’Ua fārerei Newel ’e ’o Ann Whitney i te peropheta Iosepha

E fatu fare toa ’o Ann ’e ’o Newel Whitney i Kirtland, Ohio. ’Aita Ann i pa’ari ma te haerara’a i te hō’ē ’ēkālesia ’aita ato’a i ha’api’i mai nō ni’a i te Fatu, ’ua hina’aro rā ’oia ’ia mātau iāna. I muri mai i tōna ’e Newel fa’aipoipora’ahia, ’ua pure rāua e rave rahi taime ’e ’ua ani i te Fatu ’ia arata’i ia rāua.

Te Feiā mo’a, 1:111–12

I te hō’ē pō i roto i tā rāua pure, ’ua ’ite Ann ’e ’o Newel i te hō’ē ’ōrama. I roto i te ’ōrama, tē fa’aea ra te hō’ē ata i ni’a a’e i tō rāua fare. ’Ua ’ī rāua i te Vārua o te Atua. ’Ua hā’ati te ata ia rāua. I muri iho, ’ua fa’aro’o rāua i te hō’ē reo nā te ra’i mai. I te nā-’ō-ra’a mai ia rāua, « ’a fa’aineine ’ia fa’ari’i i te parau a te Fatu, nō te mea e tae mai te reira »,

Te Feiā mo’a, 1:111

I muri mai ma’a taime, ’ua haere atu Parley Pratt i Kirtland. ’Ua ha’api’i ’oia ’e tōna mau ho’a i te ’evanelia a Iesu Mesia. I te fa’aro’ora’a Ann i te mea tā rātou ha’api’i ra, ’ua ’ite a’era ’oia e parau mau te reira. ’Ua ho’i atu ’oia i te fare nō te fa’a’ite i te parau ’āpī ia Newel. ’Aita i maoro roa, ’ua bāpetizohia rāua.

Te Feiā,mo’a, 1:112

E piti ’āva’e i muri mai, ’ua haere te hō’ē tāne ’e te hō’ē vahine i te fare toa a Newel. ’Aita Newel i mātau ia rāua, ’ua aroha rima mai rā te tāne iāna ma te pi’i ia Newel i tōna i’oa. ’Ua parau te tāne, « ’O Iosepha vau, te peropheta ». ’Ua fa’ata’a mai ’oia ē, ’ua pāhono mai te Fatu i te mau pure a Newel. ’Ua tono mai ’oia ia Emma ’e ia Iosepha nō te fārerei ia Ann ’e ia Newel.

Te Feiā mo’a, 1:113

’Ua ’ite Newel ’e ’o Ann tē tupu mau nei tā rāua ’ōrama. ’Ua ani rāua ia Iosepha ’e ia Emma ’ia fa’aea mai ia rāua ra i tō rāua fare. ’Ua here roa Ann ’e ’o Newel ia Iesu ’e i tāna ’evanelia. ’Ua hōro’a rāua i tā rāua mau mea ato’a e vai ra i te Feiā mo’a ’e i te ’Ēkālesia a te Fa’aora.

Te Ha’api’ira’a Tumu ’e te mau Fafaura’a 38:23–27, 34–42 ; Te Feiā mo’a, 1:114