Fanau a le Atua

O le Atua o lo tatou Tama Faalelagi alofa. O i tatou moni lava o Ona afafine ma atalii agaga. Na aoao mai le Aposetolo o Paulo: “O le Agaga lava ia e molimau i o tatou agaga, o fanau i tatou a le Atua .” E pei lava ona foliga le toatele o i tatou i o tatou matua faalelalolagi, ua foafoaina i tatou i le faatusa o le Atua: E i ai Sona tino o aano ma ivi e pei o i tatou, ma sa faia i tatou ia foliga ia te Ia.

Ona o i tatou uma o fanau a le Atua, o tagata uma na fananau mai i le lalolagi o ni o tatou uso po o tuafafine agaga. Ma talu ai o i tatou o fanau agaga a le Atua, ua tofu maua ai e i tatou taitoatasi le gafatia e atiina ae ai Ona uiga auaumama paia. E ala i le alofa tunoa o Iesu Keriso ma Lana taulaga togiola lea e mafai ai e i tatou ona faatoilalo o tatou vaivaiga, agasala, ma le oti, e mafai ai ona avea i tatou e faapei o lo tatou Tama Faalelagi ma maua se atoatoaga o le olioli.

Sa tofu i tatou ma o tatou lava faasinomaga i le lagi. Mo se faataitaiga, ua tatou iloa, o i tatou o atalii ma afafine o ni matua faalelagi—ua i ai so tatou faasinomaga e faavavau o ni alii ma ni tamaitai. Sa faamanuiaina foi i tatou i taleni ma tomai eseese, ma sa valaauina i tatou e faia ni mea patino i le lalolagi.

E le mafai ona tatou manatua lo tatou muai olaga, ae sa tatou nonofo ai iina ma o tatou matua faalelagi ae tatou te lei o mai i le lalolagi. E silafia e lo tatou Tama oi le Lagi o ai i tatou ma mea sa tatou faia ae tatou te lei o mai iinei. I le avea ai ma se vaega o Lana fuafuaga o le faaolataga mo i tatou, na Ia auina mai i tatou i le lalolagi i lenei taimi ina ia mafai ona tatou maua se tino faaletino, aoao mai o tatou lava aafiaga e filifili le lelei, ma tuputupu ae faaleagaga.

A o tatou ola e tusa ai ma lo tatou gafatia paia o ni fanau a le Atua—a o tatou faia le mea sili tatou te mafaia e mulimuli ai ia te Ia ma usitai i tulafono ma sauniga o le talalelei—o le a matuai faamanuiaina i tatou ma e mafai foi ona faamanuia ai olaga o isi e ala i a tatou taleni ma uiga faaletagata lava ia. O le a faamanuiaina foi i tatou e faavavau i le olaga a sau pe a tatou toe foi atu e mau faatasi ma Ia ma toe faatasi ma o tatou aiga.