Library
Faapotopotoina o Isaraelu

“Faapotopotoina o Isaraelu,” Autu ma Fesili (2023)

aulotu a le ekalesia o loo pepese

Taiala mo le Suesueina o le Talalelei

Faapotopotoina o Isaraelu

O le faamoemoega sili i le lalolagi i aso nei

Pe na e feulaina ea se tama’i laau e pei o se dandelion ma matamata ai i le faataapeapeina o fatu? O le a se mea e manaomia e toe faaputu mai ai na fatu uma? E foliga e faigata. Ae e mafaia mea uma i le Atua.

O loo faamatala mai i le Feagaiga Tuai se isi ituaiga o faataapeapeina—ina ua “faataapeapeina … tagata o le feagaiga a le Atua ma se asiosio i totonu o atunuu uma” (Sakaraia 7:14). Ae e ala mai i Ana perofeta, na folafola mai ai e le Alii o le a i ai se aso o le a toe faapotopotoina ai i latou (tagai Teuteronome 4:27–31).

Tatou te ta’ua “o le faapotopotoina o Isaraelu,” ma na amata a o toefuatai mai le Ekalesia a Iesu Keriso i aso e gata ai ma amata ona salalau atu Lana talalelei i le lalolagi atoa. O lenei taumafaiga o le faapotopotoina ua faaauau pea ona maua le saoasaoa a o agai i luma le Toefuataiga o le talalelei.

O Le A le Faapotopotoina o Isaraelu?

Pe a talanoa e faatatau i le faapotopotoina o Isaraelu, o Isaraelu o loo faasino atu i tupuaga moni o Aperaamo, Isaako, ma Iakopo. E faatatau foi ia i latou o e na vaetamaina i totonu o lo latou aiga e ala i le feagaiga o le papatisoga. I aso anamua, na faataapeapeina ai e le Atua le fanauga a Isaraelu ona o lo latou amioleaga ma le fouvale. Ua faapotopotoina Isaraelu a o talia e fanau a le Atua le talalelei a Iesu Keriso, maua sauniga o le faaolataga ma le faaeaga, osia feagaiga ma le Atua, ma taumafai e tausia na feagaiga.

Taiala e faatatau i le suesueina o le talalelei: Feagaiga Faavavau, Valaauliaina o Tagata Uma e Talia le Talalelei, Faamanuiaga Faapeteriaka, Afio Mai Faalua o Iesu Keriso

Vaega 1

O Tagata o le Ekalesia a Iesu Keriso o se Vaega o le Aiga o Isaraelu

aiga i le faapotopotoga

Na faatuina e le Alii Lana feagaiga tumau-faavavau ma Atamu. Sa Ia toe faafouina faatasi ma Aperaamo ma Sara, faatasi ma lo la atalii o Isaako, ma le atalii o le la tama o Iakopo, o lē na suia lona igoa ia Isaraelu. O e tupuga mai ia Isaraelu ua lauiloa o le “aiga o Isaraelu.” Ae i o tatou aso, e sili atu ona lautele le faatatauina o le faaupuga.

Soo se tasi lava e talitonu ia Iesu Keriso ma ulu atu i Lana ala o le feagaiga e ala i le auai i Lana Ekalesia toefuataiina—e tusa lava po o le a lo latou gafa—e faapotopotoina i le aiga o Isaraelu ma avea ma se vaega o le nuu o le feagaiga a le Alii (tagai Esoto 6:7; 1 Nifae 14:14; 3 Nifae 21:6; Aperaamo 2:10). O nei soo o Keriso o fanau ia o le feagaiga (tagai i le 3 Nifae 20:25–27). A o latou tausia a latou feagaiga, latou te mauaina ia lava faamanuiaga na folafola atu ia Aperaamo, Isaako, ma Iakopo (tagai Mataupu Faavae ma Feagaiga 38:17–20; 132:30–31; Aperaamo 2:9–11).

Mea e mafaufau i ai

  • Ina ia aoao atili e uiga i le auala e avea ai tagata o le Ekalesia ma se vaega o le aiga o Isaraelu, e mafai ona e suesue i le saunoaga a Peresitene Russell M. Nelson “Ia Faamuamua le Atua.” O le a le uiga ia te oe, o le avea ma se vaega o “Isaraelu”? E mafai foi ona e faitau pe faalogologo i upu o viiga o loo talanoa mai e uiga ia Isaraelu, e pei o le “Faaola o Isaraelu,” “Isaraelu, Ua Valaau Mai le Atua,” ma le “Faamoemoe o Isaraelu,” sui le upu “Isaraelu” i “tausi feagaiga” e vaai po o a malamalamaaga e te maua.

  • Na aoao mai Elder David A. Bednar e uiga i le taua o le filifili e avea ma se vaega o le nuu o le feagaiga a le Atua e ala i le mulimuli i Ana tulafono: “Ua ia i tatou uma le valaau a le Atua ma la tatou tali taitoatasi i lena valaau, ma e toatele atonu e valaauina ae toaitiiti ua filifilia. O le avea ai pe avea foi ma tagata filifilia, e le o se mea faapea e na o i tatou ua faaee mai i ai. Ae, o le taualuga lava o oe ma a’u e mafai ona filifili ina ia filifilia e ala i le faaaogaina ma le amiotonu o lo tatou faitalia tatau.” O a faamanuiaga e oo mai ia i tatou pe a tatou “filifili e filifilia” o se vaega o le aiga o Isaraelu? O le a se isi mea e mafai ona e faia e filifili ai e filifilia?

Gaoioiga mo le aoao faatasi ma isi

  • E mafai ona outou faitau faatasi le vaega o le lauga a Peresitene Nelson “Filifiliga mo le Faavavau” lea na ia talanoaina ai igoa. Ona vaai lea i igoa o meaai po o isi koneteina ma talanoa pe faapefea e igoa o loo i luga o nei aitema ona aafia ai o tatou manatu e uiga i ai. O a ni igoa se tolu mo i tatou na saunoa i ai Peresitene Nelson e tatau ona faamuamua nai lo isi igoa uma? E mafai faapefea e le faailoga “tama o le feagaiga” ona fesoasoani ia i tatou ia malamalama i faamanuiaga e mafai ona oo mai i le avea ai ma tagata o le aiga o Isaraelu? Faitau le 3 Nifae 20:25–27, ma talanoaina mea o loo aoao mai e nei fuaiupu ia i tatou e uiga i mea o loo faamoemoeina e le Alii mai ia i tatou o Ana fanau o le feagaiga.

  • E ui lava ua osia le feagaiga tumau-faavavau a le Atua ma ni tagata patino i le tele o seneturi, ae e mafai ona avea tagata uma ma se vaega o le feagaiga. Na aoao mai Elder Quentin L. Cook e faapea, “O i latou o e talia le talalelei a Iesu Keriso, tusa lava po o le a le tupuaga, e avea o se vaega o Isaraelu ua faapotopotoina.” E mafai ona e toe iloiloina le savali a Elder Cook “Faapotopotoga Saogalemu i le Aiga” e aoao atili ai e uiga i le taua o le avea ma se vaega o Isaraelu ua faapotopotoina. Talanoa i mea ua e aoaoina.

Aoao atili

Vaega 2

O le Faapotopotoina o Isaraelu o le Mea Aupito Sili lea Ona Taua o loo Tupu i le Lalolagi i le Taimi Nei

tamaitai faifeautalai

Sa faataapeapeina tagata Isaraelu anamua ona sa latou teena Ieova ma sa le faamaoni i a latou feagaiga ma Ia (tagai Levitiko 26:33; Teuteronome 4:23–27). O lenei faataapeapeina na tupu i le aluga o taimi, a o faatoilaloina le fanauga a Isaraelu e isi atunuu ma aveina faatagataotaua (tagai i le 2 Tupu 17:6–23; 25:1–12; 1 Nifae 22:3–5). Ae o le mea e sili ona faanoanoa ai, o le toatele o i latou na leiloa lo latou lagona o le faasinomaga o ni tagata o le feagaiga a le Atua (tagai 2 Nifae 6:8–11).

Ae sa lei galo lava i latou i le Alii. Na Ia folafola mai o le a Ia faapotopotoina Lona nuu pe a uma ona faataapeapeina i latou mo se taimi (tagai i le 2 Nifae 10:6–8; Mataupu Faavae ma Feagaiga 33:6). Ua faapotopotoina tagata o le Atua a o latou oo i se malamalamaaga o le talalelei a Iesu Keriso ma o mai ia te Ia (tagai 1 Nifae 19:16).

Na aoao mai le Perofeta o Iosefa Samita e faapea, o le faamoemoega autu lava o le faapotopotoina o tagata o le Atua o le fesoasoani lea ia i latou ia maua sauniga o le malumalu ma saunia i latou mo le faaolataga. O le faapotopotoina o Isaraelu ua faataapeapeina ua tutusa lava le taua i le taimi nei e pei ona sa i ai i le taimi o le Perofeta o Iosefa. Na ta’ua e Peresitene Russell M. Nelson “o le faamoemoegasilisili ma o le galuega silisili lea i le lalolagi i aso nei.” O le auala lea e mafai ai e fanau a le Atua ona iloa ma iu ai ina toe foi atu ia te Ia.

Mea e mafaufau i ai

  • Sa saunoa soo Peresitene Nelson e uiga i le taua o le faapotopotoina o Isaraelu. Na ia folafola mai: “O loo faapotopotoina e le Alii i latou o le a filifili e avea le Atua ma faatosinaga sili ona taua i o tatou olaga. Mo le tele o seneturi, na valo’ia ai lava e perofeta lenei faapotopotoina, ma o loo tupu i le taimi nei lava! I le avea ai ma se teuteu ala taua i le Afio Mai Faalua o le Alii, o le galuega aupito sili ona taua lea i le lalolagi!” Mafaufau po o le a le uiga o lenei mea o le “galuega aupito sili ona taua” lea i le lalolagi. E mafai faapefea e lenei malamalama ona fesoasoani ia te oe e filifili ai pe faapefea ona e faaaluina lou taimi, taleni, malosi, ma punaoa?

Gaoioiga mo le aoao faatasi ma isi

matuāmoa o loo ofoofota’i tama’imoa

  • E mafai ona e suesueina le 3 Nifae 10:5–6 ma le Mataupu Faavae ma Feagaiga 29:1–8 ma talanoaina pe faapefea ona faapotopoto e le Alii Lona nuu i aso e gata ai. E faapefea ona pei le faapotopotoina o Isaraelu o se matuāmoa o loo faapotopotoina lana toloai? A o e mafaufau loloto i nei fuaitau o mau ma le fesili lenei, vaai i le ata o loo i ai faatasi o se matuāmoa ma se toloai. Faasoa atu i le tasi ma le isi faamatalaga mai le ata e foliga mai e taua. E faapefea ona fesoasoani nei faamatalaga ia te oe e malamalama ai i mea e finagalo le Alii e aoao mai ia i tatou e uiga i le faapotopotoina? E faapefea ona puipuia i tatou faaletino ma faaleagaga a o tatou faapotopoto faatasi ma isi Au Paia?

  • E mafai ona e matamata i le vitio “Jesus Christ Prophesies of the Gathering of Israel” e aoao atili ai e uiga i le faapotopotoina i o tatou aso. O le a le mea ua aoao mai e le Faaola i lenei tala e uiga i le auala o le a faataunuuina ai le faapotopotoina o Isaraelu? Talanoa e uiga i mea ua e aoaoina ma le auala e talafeagai ai ia i tatou i aso nei.

Aoao atili

Vaega 3

Ua I Ai i le Au Paia o Aso e Gata Ai se Tiutetauave e Fesoasoani i le Alii e Faapotopoto Isaraelu

o alii talavou o loo fefaasoaa’i i tusitusiga paia

O le faapotopotoina o Isaraelu e faaleagaga ma faaletino (tagai 1 Nifae 22:3; Mataupu Faavae o le Talalelei [2011],248). E lei leva ona toefuatai mai le Ekalesia a Iesu Keriso, ae poloaiina e le Alii le Au Paia e faapotopoto faaletino i Katelani, Ohaio; Initipene, Misuri; Navu, Ilinoi; ma mulimuli ane ai i le Vanu o Sate Leki. O le asō, nai lo le faapotopoto i se nofoaga se tasi, e fausia e tagata o le Ekalesia le Ekalesia a le Alii i eria o loo latou nonofo ai a o latou faapotopoto atu i le Faaola—i Lana aoaoga faavae ma Ana feagaiga (tagai i le 2 Nifae 10:2).

Ua i ai i tagata o le Ekalesia se tiute e fesoasoani i le faapotopotoina (tagai Mataupu Faavae ma Feagaiga 29:2, 7; 88:81; Aperaamo 2:10–11). O le faasoaina atu o le talalelei o se vaega taua o lena taumafaiga. E faapena foi galuega o le malumalu ma talafaasolopito o aiga, a o tatou saili e fesoasoani e faapotopoto Isaraelu i totonu o e o ola ma e ua maliliu.

Mea e mafaufau i ai

  • Na faamamafa mai e Elder Ronald A. Rasband le taua o le galuega faafaifeautalai i le fesoasoani e faapotopoto Isaraelu. Na ia saunoa mai: “O loo tatou faapotopotoina fanau a le Atua i nei aso e gata ai ina ia mafai ona latou maua ‘faamanuiaga e liligi mai i o latou luga’ [3 Nifae 10:18] ma folafolaga o ‘oa o le faavavau’ [Mataupu Faavae ma Feagaiga 78:18]. O le faaiuga o lena mea ia faapotopotoina Isaraelu tatou te manaomia faifeautalai—e toatele atu nisi nai lo i latou o auauna atu nei. … I le avea ai ma se Aposetolo a le Alii o Iesu Keriso, ou te valaaulia oe ia e auauna atu o se faifeautalai i le faapotopotoina o Isaraelu.” Mafaufau pe faapefea ona e fesoasoani i le Alii e faapotopoto Lona nuu—pe o i ai pe leai foi se valaauga aloaia o se faifeautalai. Tusi faamaumau uunaiga e te maua, ma faatino.

Gaoioiga mo le aoao faatasi ma isi

  • Faitau faatasi le Mataupu Faavae ma Feagaiga 18:10–16 , ma faasoa atu i le tasi ma le isi ou lagona e uiga i lagona o le Atua e uiga i Ana fanau. Aisea e taua tele ai le galuega o le faapotopotoina o Ana fanau ia te Ia? O a mea tatou te maua i nei mau e uunaia ai i tatou e fesoasoani e faapotopoto Isaraelu?

  • E mafai faapefea ona tatou fesoasoani e faapotopoto Isaraelu? Mafaufau loloto i le faamalamalamaga mamana lenei mai ia Peresitene Nelson: “Soo se taimi e te faia ai soo se mea e fesoasoani ai i soo se tasi—i itu uma o le veli—fai se laasaga agai i luma i le osia o feagaiga ma le Atua ma maua o latou sauniga e tatau ai o le papatisoga ma le malumalu, ua e fesoasoani e faapotopoto Isaraelu. E faigofie lava.” Atonu e malie le faia o se lisi o gaoioiga o se vaega o le faapotopotoina o Isaraelu. Vaai po o ai e mafai ona faia le lisi aupito umī! E mafai foi ona outou faasoa atu i le tasi ma le isi nisi o mea na outou faia i lenei vaiaso—pe ua outou fuafua e fai i le vaiaso a sau—e fesoasoani ai i le galuega tele o le faapotopotoina o Isaraelu. (O faataitaiga e mafai ona aofia ai le aoaoina o se vasega o le Peraimeri po o le Aoga Sa, faia o talafaasolopito o aiga, auai i le malumalu, faasoaina atu o se mau i luga o ala o faasalalauga faaagafesootai, po o le fesoasoani i se tasi e manaomia le fesoasoani.) O a faamanuiaga ua e vaaia a o e fesoasoani i le Atua i Lana galuega o le faapotopotoina o Ona tagata ia te Ia?

Aoao atili