatou lava olaga ma i se lalolagi ua matuai manaomiaina lava [le Tusi a Mamona].”

    O a nisi o auala e mafai ona tatou fesoasoani ai i le Alii i Lana galuega e ala i le faalofia o le lalolagi i le Tusi a Mamona?

Aoao atili

Isi Punaoa e uiga i le Tusi a Mamona