Te misiōni a Parley i Tanata

I muri noa mai i te ha’amo’ara’ahia te hiero nō Kirtland, e rave rahi feiā fa’atere o te ’Ēkālesia tei haere i te misiōni nō te poro i te ’evanelia.

Te Ha’api’ira’a Tumu ’e te mau Fafaura’a 88:81 ; 109:22–23 ; 112:28–29 ; Te Feiā Mo’a, 1:249

E mea au nā Parley Pratt e fa’a’ite i te ’evanelia. ’Ua mana’o rā ’oia e ti’a iāna ’ia fa’aea i te fare nō te mea ’ua ma’ihia tāna vahine, ’o Thankful te i’oa. ’Aita ato’a tā rāua e moni rahi.

Te Feiā Mo’a, 1:249

’Ua haere mai o Heber Kimball, te hoa o Parley ’e hō’ē o te mau ’āpōsetolo, e fārerei iāna. ’Ua hōro’a ’oia ia Parley i te hō’ē ha’amaita’ira’a ’e ’ua parau e ti’a iāna ’ia poro i te ’evanelia i Tanata. I roto i te ha’amaita’ira’a, ’ua fafau Heber ē e maita’i mai ’o Thankful. ’Ua fafau ’oia ē e fānau Thankful i te hō’ē tamaiti ’e e tauturu te Fatu ia Parley ’ia noa’a te moni tāna e hina’aro.

Te Feiā Mo’a, 1:249–50

E 10 matahiti tō Thankful ’e ’o Parley fa’aipoipora’ahia. ’Aita tā rāua e tamari’i. E fa’aro’o rā tō rāua i roto i te mau fafaura’a a te Fatu. Noa atu e mea fifi ’ia vai ātea ia Thankful i Tanata, ’ua haere Parley nō te fa’a’ite i te ’evanelia.

Te Feiā Mo’a, 1:250

I Tanata, ’ua ’imi Parley i te mau vāhi i reira ’oia e nehenehe ai e ha’api’i i te ta’ata. ’Ua ani ’oia e nehenehe ānei ’oia e ha’api’i i roto i te mau fare purera’a ’e i te tahi atu mau fare patu. ’Ua parau te mau ta’ata ato’a ’aita.

Te Feiā Mo’a, 1:252–53

I muri iho, ’ua fārerei atu Parley ia John ’e ia Leonora Taylor. ’Ua here rāua ia Iesu Mesia ’e i te Bibilia. ’Ua ui atu John ia Parley, e mea ta’a ’ē ānei te mea tāna e ha’api’i ra i te Bibilia.

Te Feiā Mo’a, 1:252–53

’Ua parau Parley, tē ha’api’i nei ’oia nō ni’a ia Iesu, te mau peropheta, te bāpetizora’a, ’e te Vārua Maita’i. Tei roto teie mau mea ato’a i te Bibilia. ’Ua ui John, « e aha te parau nō Iosepha Semita ’e te Buka a Moromona ? » ’Ua parau Parley ia John ē, ’ua ’ite ’oia e parau mau te Buka a Moromona, mai te Bibilia, ’e e peropheta Iosepha Semita nā te Atua.

Te Feiā Mo’a, 1:253

’Ua ti’aturi John i te mea tā Parley i parau. ’Ua tai’o ’oia i te Buka a Moromona ’e ’ua ’ite e parau mau te reira. ’Ua ani John ’e ’o Leonora i tō rāua mau hoa ia Joseph, Mercy ’e ’o Mary Fielding ’e ia vetahi ’ē e haere e fa’aro’o ia Parley ’ia ha’api’i. E rave rahi ta’ata tei bāpetizohia ’e tei ’āmui mai i te ’Ēkālesia.

Te Feiā Mo’a, 1:254–55

’Ua ’oa’oa Parley, ’ua hina’aro rā ’oia e ho’i i te fare ia Thankful ra i Kirtland. ’Ua aroha atu ’oia i tōna mau hoa ’āpī i Tanata. ’A aroha rima ai ’oia rātou, ’ua hōro’a rātou i te moni nō te tauturu iāna ’ia ha’apa’o i tōna ’utuāfare.

Te Feiā Mo’a, 1:255–56

I te ho’ira’a Parley i te fare, ’ua ’ite atu ’oia e mea maita’i roa Thankful. ’Ua fa’ari’i Parley i te tahi atu mau hōho’a o te Buka a Moromona, ’e ’ua ho’i atu i Tanata nō te tāmau i te fa’a’ite i te ’evanelia. I teie taime, ’ua haere Thankful nā muri iāna.

Te Feiā Mo’a, 1:256

’Aita i maoro roa, ’ua ’ite Parley ’e ’o Thankful e roa’a tā rāua hō’ē ’aiū. ’Ua ha’amana’o rāua i te ha’amaita’ira’a tā Heber i hōro’a ia Parley. ’Ua ’ite rāua i roto ia rāua ē, te mau mea ato’a tā te Fatu i fafau i roto i taua ha’amaita’ira’a ra tē tupu ra.

Te Feiā Mo’a, 1:256