Te « ’ōpanira’a » i Ghana

E misiōnare Alice Johnson e tāvini ra i roto i tōna fenua ’āi’a, i Ghana. E mea au roa nāna e fa’a’ite i tōna ’itera’a pāpū nō Iesu Mesia ’e e tauturu i te ’Ēkālesia ’ia tupu i te rahi.

Te Feiā Mo’a, 4:416–17

I te hō’ē mahana, ’ua fa’ari’i Alice te hō’ē parau ’āpī māuiui. ’Ua parau te fa’aterera’a hau nō Ghana ē, e’ita te mau rurura’a a te ’Ēkālesia e tupu fa’ahou. E’ita te mau misiōnare e ha’api’i fa’ahou.

Te Feiā Mo’a, 4:417

’Ua fa’ahepo te mau muto’i i te mau misiōnare ’ia fa’aru’e i tō rātou fare, ’e ’ua haru i tō rātou mau pere’o’o ta’ata’ahi. ’Ua tu’uhia vetahi mau melo o te ’Ēkālesia i roto i te fare tāpe’ara’a. ’Ua pōnao te mau fa’ehau i te mau fare purera’a a te ’Ēkālesia ’e ’aita i vaiiho i te hō’ē ta’ata ’ia tomo atu i roto. ’Ua pi’i te ta’ata i te reira « te ’ōpanira’a ».

Te Feiā Mo’a, 4:417–18

E ti’a i te mau misiōnare e ho’i i tō rātou fenua. ’Ua haere atu Alice e ora i pīha’i iho i te hō’ē hoa i roto i te tahi atu ’oire. Tē pe’ape’a nei ’oia ē, e’ita roa atu ’oia e fa’aoti i tāna misiōni.

Te Feiā Mo’a, 4:418

’Ua ta’a ’ore roa te feiā mo’a i Ghana, ’ua ’oto ’e ’ua māta’u. ’Ua uiui rātou e aha te ’ohipa hape tā rātou i rave. E nehenehe ānei rātou e ho’i fa’ahou i te purera’a ?

Te Feiā Mo’a, 4:418

Noa atu ’aita rātou e nehenehe e putuputu ’e tā rātou pāroita, tē here noa ra te feiā mo’a i te Fatu ’e ’ua hina’aro e ha’amori iāna. ’Ua fa’atupu rātou i te purera’a ’ōro’a i tō rātou fare. Te mau melo o te ’utuāfare tē vai ra te autahu’ara’a, ’ua ha’amaita’i i te pāne ’e te pape ’e ’ua ’ōpere i te reira i te toe’a o te ’utuāfare.

Te Ha’api’ira’a Tumu ’e te mau Fafaura’a 6:32 ; Te Feiā Mo’a, 4:419

’Ua tāmau noa te ’ōpanira’a, te ’āva’e i muri mai te ’āva’e. ’Ua hīmene te feiā mo’a i te mau hīmene ’e ’ua ha’api’i i te tahi ’e te tahi i te ’evanelia i roto i tō rātou fare. ’Ua rātou e fārerei i te tahi ’e te tahi nō te tauturu ’ia tāpe’a pūai noa i tō rātou fa’aro’o. ’Ua ha’apae rātou i tā rātou tuha’a ’ahuru i te hiti, nō te ’aufau atu i te taime e nehenehe ai rātou e ho’i fa’ahou i te fare purera’a. ’Ua pure rātou ’e ’ua ha’apae i te mā’a ’ia ’ore te ’ōpanira’a.

Te Feiā Mo’a, 4:436–37

I te pae hope’a, i muri a’e e 18 ’āva’e, ’ua fa’aoti te fa’aterera’a hau ē e nehenehe te ’Ēkālesia e fa’atupu fa’ahou i tāna mau purera’a. ’Ua ani te peresideni misiōni ’āpī e paraparau ia Alice, e pīahi ’oia i teienei i te fare ha’api’ira’a tuatoru. « E hina’aro ānei ’oe e ho’i fa’ahou mai ’e e tāvini i te hō’ē misiōni i muri a’e i te ha’api’ira’a ? » ’ua ui atu ’oia iāna. « ’Aita », ’ua pāhono atu Alice. « Tē hina’aro nei au e tāvini i teienei ! »

Te Feiā Mo’a, 4:437–39

’Ua ’oa’oa roa Alice ’e vetahi feiā mo’a i te ho’i-fa’ahou-ra’a i te purera’a ! I te sābati mātāmua i muri a’e i te ’ōpanira’a, ’ua tupu te purera’a ’ōro’a e piti hora, nō te mea e rave rahi tei hina’aro e fa’a’ite i tō rātou ’itera’a pāpū. ’Ua fa’ati’a rātou te tahi i te tahi e mea nāhea tō te Fatu ha’amaita’ira’a ia rātou ’e i te tauturura’a ia rātou ’ia tāpe’a pūai noa i tō rātou fa’aro’o.

Te Ha’api’ira’a Tumu ’e te mau Fafaura’a 20:75 ; Te Feiā Mo’a, 4:438