« Patu i te hiero nō Kirtland », Te mau ’ā’amu o Te Ha’api’ira’a Tumu ’e te mau Fafaura’a (2024)
« Patu i te hiero nō Kirtland », Te mau ’ā’amu o Te Ha’api’ira’a Tumu ’e te mau Fafaura’a
Tītema 1832–Māti 1836
Patu i te hiero nō Kirtland
Hō’ē fare ta’a ’ē nō te Fatu
’Ua parau te Fatu ia Iosepha Semita ē, ’ua tae i te taime nō te feiā mo’a ’ia patu i te hō’ē fare ta’a ’ē i Kirtland. E riro teie fare ’ei hiero, hō’ē vāhi i reira te Fatu e fārerei ai i tōna mau ta’ata ’e e rave ai i te mau fafaura’a ’e rātou. E hōro’a ’oia ia rātou i te hō’ē hōro’a ta’a ’ē i roto i Tōna hiero ’Ua pi’i ’oia i te hōro’a hō’ē ha’amaura’a o te mana.
Te Ha’api’ira’a Tumu ’e te mau Fafaura’a 88:119 ; 95:8 ; Te Feiā Mo’a, 1:205
’Aita te feiā mo’a i ha’amata ’oi’oi i te patu i te hiero. Tau ’āva’e i muri mai, ’ua fa’aha’amana’o te Fatu ia rātou ē e mea faufa’a roa te hiero. ’Ua horo atu Hyrum Smith i te fare o tōna nā metua, nō te ha’aputu mai i te mau mauiha’a. I te anira’a tōna māmā iāna tē haere ra ’oia i hea, ’ua parau atu ’oia ē tē hina’aro nei ’oia ’ia riro ’ei ta’ata mātāmua nō te ’ohipa i ni’a i te fare o te Fatu.
Te Ha’api’ira’a Tumu ’e te mau Fafaura’a 95:1–8
’Ua ha’amata te feiā mo’a i Kirtland i te patu i te hiero. E mea moni rahi roa te reira ’e e mea rave rahi te ’ohipa. ’Ua hōro’a te mau melo o te ’Ēkālesia mai ia Sidney Rigdon e rave rahi moni nō te patu i te hiero. ’Ua ’ana’anatae rātou i te pe’e i te mau fa’auera’a a te Fatu, ’e ’ia fa’ari’i i tāna mau ha’amaita’ira’a i roto i Tōna fare.
Te Feiā Mo’a, 1:209–211
’A ’ohipa ai te feiā mo’a i ni’a i te hiero, ’ua ha’amata rātou i te ’ere i te moni. ’Ua pe’ape’a roa Sidney ’e vetahi feiā fa’atere o te ’Ēkālesia. ’Ua pure Sidney i te Atua ’ia tauturu mai ia rātou.
Te Feiā Mo’a, 1:210–11
’Ua fa’aherehere te hō’ē melo o te ’Ēkālesia ’o Caroline Tippets te i’oa ’e tōna ’utuāfare e rave rahi moni. ’Ua vaiiho Caroline i te ’Ēkālesia ’ia tārahu i tā rātou moni nō te tauturu i te patura’a i te hiero.
Te Feiā Mo’a, 1:211–13
E rave rahi feiā mo’a i Kirtland tei ha’a itoito nō te patu i te hiero. ’Ua fa’ahoro vetahi i te mau pere’o’o tāvere tei ’ī i te mau ’ōfa’i e tae roa i te hiero. ’Ua hāmani vetahi i te mau ’ahu ’e te mā’a nā te feiā rave ’ohipa. ’Ua ha’aputu te mau tamari’i i te mau pēha’a hi’o pararī nō te fa’ahu’ahu’a, ’e ’ia tu’u atu i te reira i ni’a i te mau papa’i o te hiero, ’ia purapura ’e ’ia ’ana’ana i te mahana.
Te Feiā Mo’a, 1:210, 219, 221
’Aita i maoro roa ’ua oti te hiero ! E hina’aro rahi tō te feiā mo’a ’ia tomo atu i roto i te fare o te Fatu, nō te fa’ari’i i te mau ha’amaita’ira’a ’o tāna i fafau ia rātou.
Te Feiā Mo’a, 1:221