’Ua fa’a’ite Samuel Smith i te Buka a Moromona i te ta’ata

’Ua pi’i te Fatu ia Samuel Smith, te teina o Iosepha, i te misiōni nō te fa’a’ite i te ’evanelia. ’Ua fārerei Samuel ia John ’e Rhoda Greene, ’e ’ua parau ia rāua nō ni’a i te Buka a Moromona. E ’orometua ’o Ioane i roto i te tahi atu ’ēkālesia. ’Ua parau ’oia ē, e rave ’oia i te hō’ē nene’ira’a o te buka, ’e e hi’o ’oia e hina’aro ānei te ta’ata i roto i tāna ’Ēkālesia ’ia tai’o i te reira.

Saints, 1:99

Ma’a ’āva’e i muri mai, ’ua ho’i mai Samuel. ’Ua parau Rhoda ē, ’aita tāna tāne fa’aipoipo i ’ite i te hō’ē noa a’e ta’ata tei hina’aro e tai’o i te Buka a Moromona. ’Ua fa’aho’i mai ’oia i te reira ia Samuel ra.

Saints, 1:99

’Oto ri’i ’o Samuel. Tē haere ra ’oia, tāpe’a a’era Rhoda iana. ’Ua parau ’oia ē, ’ua tai’o ’oia i te Buka a Moromona, ’e ’ua au roa ’oia i te reira.

Saints, 1:99

’Ua parau te Vārua Maita’i ia Samuel ’ia hōro’a fa’ahou i te buka ia Rhoda. « E ani i te Atua ’ia hōro’a mai ia ’oe i te ’itera’a pāpū », ’ua parau Samuel iāna. ’Ua ha’api’i ’oia ia Rhoda nō ni’a i te Vārua Maita’i ’e nāhea ’oia ’ia ’ite ē e parau mau te Buka a Moromona.

Moroni 10:3–5 ; Saints, 1:99–100

’Ua ho’i ’o Samuel i te fare mai i tāna misiōni. ’Aita ’oia i bāpetizo i te hō’ē noa atu ta’ata, ’e e ’aore re’a ta’ata tei ’ana’anatae i te parau nō te Buka a Moromona.

’Ua pure Rhoda ’e John, ’e ’ua parau mai te Vārua Maita’i ia rāua ē, e parau mau te Buka a Moromona. I muri iho, ’ua fa’a’ite Rhoda i te buka i tōna taea’e, ia Brigham Young.

Saints, 1:100

’Ua ’imi noa ana Brigham ’e tōna hoa, ’o Heber Kimball, i te ’Ēkālesia mau a Iesu. ’Ua tai’o rāua i te Buka a Moromona. I ’imi noa ana rāua, ’e i pure ho’i nō ni’a i te ’evanelia a Iesu Mesia., fātata e piti matahiti te maoro.

I taua taime ra, ’ua haere Brigham ’e ’o Heber i te mau rurura’a a te ’Ēkālesia ’e tō rāua ’utuāfare. I te hō’ē o teie mau rurura’a, ’ua fa’aro’o Brigham i te hō’ē misiōnare i te fa’a’itera’a i tōna ’itera’a pāpū. E ’ere terā misiōnare i te ta’ata ’aravihi roa nō te ’ōrero, ’ua putapū rā Brigham i te Vārua Maita’i ’a paraparau ai ’oia. ’Ua ’ite Brigham ē, tē parau ra ’oia i te parau mau.

’Ua bāpetizohia ’o Brigham, Heber ’e tā rāua vahine fa’aipoipo, ’o Miriama ’e ’o Vilate. E mea here rātou i te Fa’aora ’e tāna ’evanelia. Tau matahiti i muri mai, ’ua pi’i te Fatu ia Brigham ’e ia Heber ’ei ’āpōsetolo nāna ’e ’ua tāvini rāua i te misiōni. Nō te mea ’ua fa’a’ite Samuel i te Buka a Moromona i te ta’ata, e rave rahi ta’ata tei tomo mai i roto i te ’Ēkālesia a te Fa’aora.

Te Ha’api’ira’a Tumu ’e te mau Fafaura’a 124:127–29 ; 126 ; Saints, 1:215–16