« Te putuputura’a i Ohio », Te mau ’ā’amu o Te Ha’api’ira’a Tumu ’e te mau Fafaura’a (2024)
« Te putuputura’a i Ohio », Te mau ’ā’amu o Te Ha’api’ira’a Tumu ’e te mau Fafaura’a
Tītema 1830–Mē 1831
Te putuputura’a i Ohio
Te fa’aro’o o Lucy Smith ’e te hō’ē temeio
I Ohio, tē rahi-noa-atu ra te mau ta’ata e tomo mai ra i roto i te ’Ēkālesia. ’Ua parau te Fatu ia Iosepha Semita ē, e ti’a i te mau feiā mo’a e ora ra i te tahi atu mau vāhi, ’ia putuputu mai i Ohio. E riro te reira ’ei tere roa. ’Ua fafau mai rā te Fatu ē, i muri a’e i tō rātou putuputura’a mai, e ha’api’i ’oia i te feiā mo’a i tāna ture ’e e ha’amaita’i ia rātou, ma te hōro’ara’a ia rātou te mana nō te rave i tāna ’ohipa.
Te Ha’api’ira’a Tumu ’e te mau Fafaura’a 37 ; 38:32 ; Te feiā mo’a, 1:109–110
’Ua fa’aru’e te metua vahine o Iosepha, ’o Lucy ’e te hō’ē pupu fātata e 80 melo o te ’Ēkālesia i tō rātou mau fare i New York ’e ’ua haere atu i Ohio. ’Ua pa’uma rātou i ni’a i te hō’ē pahī ’o tē ’āfa’i ia rātou nō te tahi tuha’a o tō rātou tere. I muri a’e te tahi tau mahana i te rāterera’a, ’ua mau te pahī. ’Ua tāpe’a te pape pa’ari me’ume’u i tō rātou tere.
Te feiā mo’a, 1:121–22
’Ua tītauhia te feiā mo’a e tīa’i ’ia pararī te pape pa’ari. ’Ua rohirohi roa rātou, ’ua po’ia, ’ua rari ’e ’ua to’eto’e.
Te Feiā mo’a, 1:122
E mea fifi roa te tīa’ira’a. ’Ua ha’amata vetahi feiā mo’a i te tātama’i te tahi ’e te tahi.
Te Feiā mo’a, 1:122
’Aita Lucy e au ra e fa’aro’o i te feiā mo’a ’ia tātama’i. ’Ua ’ite ’oia e ti’a iāna ’ia parau i te hō’ē mea. « Tei hea tō ’outou fa’aro’o ? », tāna ïa i ui. ’Ua parau Lucy i te feiā mo’a ē, mai te peu e pure rātou i te Atua, e vāvāhi ’oia i te pape pa’ari, ’ia ti’a ia rātou ’ia tāmau ā i tō rātou tere.
Te Feiā mo’a, 1:122–23
I reira iho, ’ua fa’aro’o rātou i te hō’ē haruru mai te pātiri ra i te huru, ’a pararī ai te pape pa’ari. ’Ua matara te hō’ē ’ē’a i roto i te pape pa’ari, e rava’i maita’i te ’ā’ano nō tō rātou pahī ’ia tere nā roto.
Te Feiā mo’a, 1:123
’Ua māere ’e ’ua māuruuru roa te feiā mo’a. ’Ua putuputu rātou nō te pure ’e nō te ha’amāuruuru i te Metua i te ao ra. ’Ua rātere tō rātou pahī ma te fifi ’ore i Ohio.
Te Feiā mo’a, 1:123
I te taera’a te feiā mo’a i Ohio, ’ua fāri’i poupou mai te mau melo o te ’Ēkālesia i reira ia rātou, ’e ’ua tauturu ia rātou ’ia ’ite mai i te hō’ē vāhi nohora’a. ’Ua tāpe’a te Fatu i tāna fafaura’a ’ia ha’api’i ia rātou i tāna ture ’e ’ia hōro’a ia rātou i te mana nō te rave i tāna ’ohipa.
Te Ha’api’ira’a Tumu ’e te mau Fafaura’a 42 ; Te Feiā mo’a, 1:126