Te ’utuāfare Martins

Tē ho’i ra Helvécio Martins i te fare nā te ’ohipa mai i Rio de Janeiro, i Peretīria. Nō te rahi o te mau pere’o’o i ni’a te purumu, ’aita hō’ē noa a’e e nu’u ra i mua. Tē feruri ra Helvécio i tōna orara’a. E ’ohipa maita’i tāna. ’Ua here ’oia i tāna vahine, ’o Rudá, ’e i tāna nā tamari’i, ’o Marcus ’e ’o Marisa. Terā rā, e au ra iāna tē vai ra hō’ē ’ohipa tē ’erehia ra iāna.

Te Feiā Mo’a, 4:229–30

’Ua haere mai Helvécio i rāpae i te pere’o’o ’e ’ua ha’amata i te pure. « E tō’u Atua », ’ua parau ’oia, « ’ua ’ite au ē, tē vai ra ’oe i te hō’ē vāhi, ’aita rā vau i ’ite i hea ». ’Ua parau ’oia i te Metua i te ao ra ē, tē ’imi nei tōna ’utuāfare i te hō’ē ’ohipa, ’e tē hina’aro nei rātou i tāna tauturu. I muri iho, ’ua pa’uma atu Helvécio i roto i tōna pere’o’o ’e ’ua ho’i atu i te fare.

Te Feiā Mo’a, 4:230

I muri mai, ’ua tono atu te Fatu i te mau misiōnare nō te fenua Marite. ’Ua haere rātou e fārerei i te ’utuāfare Martins. ’Ua ’ite mai Helvécio ē, tē ’āfa’i mai ra rātou i te hō’ē vārua hau i roto i tōna fare. ’Ua ’ite ’oia ē, i te hō’ē tau, e mea pinepine te mau ta’ata ’iri ’ere’ere i te hāmani-’ino-hia i te fenua Mārite. ’Ua ui atu ’oia, « mea nāhea tā ’outou ha’apa’ora’a fa’aro’o ’ia rave i te feiā ’ere’ere ? »

Te Feiā Mo’a, 4:230–31

Tē fa’ata’a nei te mau misiōnare ē, e nehenehe te mau tamari’i ato’a a te Atua ’ia bāpetizohia. Terā rā i taua tau ra, ’aita te feiā ’ere’ere e mau tupuna tō rātou nō ’Āfirita e nehenehe e mau i te autahu’ara’a, ’aita ato’a e fa’ari’i i te rahira’a o te mau ha’amaita’ira’a hiero. E rave rahi atu ā uira’a tā Helvécio ’e tā Rudá. ’Ua pāhono atu te mau misiōnare mai tā rātou e nehenehe ia rāua.

Te Feiā Mo’a, 4:231

E rave rahi matahiti te maoro, ’ua pure te mau peropheta nō te ’ite mai ’ahea te autahu’ara’a ’e te mau ha’amaita’ira’a o te hiero e hōro’ahia ai i te mau ta’ata ato’a.

Te Feiā Mo’a, 4:71

’Ua fa’aoti Helvécio ’e ’o Rudá e tāmata i te haere i te purera’a. E mea here roa ’e te hāmani maita’i te feiā mo’a i reira. ’Ua au roa te ’utuāfare Martins i te mea tā rātou i ’apo mai i te fare purera’a.

Te Feiā Mo’a, 4:231–32

I te hō’ē mahana, i te ho’ira’a mai i te fare nā te fare purera’a mai, ’ua parau Marcus i tōna ’utuāfare ē, ’ua ’ite mai ’oia e au ra e mea ’oa’oa a’e rātou. « ’Ua ’ite au e aha mau te tumu o te reira », ’ua parau Marcus. « Te ’evanelia a Iesu Mesia ». ’Ua ’ite te toe’a o te ’utuāfare ’ua tano roa Marcus. ’Ua fa’a’oti rātou ’ia bāpetizohia ’e ’ia ha’amauhia rātou.

Te Feiā Mo’a, 4:232

E rave rahi matahiti i muri mai, e mea ’ohipa roa te feiā mo’a nō Peretīria i te patura’a i te hō’ē hiero. ’Ua ’oa’oa roa te ’utuāfare Martins, ’ua ’oto ato’a rā rātou. E’ita e ti’a ia rātou ’ia tomo atu i roto i te hiero i muri a’e i te ha’amo’ara’ahia te reira. « ’Eiaha e ha’ape’ape’a », ’ua parau Helvécio ia Rudá. « ’Ua ’ite te Fatu i te mau mea ato’a ».

Te Feiā Mo’a, 4:293–94

E ’ere i te mea ’ōhie ’ia vai ha’apa’o maita’i noa. E fa’a’o’ō’o te mau ta’ata i te ’utuāfare Martins. ’Oia ato’a tō rātou mau hoa ’aita e ta’a nei nō te aha rātou e fa’aea noa ai i roto i te ’Ēkālesia. ’Ua ’ite rā Helvécio ’e tōna ’utuāfare ē, ’o te ’Ēkālesia teie a Iesu Mesia.

Te Feiā Mo’a, 4:251–52

I te hō’ē mahana, ’a ho’i mai ai Helvécio i te fare nā te ’ohipa mai, ’ua parau Rudá, « e parau ’āpī tā’u, e parau ’āpī fa’ahiahia mau ! » I muri a’e e rave rahi ha’apaera’a mā’a ’e te pure, ’ua fa’ari’i te peropheta, te peresideni Spencer W. Kimball, i te hō’ē heheura’a. ’Ua parau te Atua iāna ē, te mau ta’ata ato’a, noa atu te huru o te ’ū o tōna ’iri, e nehenehe rātou e fa’ari’i i te mau ha’amaita’ira’a ato’a o te autahu’ara’a ’e o te hiero.

Fa’a’itera’a mana 2 ; Te Feiā Mo’a, 4:318–19

’Ua tīa’i maoro mau te ’utuāfare Martins ’e vetahi atu mau ta’ata. I teienei, ’ua oti te tīa’ira’a ! ’Ua fa’ari’i Helvécio ’e ’o Marcus i te autahu’ara’a. ’Ua tā’atihia Helvécio, Rudá ’e tā rāua mau tamari’i ’ei ’utuāfare mure ’ore i roto i te hiero. I teienei e nehenehe rātou e fa’ari’i i te mau ha’amaita’ira’a ato’a o te ’evanelia.

Te Feiā Mo’a, 4:319–21