Te ’utuāfare Jackson

I muri a’e i te revara’a te pupu mātāmua feiā mo’a i te ’āfa’a nō Roto Miti, e rave rahi tauatini feiā mo’a tei pe’e ato’a atu. ’Ua rātere rātou i te hō’ē tere ātea roa, ’e ’ua tauturu te Fatu ia rātou. Hō’ē ’utuāfare tei rave i teie tere ’o te ’utuāfare Jackson ïa. ’Ua fa’aru’e rātou i tō rātou fare i te fenua Peretāne ’e ma te ’ana’anatae nō te haere atu e tauturu i te feiā mo’a ’ia patu ia Ziona.

Te Ha’api’ira’a Tumu ’e te mau Fafaura’a 136:1–11 ; Te Feiā Mo’a, 2:222–23

’Ua fano atu Jackson mā nā te moana i ni’a i te hō’ē pahī. I muri iho, nō te hō’ē tuha’a o te ’ē’a i te ’āfa’a nō Roto Miti, ’ua rave rātou i te pere’o’o ’auahi. I muri mai, ’ua tītauhia ia rātou e haere ’āvae nō te toe’a o te ’ē’a.

Te Feiā mo’a, 2:222–23

’Ua hāmani rātou i te hō’ē pere’o’o huti rima na’ina’i nō te fa’auta i tā rātou mā’a, te ’ahu ’e te tahi atu ā mau mea tā rātou i hina’aro i te ’āfa’i atu. E rave rahi feiā mo’a tei nā reira nō te tae atu ma te pāruruhia i te ’āfa’a.

Te Feiā Mo’a, 2:223–26

E huti Elizabeth ’e ’o Aaron i tō rātou pere’o’o huti rima teiaha. E haere ’āvae noa ïa tā rāua mau tamari’i, ’o Martha, Mary ’e ’o Aaron tamaiti. E ’ohipa fifi mau te reira. ’Ua ti’aturi rātou e tāpae rātou i te ’āfa’a hou te tau to’eto’e. Terā rā, ’a tae mai ai te tau ha’apohera’a rā’au, e mea ātea ā te ’ē’a. ’Ua ha’amata te to’eto’e, ’e ’ua ha’amata tā rātou mā’a i te pau.

Te Feiā Mo’a, 2:223–26, 229, 231–32

I te ’oire nō Roto Miti, ’ua ’ite Brigham Young nō te taera’a mai te feiā mo’a i te ’āfa’a. ’Ua pe’ape’a roa ’oia nō rātou. I te mahana nō muri iho i te fare purera’a, ’ua parau ’oia i te tā’āto’ara’a ē, tē fifi nei teie feiā mo’a. ’Ua ani ’oia ia rātou ’ia fa’atomo i te mau pere’o’o huti i te mau mea e hina’arohia e te feiā mo’a. « ’A haere ’e ’a ’āfa’i mai i teie mau ta’ata », ’ua parau ’oia.

Te Feiā Mo’a, 2:229–30

’Ua tatara te mau vahine e vai ra i roto i te rurura’a i tō rātou mau tōtini māhanahana ’e ’ua tu’u atu i te reira i roto i te mau pere’o’o. ’Ua hōro’a vetahi i tā rātou mā’a, te ’ahu ta’oto, te tīa’a ’e te ’ahu. E piti mahana i muri mai, hau atu i te 50 ta’ata ’e e 20 pere’o’o huti tei fa’aru’e i te ’āfa’a nō te haere atu e tauturu.

Te Feiā Mo’a, 2:230

’A tāmau noa ai te ’utuāfare Jackson i te haere ’āvae, ’ua ha’amata te hiona i te topa mai. ’Ua ro’ohia Aaron i te ma’i rahi. E mea fifi roa nōna ’ia haere ’āvae noa. E ti’a i te feiā mo’a ’ia haere nā roto i te hō’ē ’ānāvai to’eto’e, ’e nā te reira i ha’aparuparu fa’ahou atu ā ia Aaron. I taua pō ra, ’ua fa’aru’e mai Aaron. Te mea ’oto roa, e ti’a i tōna ’utuāfare ’ia tāmau i te haere ’aita ’oia.

Te Feiā Mo’a, 2:232–34

I te po’ipo’i a’e, ’ua rahi atu ā te hiona i ni’a te repo. ’Ua tūra’i ’e ’ua huti Jackson mā ’e vetahi atu feiā mo’a i tō rātou pere’o’o huti rima nā roto i te hiona. ’Ua pure rātou i te mau mahana ato’a ’ia tauturu mai te Atua ia rātou.

Te Ha’api’ira’a Tumu ’e te mau Fafaura’a 136:29 ; Te Feiā Mo’a, 2:234–35

I te hō’ē pō, tē ha’ape’ape’a ra Elizabeth nō tāna mau tamari’i. ’Ua po’ia ’e ’ua to’eto’e roa rātou. E tāpae ānei rātou i te ’āfa’a nō Roto Miti ? ’Ua vare’ahia ’oia i te ta’oto ’e ’ua moemoeā ē tē ’ite ra ’oia ia Aaron. ’Ua nā ’ō mai Aaron, « ’a fa’aitoito, Elizabeth ». ’Ua parau ’oia ia Elizabeth ē, tē tae mai ra te tauturu.

Te Feiā Mo’a, 2:235–36

’Ua tano roa Aaron. ’Aita i maoro roa, ’ua tae mai te mau ta’ata nō Roto Miti ’e tō rātou pereo’o huti. ’Ua hōro’a rātou i te mā’a ’e te ’ahu i te feiā mo’a. ’Ua ’ūmere te feiā mo’a ’e ’ua ’ata’ata ’e ’ua tauahi i te mau ta’ata. ’Ua hīmene rātou i te hō’ē hīmene purera’a ’e ’ua ha’amāuruuru i te Metua i te ao ra nō te pāhonora’a i tā rātou mau pure.

Te Ha’api’ira’a Tumu ’e te mau Fafaura’a 136:28 ; Te Feia Mo’a, 2:236

I te taera’a atu rātou i te ’āfa’a, e sābati te reira mahana. ’Ua parau Brigham Young i te mau melo o te ’Ēkālesia nō Roto Miti, ’āhiri i te haerera’a i te purera’a, ’ia haere atu rātou e fa’ari’i poupou i te feiā mo’a ’o tei tae mai. ’Ua fa’ari’i rātou i te feiā mo’a tei to’eto’e ’e tei rohirohi ’e ’ua ani manihini i te feiā mo’a ’ia fa’aea mai i roto i tō rātou mau fare.

Te Feiā Mo’a, 2:239–40