’Ua putuputu ’o Knight mā ’e te tahi atu mau ta’ata i Ziona

’Ua ora na Polly ’e ’o Joseph Knight ’e tō rāua ’utuāfare i New York. ’Ua mātau maita’i rāua i te peroheta Iosepha. I muri a’e i te ha’api’ira’a mai i te ’evanelia, ’ua mā’iti rāua e tomo mai i roto i te ’Ēkālesia. I tō te Fatu fa’auera’a i te feiā mo’a ’ia haere i Ohio, ’ua ha’apa’o te ’utuāfare Knight.

Te Ha’api’ira’a Tumu ’e te mau Fafaura’a 37 ; Te Feiā Mo’a, 1:33, 94, 109–110

’Ua ’oa’oa roa te ’utuāfare Knight i tō rātou taera’a atu i Ohio. ’Ua parau Leman Copley, hō’ē melo o te ’Ēkālesia, e nehenehe vetahi feiā mo’a e ora i ni’a i tōna fenua. ’Ua rava’i maita’i te vāhi nō te fa’a’apura’a ’e nō te patu i te mau fare. ’Ua ’ohipa itoito Joseph Knight ’e tāna mau tamaiti nō te fa’aineine i te mau fa’a’apu.

Te Feiā Mo’a, 1:126–27

I te hō’ē rā mahana, ’ua taui te mana’o o Leman nō ni’a i tōna fenua. ’Aita ’oia i hina’aro fa’ahou ’ia ora te feiā mo’a i reira. ’Ua parau ’oia ia Knight ma ’e te tahi atu mau ta’ata ’ia haere ’ē.

Te Feiā Mo’a, 1:127

’Ua ha’ape’ape’a te feiā mo’a. I teienei ’aita fa’ahou e vāhi nō rātou nō te ora. ’Ua ani rātou i te peropheta Iosepha e aha te mea e ti’a ia rātou e rave.

Te Ha’api’ira’a Tumu ’e te mau Fafaura’a 54 ; Te Feiā Mo’a, 1:127

Tē parau ra te Fatu ē, e ti’a i teie feiā mo’a e haere i Missouri ’e ’ia patu ia Ziona. E riro Ziona ’ei ’oire i reira te mau ta’ata o te Fatu e nehenehe ai e putuputu. I Ziona, e patu rātou i te hō’ē hiero i reira rātou e rave ai i te mau fafaura’a, ’aore rā te mau parau fafau ’e te Atua. E ha’amaita’i ’oia ia rātou mai te peu e ha’apa’o rātou i teie mau fafaura’a. ’Ua ’ana’anatae roa te ’utuāfare Knight ’ia haere atu.

Te Ha’api’ira’a Tumu ’e te mau Fafaura’a 29:1–8 ; 42:30–36 ; 45:59–66 ; 54:6–9 ; 57:1–2 ; Te Feiā Mo’a, 1:128

’A rātere ai te ’utuāfare Knight i Missouri, ’ua ro’ohia Polly i te ma’i rahi. ’Ua ha’ape’ape’a tāna tāne fa’aipoipo, ’o Joseph ’e tāna mau tamaiti, i te ’ore ’oia e ora maoro mai ā. ’Ua parau rā Polly i tōna ’utuāfare ē, tē hina’aro nei ’oia e tae i Ziona hou ’oia ’a pohe ai. E hina’aro teie tōna, hau atu i te mau mea ato’a !

Te Feiā Mo’a, 1:128

I muri a’e i te hō’ē tere roa, ’ua tae atu Knight ma i Missouri. ’Ua ha’amāuruuru rahi Polly i te Fatu, i te ora-maoro-ra’a ’oia nō te hi’o i te reira. ’Ua ’ite a’era Knight ma e mea nehenehe mau te fenua. E fa’aro’o tō rātou i tō rātou ’aravihi ’ia ha’apa’o i te fa’auera’a a te Fatu, nō te patu ia Ziona i reira.

Te Feiā Mo’a, 1:132

’Ua fa’ahiti te feiā mo’a i te hō’ē pure ta’a ’ē ’e ’ua pi’i i te fenua ’o Ziona, i reira te mau ta’ata o te Fatu e haere mai ai. ’Ua tu’u te peropheta Iosepha i te hō’ē ’ōfa’i nō te tāpa’o i te vāhi e vai ai te poro o te hiero. Tau mahana i muri noa mai, ’ua pohe Polly. ’Ua parau fafau te Fatu ē, te feiā mo’a e haere mai i Ziona ’e e pohe i reira, e parahi rātou i te ao ra.

Te Ha’api’ira’a Tumu ’e te mau Fafaura’a 59:1–2 ; Te Feiā Mo’a, 1:132–33