« E heheura’a nō Emma », Te mau ’ā’amu o te Ha’api’ira’a Tumu ’e te mau Fafaura’a (2024)
« E heheura’a nō Emma », Te mau ’ā’amu o te Ha’api’ira’a Tumu ’e te mau Fafaura’a
Tiurai 1830
E heheura’a nō Emma
Ma’itihia e te Fatu nō te rave i tāna ’ohipa
Tē taui ’oi’oi ra te orara’a o Emma ’e o Iosepha. ’Ua parau te Fatu ia Iosepha ē, e fa’aea ’oia i te rōtahi i ni’a i te fa’a’apu. E ha’amau maoti Iosepha i tōna taime i ni’a i te ha’api’ira’a i te ta’ata nō ni’a ia Iesu Mesia, ma te tauturu i te fa’atupura’a i te ’Ēkālesia a te Fatu i te rahi.
Te Ha’api’ira’a Tumu ’e te mau Fafaura’a 24:7–9 ; Saints, 1:96
E rave rahi uira’a tā Emma nō ni’a i teie tauira’a. ’Aita ’oia i ’ite e aha tē rave ’a tāvini noa ai Iosepha i te Fatu. E tauturu ato’a ānei ’oia i te Fatu ’e i tāna ’Ēkālesia ?
Saints, 1:96
’Ua paraparau te Fatu ia Emma nā roto i te hō’ē heheura’a tei hōro’ahia ia Iosepha. ’Ua pi’i ’oia iāna ’o « Emma Smith, tā’u tamāhine. » ’Ua parau ’oia ia Emma ē, ’ua mā’iti ’oia iāna ’e ’ua pi’i iāna nō te rave i tāna ’ohipa. E vahine ta’a ’ē ’oia, ’e e mau ’ohipa rarahi tāna e rave.
Te Ha’api’ira’a Tumu ’e te mau Fafaura’a 25:1–3
’Ua ani te Fatu ia Emma ’ia rātere nā muri ia Iosepha. ’Ua parau te Fatu ē, e fa’ata’a ’o Emma i te aura’a o te mau pāpa’ira’a mo’a ’e e ha’api’i ’oia i te mau melo o te ’Ēkālesia. ’Ua parau ’oia ia Emma ’ia tu’u iāna nā mua roa i roto i tōna orara’a ’e ’ia ha’apa’o i tāna mau fafaura’a. ’Ua parau fafau ’oia ia Emma ē, e fa’ari’i ’oia i tōna Vārua. ’Ua hina’aro ’oia iāna ’ia ha’api’i, ’ia tupu i te rahi ’e ’ia fa’ari’i i tāna mau ha’amaita’ira’a.
Te Ha’api’ira’a Tumu ’e te mau Fafaura’a 25:2, 6–10, 15
’Ua parau ato’a te Fatu ia Emma ē, e mea au nāna ’ia fa’aro’o i tāna mau tamari’i ’ia hīmene. ’Ua parau ’oia ē, e au te mau hīmene a tōna feiā mo’a mai te hō’ē pure iāna ra. ’Ua ani ’oia ia Emma ’ia hāmani i te hō’ē buka hīmene tā te feiā mo’a e fa’a’ohipa nō te hīmene ’āmui. ’Ua ’itehia mai ia Emma e rave rahi hīmene nehenehe nō ni’a i te Fatu ’e tāna ’evanelia, ’e ’ua tu’u i roto i te hō’ē buka hīmene.
Te Ha’api’ira’a Tumu ’e te mau Fafaura’a 25:11–12 ; Saints, 1:221–22
’Ua tāmau noa te orara’a o Emma ’e ’o Iosepha i te taui, ’ua ’ite rā ’o Emma ē, ’ua here te Fatu iāna ’e e fā tā te Fatu nōna. ’Ua tāvini ’oia i te Fatu ’e i te ta’ata ’ati a’e iāna. ’Ua tauturu ’oia i te ’Ēkālesia a Iesu ’ia tupu i te rahi.
Te Ha’api’ira’a Tumu ’e te mau Fafaura’a 25:13–15 ; Saints, 1:221–23