’Ua tauturu Martin Harris ia Iosepha

I te hō’ē mahana, tē ora ra Iosepha ’e ’o Emma i Pennsylvania, ’ua haere mai te hō’ē hoa e fārerei ia rāua, ’o Martin Harris te i’oa. E fare fa’a’apu rahi ta Martin i New York. ’Ua fa’aro’oro’o ’oia nō ni’a i te ’ohipa a Iosepha ’e te mau ’api ’auro. ’Ua tauturu ’oia ia Iosepha nā mua a’e, ’e i teienei tē hina’aro ra ’oia e ’ia ’ite ē, e aha atu ā tāna e nehenehe e rave nō te tauturu atu.

Saints, 1:49

’Ua māuruuru ’o Iosepha ’e ’o Emma. E rave rahi ta’ata tei mana’o ē, tē ha’avare ra Iosepha. E mea au ’ia ’ite ē e hoa mai ia Martin tei ti’aturi ē e parau pāpū te mau ’api ’auro.

Saints, 1:49

’A ’īriti ai Iosepha i te mau ’api, ’ua pāpa’i Martin i te mea tāna i parau. ’Ua ’oa’oa roa Martin i te tauturura’a i te Fatu i roto i teie ’ohipa rahi.

Saints, 1:50

’Aita te vahine a Martin, ’o Lucy, i ’oa’oa roa. ’Aita ’oia i ti’aturi ē, tē vai mau nei ia Iosepha ra te mau ’api ’auro. Tē mana’o ra ’oia ē, tē punu ra Iosepha ia Martin. ’Ua hina’aro ’oia ia Martin ’ia ho’i mai i New York ’e ’ia fa’aea i te tauturu ia Iosepha.

Saints, 1:49–50

’Ua tāmau noa rā Martin i te ’ohipa ’e ’o Iosepha. ’Ua mana’o ’oia ē, mai te mea e nehenehe tā Lucy e tai’o i te mea tā rāua e rave ra, e ti’aturi ato’a ’oia. ’Ua ani ’oia ia Iosepha e nehenehe ānei tāna e ’āfa’i i te mau ’api tā rāua i ’īriti i New York nō te fa’a’ite i tāna vahine. ’Ua parau atu Iosepha ē, e pure ’oia nō te ani i te Atua.

Saints, 1:50–51

’Ua parau te Fatu iāna ’eiaha e hōro’a i te mau ’api ia Martin ra. ’Ua ani Martin ia Iosepha ’ia pure fa’ahou ā. ’Ua pure Iosepha ’e ’ua fāri’i i te hō’ē ā pāhonora’a. ’Ua hina’aro mau rā Martin e fa’a’ite i tāna vahine i te mau ’api, ’e ’ua hina’aro roa Iosepha e tauturu i tōna hoa. ’Ua pure Iosepha nō te toru o te taime. I taua taime ra, ’ua parau te Atua ia Iosepha ē, e nehenehe tāna e fa’aoti e aha tē rave.

Saints, 1:51

’Ua parau Iosepha ia Martin e nehenehe tāna e ’āfa’i i te mau ’api i New York, e fa’a’ite noa rā i te tahi mau melo o tōna ’utuāfare. ’E tītauhia ’ia fa’aho’i mai i te mau ’api e piti hepetoma i muri mai. ’Ua fa’ari’i Martin ’e reva atu ra ma te mau ’api.

Saints, 1:51

I te revara’a Martin, ’ua fānauhia te hō’ē ’aiū ia Iosepha ’e ia Emma. ’Ua pohe rā te ’aiū, ’e ’ua ma’ihia ’o Emma. ’Ua ’oto roa ’o Emma ’e ’o Iosepha.

Saints, 1:51–52

’Ua ha’ape’ape’a roa Iosepha nō Emma. ’Ua ha’ape’ape’a ato’a ’oia nō Martin. ’Ua ma’iri nā hepetoma e piti, ’e ’aita ’o Martin i ho’i mai atu ra. ’Ua ha’ape’ape’a ato’a ’o Emma.

Saints, 1:52

’Ua parau Emma ia Iosepha ’ia haere i New York nō te ’imi ia Martin. ’Ua fārerei Iosepha ia Martin i te fare o tōna nā metua. I tō Iosepha anira’a ia Martin nō ni’a i te mau ’api, ’ua ’oto roa ’o Martin. ’Ua parau mai ra ’ua mo’e te mau ’api. ’Ua ’imi ’oia i te mau vāhi ato’a, ’aita rā i ’itehia mai.

Saints, 1:52–53

’Oto roa ihora Iosepha ’e ’ua mata’u ato’a. I ’ite ’oia ē, ’ua hape ’oia i te vaiihora’a ia Martin ’ia rave i te mau ’api. Ho’i atu ra i te fare ’e parau a’era ia Emma i te ’ohipa i tupu. ’Ua haere mai te melahi Moroni nō te rave i te mau ’api ’auro. ’Ua parau ’oia ē, mai te mea e vai ha’eha’a ’e e tātarahapa ’o Iosepha, e nehenehe tāna e fa’ari’i fa’ahou i te mau ’api ’e e ’īriti fa’ahou.

Te Ha’api’ira’a Tumu ’e te mau Fafaura’a 3:5–11 ; 10:1–3 ; Saints, 1:53–54

E rave rahi hepetoma te maoro tō Iosepha ferurira’a i te hape tāna i rave. ’Ua pure ’oia nō te ani i te fa’aorera’a hapa. ’Ua fa’a’ore te Atua i tāna hapa. ’Ua parau ’oia ia Iosepha ē, ’ua ’eiāhia te mau ’api e te mau ta’ata e tāmata ra i te tāpe’a i te ’ohipa a te Atua. ’Aita rā e ta’ata e nehenehe e tāpe’a i te ’ohipa a te Atua. E fa’anahora’a tā te Atua nō te fa’ahaere noa i tāna ’ohipa i mua.

Te Ha’api’ira’a Tumu ’e te mau Fafaura’a 3:1–10 ; Saints, 1:54–55

’Ua hōro’a fa’ahou mai Moroni i te mau ’api ia Iosepha ra. ’Ua parau te Atua ia Iosepha ’e ia Martin ē, mai te mea e mea ha’eha’a rāua ’e ’ua ti’aturi iāna, e nehenehe tā rāua e tāmau noa i te tauturu i tāna ’ohipa nā roto i te mau rāve’a rau. E nehenehe rātou e tauturu i te ’āfa’ira’a mai i te Buka a Moromona i tō te ao nei. E tauturu teie buka i te mau ta’ata i te mau vāhi ato’a ’ia tātarahapa ’e ’ia ti’aturi ia Iesu Mesia.

Te Ha’api’ira’a Tumu ’e te mau Fafaura’a 3:16–20 ; 5:21–35 ; Saints, 1:56–57