Maria ’e Caroline Rollins

12 matahiti tō Mary Rollins ’a haere mātāmua mai ai te mau misiōnare i Kirtland, Ohio. ’Ua fa’aro’o ’oia ia rātou ’ia paraparau nō ni’a i te Buka a Moromona. I taua taime ra, hō’ē ana’e hōho’a o te buka i Kirtland, ’e hō’ē ti’a fa’atere o te ’Ēkālesia ’o Isaac Morley te i’oa.

’Ua haere atu Mary i te fare o te taea’e Morley ’e ’ua ani ’ia hi’o i te buka. ’Ua vaiiho te taea’e Morley iāna ’ia tāpe’a i te reira. ’Ua ani Mary e nehenehe ānei iāna e ’āfa’i i te reira i tōna fare.

’Aita te taea’e Morley i hina’aro e hōro’a ia Mary i tāna hōho’a buka. ’Aita ā ’oia i tai’o rahi roa atu i te reira. ’Ua tāparu Mary i te taea’e Morley ’ia vaiiho iāna ’ia rave i te reira.

’Ua fa’ari’i te taea’e Morley. ’Ua parau ’oia e nehenehe Mary e ’āfa’i i te buka i te fare, mai te peu e fa’aho’i ’oi’oi mai ’oia i te reira i te mahana i muri iho. ’Ua fa’ariro Mary i te reira mai te hō’ē tao’a faufa’a rahi. ’Ua vai ara noa ’oia fātata i te tā’āto’ara’a o te pō nō te tai’o.

I tō Mary fa’aho’ira’a i te buka, ’ua māere te taea’e Morley i te rahira’a o tāna i tai’o. « E ’aiū ē », ’ua parau ’oia, « ’a fa’aho’i i teie buka i te fare ’e ’a fa’aoti i te reira. E nehenehe au e tīa’i ».

’O Mary te ta’ata mātāmua i Kirtland tei tai’o i te tā’āto’ara’a o te Buka a Moromona. Tau taime ri’i i muri mai i tōna fa’aotira’a, ’ua fārerei atu ’oia i te peropheta Iosepha Semita. I te ’itera’a Iosepha i te here rahi o Mary i te Buka a Moromona, ’ua parau atu ’oia e nehenehe Mary e tāpe’a i te buka a te taea’e Morley nāna. E hōro’a ’oia i te tahi nā te taea’e Morley.

I muri a’e i taua ā matahiti ra, ’ua fa’anu’u Mary ’e tōna ’utuāfare i Independence, Missouri. ’Ua ’oa’oa roa ’oia i te hi’ora’a i te feiā fa’atere o te ’Ēkālesia e ha’amata ra e pāpa’i ’āmui i te hō’ē buka ’āpī tei pi’ihia te Buka o te mau fa’auera’a. Tei roto i teie buka e rave rahi heheura’a tā Iesu Mesia i hōro’a ia Iosepha Semita.

Te Ha’api’ira’a Tumu ’e te mau Fafaura’a 67 ; 70:1–4 ; Te Feiā Mo’a, 1:178

Terā rā ’aita vetahi mau ta’ata nō Independence e au ra i te ’Ēkālesia. ’Ua hina’aro rātou ’ia haere ’ē te feiā mo’a. I te hō’ē mahana, ’ua tomo te mau ta’ata riri i roto i te fare patu i reira te Buka o te mau fa’auera’a e nene’ihia ai. ’Ua tāora rātou i te mātini nene’ira’a nā te ha’amāramarama ’e ’ua ha’apuehu i te mau ’api o te Buka o te mau fa’auera’a nā ni’a i te purūmu.

Te Feiā Mo’a, 1:177–78

Tē hi’ohi’o ra Mary ’e tōna tuahine ’o Caroline i muri mai i te hō’ē ’āua. ’Ua parau Mary ia Caroline ē, ’ua hina’aro ’oia e ti’i mai i te mau ’api hou te reira ’a ’ino roa atu ai. ’Ua mata’u Caroline i te mau ta’ata riri. « E taparahi pohe rātou ia tāua », ’ua parau atu ’oia. ’Ua ’ite rā Mary ’e ’o Caroline ē, tei roto i teie mau ’api te parau a te Atua.

Te Feiā Mo’a, 1:178

’Ua tīa’i nā tuahine ’ia ’ore te mau tāne e hi’o mai. I muri iho, ’ua horo atu rāua i ni’a i te purūmu ’e ’ua ’ohi mai e rave rahi ’api e roa’a ia rāua i te ’ohi mai. ’A ātea ai rāua i te horora’a, ’ite mai ra te tahi mau ta’ata ia rāua ’e ’ua tuō ia rāua ’ia fa’aea. ’Ua tāpe’a ha’avī Mary ’e ’o Caroline i te mau ’api ’e ’ua horo vitiviti mai tā rāua e nehenehe nā roto i te hō’ē fa’a’apu tō papa’ā tāpiri mai.

Te Feiā Mo’a, 1:178–79

E piti ta’ata tei a’ua’u i nā tuahine i roto i te fa’a’apu tō papa’ā. Nō te teitei o te mau tō papa’ā, ’aita Mary ’e ’o Caroline i ’ite tē haere nei rāua i hea. ’Ua tīraha rāua i ni’a i te repo ’e ’ua huna i te mau ’api i raro a’e i tō rāua tino. ’Ua fa’aro’o hau noa rāua i nā ta’ata e haere ra nā roto i te uru tō papa’ā nō te ’imi ia rāua.

Te Feiā Mo’a, 1:179

’Aita i maoro, ’ua fa’aru’e te mau ta’ata i te ’imi ia rāua. ’Ua pāruruhia Mary ’e ’o Caroline. ’Ua fa’aora rāua i te mau ’api o te mau heheura’a a te Fatu nō te Buka o te mau fa’auera’a. I teie mahana tei roto teie mau heheura’a i te buka Te Ha’api’ira’a Tumu ’e te mau Fafaura’a.

Te Feiā Mo’a, 1:179